​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកនាំពាក្យ​របប​យោធា​មី​យ៉ាន់​ម៉ា​បាន​ប្រាប់​ទីភ្នាក់ងារ​សារព័ត៌មាន AFPកាលពី​ថ្ងៃ​សុក្រ​ទី​១​កក្កដា​ថា​ការសន្ទនា​រវាង​របប​យោធា​មី​យ៉ាន់​ម៉ា​និង​មេ​ដឹក​​នាំ​ដែល​ត្រូវ​បាន​បណ្តេញ​ចេញ​លោកស្រី អ៊ុង​សាន ស៊ូ​ជី ដើម្បី​បញ្ចប់​វិបត្តិ​ដ៏​បង្ហូរឈាម​ដែល​កើតចេញពី​ការផ្តួលរំលំ​រដ្ឋាភិបាល​កាលពី​ឆ្នាំមុន គឺ “​មិនមែន​មិន​អាច​ទៅរួច​នោះទេ​”​។​

​ប្រជាជាតិ​អាស៊ីអាគ្នេយ៍​មួយ​នេះ​បាន​ស្ថិតក្នុង​ភាពវឹកវរ​ចាប់តាំងពី​រដ្ឋប្រហារ ខណៈ​ការប្រយុទ្ធ​គ្នា​ជា​ថ្មី​បាន​ផ្ទុះ​ឡើង​ជាមួយ​ក្រុម​ឧទ្ទាម​ជនជាតិភាគតិច​នានា និង​ក្រុមប្រឆាំង​ដែល​ហៅ​ខ្លួនឯង​ថា​”​កង​​កម្លាំង​ការពារ​ប្រជាជន​។​

​លោកស្រី​ស៊ូ​ជី​អាយុ ៧៧ ឆ្នាំ ត្រូវបាន​យោធា​ឃាត់ឃាំង​មិនឱ្យ​ទាក់ទង​នរណា​ម្នាក់​បាន​ឡើយ ហើយ​ថ្មីៗ​នេះ​ត្រូវបាន​ផ្ទេរ​ពី​ការឃុំ​ខ្លួន​ក្នុងផ្ទះ​ទៅ​ឃុំ​ក្នុង​ពន្ធនាគារ​តែម្នាក់ឯង​ខណៈ​លោកស្រី​ប្រឈមមុខ​​នឹង​ការកាត់ក្តី​ជាច្រើន​ករណី ដែល​អាច​ឃើញ​លោកស្រី​ត្រូវបាន​កាត់ទោស​ឱ្យ​ជាប់គុក​ជាង ១៥០ ឆ្នាំ​។​

​អ្នកនាំពាក្យ​របប​យោធា​លោក សា​វ មីន​ទុន (Zaw Min Tun)​បាន​ប្រាប់ AFP ថា “​គ្មានអ្វី​មិន​អាច​ទៅរួច​នោះ​ទេ​ក្នុង​នយោបាយ​” នៅពេល​សួរ​ថា​តើ​របប​យោធា​អាច​មាន​កិច្ចសន្ទនា​ជាមួយ​លោក​​ស្រី​ស៊ូ​ជី​ដើម្បី​ដោះស្រាយ​ភាពចលាចល​នេះ​ឬ​អត់​។​

​លោក​មីន​ទុន​និយាយថា “​យើង​មិន​អាច​និយាយថា ការចរចា​ជាមួយ​លោកស្រី​ស៊ូ​ជី​មិន​អាច​ទៅរួច​នោះទេ​”​។​

​លោក​បាន​និយាយថា “​ប្រទេស​ជាច្រើន​” បាន​ជំរុញ​ឱ្យ​បើក​ការសន្ទនា​ជាមួយ​ម្ចាស់​ជ័យលាភី​ពានរង្វាន់​ណូបែល​រូបនេះ ដោយ​មិន​បាន​ផ្តល់​ព័ត៌មាន​លម្អិត​នោះទេ​។​

​កិច្ចខិតខំ​ប្រឹងប្រែង​ផ្នែក​ការទូត ដែល​ដឹកនាំ​ដោយ​សមាគម​ប្រជាជាតិ​អាស៊ីអាគ្នេយ៍ (​អាស៊ាន​) ដែល​ក្នុងនោះ​មី​យ៉ាន់​ម៉ា​ជា​សមាជិក​រហូតមកទល់​ពេលនេះ​បាន​បរាជ័យ​ក្នុង​ការបញ្ឈប់​ការ​បង្ហូរឈាម​។​​កាលពី​ឆ្នាំមុន ប្លុក​នេះ​បាន​យល់ព្រម​លើ “​ការមូល​មតិ​ប្រាំ​ចំណុច​” ដែល​អំពាវនាវ​ឱ្យ​បញ្ឈប់​អំពើហិង្សា និង​ឱ្យ​មាន​ការសន្ទនា​ក្នុងន័យ​ស្ថាបនា ប៉ុន្តែ​របប​យោធា​មិន​អើពើ​ភាគច្រើន​។​

​បើ​តាម​សារព័ត៌មាន​ខាង​លើ បេសកជន​អាស៊ាន​និង​ជា​រដ្ឋមន្ត្រី​ការបរទេស​កម្ពុជា លោក ប្រាក់ សុខុន​បាន​ទៅ​ដល់​ប្រទេស​មី​យ៉ាន់​ម៉ា​កាលពី​ថ្ងៃ​ពុធ​សម្រាប់​ដំណើរ​ទស្សនកិច្ច​លើក​ទី​២​របស់​លោក​ក្នុង​គោល​​បំណង​ចាប់ផ្តើម​កិច្ចសន្ទនា​រវាង​របប​យោធា​និង​ក្រុម​ដែល​ប្រឆាំងនឹង​ការគ្រប់គ្រង​របស់​យោធា​។​

​អ្នកនាំពាក្យ​របប​យោធា​បាន​និយាយថា លោក​បាន​ជួប​ជាមួយ​ប្រមុខ​រដ្ឋាភិបាល​លោក មីន អ៊ុង​ហ្លាំង កាលពី​ថ្ងៃ​ព្រហស្បតិ៍ ហើយ​កាលពី​ថ្ងៃ​សុក្រ​បាន​ជួប​ជាមួយ​សមាជិក​នៃ​គណបក្សនយោបាយ​មួយចំនួន​​នៅក្នុង​រដ្ឋធានី​ណៃ​ពិដោ ។​

​របប​យោធា​បាន​និយាយថា លោក​ប្រាក់ សុខុន​នឹង​មិន​ត្រូវបាន​អនុញ្ញាត​ឱ្យទៅ​ជួប​លោក​ស្រី​ស៊ូ​ជី​នោះទេ​។​

​លោក​សាវ មីន​ទុន​បាន​និយាយ​ទាក់ទង​នឹង​ស្ថានភាព​រស់នៅ​ថ្មី​របស់​លោកស្រី​ស៊ូ​ជី​នៅក្នុង​ពន្ធនាគា​រថា “​យើង​បាន​ធ្វើ​អ្វី​ដែល​គាត់​ស្នើ​សុំ​ទាក់ទង​នឹង​បញ្ហា​សុខភាព​និង​ស្ថានភាព​រស់នៅ​របស់​គាត់​”៕

​លោកស្រី​ស៊ូ​ជី​អាយុ ៧៧ ឆ្នាំ ត្រូវបាន​យោធា​ឃាត់ឃាំង​មិនឱ្យ​ទាក់ទង​នរណា​ម្នាក់​បាន​ឡើយ​