​ដោយ​៖ សុវណ្ណ​កុម្ភៈ / ភ្នំពេញ​៖ អនុប្រធាន​ទី​១ សហព័ន្ធ​កីឡា​ចំបាប់​កម្ពុជា លោក ខេ​ស៊ី បា​ណេ​ត បាន​ថ្លែងថាៈ សម្រាប់​ឆ្នាំ​២០២២ នេះ គឺ​សហព័ន្ធ​កីឡា​ចំបាប់​កម្ពុជា នឹង​បញ្ជូន​កីឡាករ កីឡាការិនី​ជម្រើសជាតិ ចូលរួម​ប្រកួត​អន្តរជាតិ ឲ្យ​បាន​ច្រើន ដើម្បី​បង្កើន​សមត្ថភាព និង​គុណភាព​របស់​ពួកគេ ឲ្យ​កាន់តែ​ល្អ​។​

​លោក​បាន​បន្ដថាៈ ខែក្រោយ​នេះ អត្ត​ព​លិ​ក​ចំបាប់​កម្ពុជា នឹង​ទៅ​ប្រកួត​កីឡា​ប៉ូលិស​អន្តរជាតិ នៅ​ប្រទេស​ហូ​ឡង់​, ខែតុលា គ្រោង​នឹងចូលរួម​ប្រកួត នៅ​ប្រទេស​ឥណ្ឌូណេស៊ី និង​ខែធ្នូ ចុងឆ្នាំ​២០២២ សហព័ន្ធ នឹង​ទទួល​រៀបចំ​ធ្វើ​ម្ចាស់ផ្ទះ នៃ​ការប្រកួត​ជើងឯក​កីឡា​ចំបាប់ អាស៊ីអាគ្នេយ៍​។ បន្ថែម​ពីលើ​នេះ សហព័ន្ធ នឹង​បញ្ជូន​ក្រុម​ជម្រើសជាតិ ទៅ​ហ្វឹកហាត់​នៅ​ប្រទេស​ចិន រយៈពេល​៦​ខែ និង​ក្រុម​ជម្រើសជាតិ ១០ នាក់​ផ្សេងទៀត គ្រោង​ចេញទៅ​ហ្វឹកហាត់ នៅ​ប្រទេស​អ៊ីរ៉ង់ មុនពេល​ព្រឹត្តិការណ៍​កីឡា​ស៊ី​ហ្គេម លើក​ទី​៣២ ឆ្នាំ​២០២៣ ចូលមក​ដល់​។

​លោ ខេ​ស៊ី បា​ណេ​ត បាន​សង្កត់ធ្ងន់ថាៈ ការ​ចេញទៅ​ហ្វឹកហាត់ នៅក្រៅ​ប្រទេស ជា​រឿង​សំខាន់​ណាស់ ពីព្រោះ​ទីនោះ មាន​គូប្រជែង​ហ្វឹកហាត់ និង​ប្រកួត​ខ្លាំងៗ ដើម្បី​បង្កើន​ការអភិវឌ្ឍ​បច្ចេកទេស កាន់តែខ្លាំង​។ ដូច្នេះ​ក្តីសង្ឃឹម​មាន​ច្រើន សម្រាប់​គោលដៅ​ការហ្វឹកហាត់ ការប្រកួត និង​ការរៀបចំ​ធ្វើ​ម្ចាស់ផ្ទះ​ជើងឯក​ចំបាប់ អាស៊ីអាគ្នេយ៍ ក្នុងការ​បង្កើន​គុណភាព​កីឡាករ កីឡាការិនី​ជម្រើសជាតិ ឲ្យ​បាន​ច្រើន​។ កាលណា​យើង មាន​ធនធាន​កីឡាករ កីឡាការិនី កាន់តែច្រើន​នោះ លទ្ធភាព​ក្នុង​ប្រកួតប្រជែង មេដាយ ក៏​កាន់តែច្រើន ទៅតាម​នោះដែរ​។​

​សម្រាប់​ការរៀបចំ​ធ្វើ​ម្ចាស់ផ្ទះ ជើងឯក​កីឡា​ចំបាប់​អាស៊ីអាគ្នេយ៍ ចុងឆ្នាំ​២០២២​នេះ គឺ​សហព័ន្ធ បាន​ត្រៀម​រៀបចំ ៣​ប្រភេទ​វិញ្ញាសា​ធំៗ គឺ​វិញ្ញាសា​ចំបាប់​សេរី ចំបាប់​ក្រិច​កូ និង​ចំបាប់​នារី ហើយ​ក្នុង​ប្រភេទ​វិញ្ញាសា​នីមួយៗ នឹង​បន្ថែម​ប្រភេទ​ទម្ងន់ ឲ្យ​បាន​១០ សរុប ៣០ ប្រភេទ​ទម្ងន់​។ ការរៀប​ចំនេះ គឺ​ស្របតាម​គោលការណ៍​របស់ សហព័ន្ធ​កីឡា​ចំបាប់​អន្តរជាតិ ដោយ​ក្នុង​១​ប្រភេទ តិច​បំផុត​៦ និង​ច្រើន​បំផុត​អាចដាក់​ត្រឹម​១០​ប្រភេទ​ទម្ងន់​។​

​តាមរយៈ​ការបង្កើន​ប្រភេទ​ទម្ងន់ ក្នុង​ប្រភេទ​វិញ្ញាសា​នីមួយៗ​នេះ នឹង​ជួយ​ជំរុញ​ឲ្យ​ម្ចាស់ផ្ទះ​កម្ពុជា ​ដណ្តើម​មេដាយ កាន់តែច្រើន ដើម្បី​វាស់​ស្ទង់ ត្រៀម​ឆ្ពោះទៅ​ជោគជ័យ ក្នុងពេល​កម្ពុជា​​ទទួល​ធ្វើ​ម្ចាស់ផ្ទះស៊ី​ហ្គេម ឆ្នាំ​២០២៣​។​

​ជាមួយនឹង​ការត្រៀម​គោលដៅ​យុទ្ធសាស្ត្រ យ៉ាងច្បាស់​លាស់​នេះ សហព័ន្ធ ជឿជាក់ថា ពេល​ស៊ី​ហ្គេម ឆ្នាំ​២០២៣ ប្រភេទ​កីឡា​ចំបាប់​កម្ពុជា នឹង​ដណ្តើមបាន​មេដាយមាស ២ គ្រឿង យ៉ាងតិច តាម​ស​ន្ទ​ស្សន៍​មេដាយ មាស ដែល​គណៈកម្មាធិការ​ជាតិ CAMSOC បានកំណត់ ហើយនឹង​អាច​បាន​មេដាយមាស ៤ គ្រឿង ឬ​អាច​លើសពីនេះ​។​

​ការត្រៀម​ស៊ី​ហ្គេម ជា​ប្រវត្តិសាស្ត្រ​ដំបូង​នេះដែរ សហព័ន្ធ​ចំបាប់​កម្ពុជា នឹង​រៀបចំ​ឲ្យ​កីឡាករ កីឡាការិនី​ជម្រើសជាតិ​កម្ពុជា ដែលមាន​សក្តានុពល​ខ្ពស់ៗ នឹង​ត្រៀម​ចូលរួម​ប្រកួត​ចំនួន ២ វិញ្ញាសា ស្របតាម​គោលការណ៍​អនុញ្ញាត របស់​សហព័ន្ធ​ចំបាប់​អន្តរជាតិ​៕/V​