​ប្រែ​សម្រួលៈ​បំណង​(ST)៖ ឥណ្ឌូនេស៊ី​និង​រុស្ស៊ី នឹង​ធ្វើការ​រួម​គ្នា​លើ​គំរោង​ជាច្រើន ទោះជា​លោកខាងលិច​កំពុង​ធ្វើ​អោយ​រដ្ឋាភិបាល​ទីក្រុង​មូ​ស្គូ​នៅ​ឯកោ ក្នុង​ការឆ្លើយតប​នឹង​ប្រតិបត្តិការ​សឹក​ចូលក្នុង​​ប្រទេស​អ៊ុ​យក្រែន​ក្តី។​

​ក្រុមហ៊ុន​ប្រេង​រដ្ឋ​ឥណ្ឌូនេស៊ី​ពែរ​តា​មីណា​( Pertamina)​និង​ក្រុមហ៊ុន​ប្រេង​រុស្ស៊ី រ៉ូស​ណេ​ហ្វ​ត៍​(Rosneft)​នឹង​បន្ត​គំរោង​របស់​ពួកគេ​ក្នុង​ការសាងសង់​រោងចក្រ​ចម្រាញ់​ប្រេង​មួយ​នៅក្នុង​ខេត្ត​ចា​វ៉ា​ខាង​​កើត​របស់​ឥណ្ឌូនេស៊ី ដើម្បី​ផលិត​ប្រេងឥន្ធនៈ​និង​វត្ថុធាតុដើម​សំរាប់​ឧស្សាហកម្ម​គីមី​ផលិត​ចេញពី​ប្រេង នេះ​បើ​តាម​ការបញ្ជាក់​របស់​មន្ត្រី​រដ្ឋាភិបាល​ឥណ្ឌូនេស៊ី​ម្នាក់​កាលពី​ថ្ងៃ​សុក្រ​។​

​មន្ត្រី​រូប​នេះ​បាន​និយាយថា «​ភាគី​រុស្ស៊ី​បាននិងកំពុង​ចរចា​ដើម្បី​ទទួលបាន​ការលើកលែង​ពន្ធ​។​គំរោង​នេះ​កំពុង​ស្ថិត​លើ​ផ្លូវ​ឆ្ពោះទៅ​កាន់​ការអនុវត្ត»​។​

​ក្រុមហ៊ុន​រដ្ឋ​ទាំង​ពីរ​មុននេះ​បាន​បង្កើត​ក្រុមហ៊ុន​រកស៊ី​រួមគ្នា PT Pertamina Rosneft Pengolahan dan Petrokimia​សំរាប់​គ្រប់គ្រង​រោងចក្រ​ចម្រាញ់​ប្រេង​New Grass Refinery Root (NGRR)​នៅ​ចា​វ៉ា​ខាងកើត​ដែល​គេ​រំពឹងថា​នឹង​ផលិត​ចេញ​ប្រេងសាំង ប្រេង​ម៉ា​ស៊ូ​តនិង​ប្រេងសាំង​យន្តហោះ​ប្រមាណ​២២៩.០០០​បារ៉ែល​ក្នុង​មួយថ្ងៃ​។​

​ពេល​សាងសង់​បញ្ចប់ គំរោង​នេះ​នឹង​ជួយ​ឥណ្ឌូនេស៊ី​ច្រើន​ក្នុង​ការបន្ថយ​ការពឹង​លើ​ប្រេង​នាំចូល ។​

​កាលពី​ថ្ងៃ​សុក្រ ស្ថានទូត​រុស្ស៊ី​ប្រចាំ​ទីក្រុង​ហ្សា​ការតាក៏បាន​និយាយថា ប្រធានាធិបតី​រុស្ស៊ី​លោក​វ្ល៉ា​ឌី​មៀ ពូ​ទីន បាន​សុំ​អោយ​ក្រុមហ៊ុន​ផ្លូវដែក​រុស្ស៊ី​ធ្វើកា​រវិនិយោគ​នៅក្នុង​រដ្ឋធានី​ថ្មី ឈ្មោះថា​«​នូ​សា​ន់តា​រ៉ា​-Nusantara»​។​រដ្ឋធានី​នៅក្នុង​ខេត្ត​កាលី​ម៉ាន់​តាន់​នេះ​នឹង​ត្រូវ​ចាប់ផ្តើម​សាងសង់​នៅ​ខែសីហា​ក្រោយ​ការពន្យារពេល​ដោយសារ​ជំងឺ​ឆ្លងកូវី​ដ​១៩៕

​ព័ត៌មាន​ស្តីពី​ការវិនិយោគ​រួមគ្នា​លើ​គំរោង​ថាមពល​នេះ​កើតឡើង​ចំពេល​ប្រធានាធិបតី​ឥណ្ឌូនេស៊ី​ធ្វើ​ទស្សនកិច្ច​ទីក្រុង​មូ​ស្គូ​និង​ជួប​មេដឹកនាំរុស្ស៊ី