​ប្រែ​សម្រួល : កញ្ញា​ដា​លី​ស (VNExpress) ៖ សកម្មភាព​ផលិតកម្ម​របស់​អាស៊ី​បាន​ជាប់គាំង​ក្នុង​ខែ​មិថុនា​ដោយ​សារ​ក្រុមហ៊ុន​ជាច្រើន​បាន​រង​ការវាយប្រហារ​ដោយ​ការរំខាន​ការផ្គត់ផ្គង់​ដែល​​បណ្តាលមកពី​ការបិទ​ខ្ទប់​ទប់ស្កាត់​កូវី​ដ​១៩​ដ៏​តឹងរ៉ឹង​នៅ​ចិន​។​

​ហានិភ័យ​នៃ​ការធ្លាក់​ចុះ​សេដ្ឋកិច្ច​យ៉ាង​គំហ៊ុក​នៅ​អឺរ៉ុប​និង​សហរដ្ឋ​អាម៉េរិក​ក៏​បាន​ពង្រឹង​ដល់​ការបារម្ភ​អំពី​ការធ្លាក់ចុះ​សេដ្ឋកិច្ចពិភពលោក​ផងដែរ​។​

​ការ​ស្ទាបស្ទង់​មួយចំនួន​កាលពី​ថ្ងៃ​សុក្រ​ទី​០១​កក្កដា​បាន​បង្ហាញ​សកម្មភាព​រោងចក្រ​របស់​ចិន​កើនឡើង​យ៉ាង​ខ្លាំង​ក្នុង​ខែមិថុនា ខណៈ​ធ្លាក់ចុះ​នៅក្នុង​ប្រទេស​ជប៉ុន​និង​កូរ៉េខាងត្បូង​ក៏ដូចជា​ការធ្លាក់​​ចុះ​នៅ​តៃវ៉ាន់​បានបង្ហាញ​ពី​ភាព​តានតឹង​ពី​ការរំខាន​ការផ្គត់ផ្គង់ ការកើនឡើង​ថ្លៃដើម និង​កង្វះខាត​វត្ថុធាតុដើម​ជា​បន្ត​។​

​ការ​ស្ទាប់ស្ទង់​របស់​ឯកជន​មួយ​បាន​បង្ហាញថា សកម្មភាព​ផលិតកម្ម​របស់​ចិន​បាន​ពង្រីក​យ៉ាង​លឿន​បំផុត​ក្នុង​រយៈពេល ១៣ ខែ​នៅ​ក្នុង​ខែ​មិថុនា​ខណៈ​ការដកចេញ​ការបិទ​ខ្ទប់​ទប់ស្កាត់​កូវី​ដ​បាន​​ធ្វើ​ឱ្យ​រោងចក្រ​នានា​ប្រឹងប្រែង​ដើម្បី​បំពេញ​តម្រូវការ​ដ៏​រឹងមាំ​។​

​ការដកចេញ​វិញ​នូវ​ការបិទ​ខ្ទប់​របស់​ចិន​អាច​បន្ធូរបន្ថយ​ខ្សែសង្វាក់​ផ្គត់ផ្គង់​និង​អនុញ្ញាត​ឱ្យ​ក្រុមហ៊ុន​ផលិត​រថយន្ត​និង​ក្រុមហ៊ុន​ផលិត​ផ្សេង​ទៀត​អាច​បន្ត​ប្រតិបត្តិការ​ឡើងវិញ​បន្ទាប់ពី​ទទួលរង​ការរំខាន​​យ៉ាងធ្ងន់ធ្ងរ​។​

​ទោះយ៉ាងណា អ្នកវិភាគ​មួយ​ចំនួន​បាន​ព្រមាន​អំពី​បញ្ហា​ប្រឈម​ថ្មីៗ ដូចជា​ការបារម្ភ​របស់​ទី​ផ្សារខ្លាំង​ឡើង​ថា​ការដំ​ឡើង​អត្រា​ការប្រាក់​ដ៏​ខ្ពស់​របស់​សហរដ្ឋ​អាម៉េរិក​ដើម្បី​កាត់បន្ថយ​អតិផរណា​ដែល​​កើន​ឡើង​ខ្លាំង នឹង​រុញ​ប្រទេស​នេះ​ឱ្យ​ធ្លាក់​ចូល​ក្នុង​វិបត្តិ​សេដ្ឋកិច្ច ហើយ​វា​នឹង​ប៉ះពាល់​ដល់​តម្រូវការ​ជាស​កល​ទាំងមូល​។​

​ការ​រឹតបន្តឹង​គោល​នយោបាយ​នៅ​ទូ​ទាំង​បណ្តា​សេដ្ឋកិច្ច​ផ្សេងទៀត​ជាច្រើន​ចំពេល​មាន​សម្ពាធ​តម្លៃ​ទំនិញប្រើប្រាស់​យ៉ាងខ្លាំង​នោះ​បាន​បង្ក​ឱ្យ​មាន​ការបា​រ​ម្ភ​អំពី​ការធ្លាក់ចុះ​សេដ្ឋកិច្ច​ពិភពលោក​យ៉ាង​​គំហ៊ុក និង​ធ្វើឱ្យ​ទីផ្សារ​ហិរញ្ញវត្ថុ​រង្គោះរង្គើ​ក្នុង​ប៉ុន្មាន​ខែ​ថ្មីៗ​នេះ​។​

​លោក យ៉ូ​ស៊ីគី ស៊ីន​កេ (Yoshiki Shinke) ប្រធាន​សេដ្ឋវិទូ​នៅ​វិទ្យាស្ថាន​ស្រាវជ្រាវ​ជីវិត​ដាយ​អ៊ី​ឈី (Dai-ichi) របស់​ជប៉ុន បាន​និយាយថា​”​មាន​ក្តីសង្ឃឹម​ថា​សេដ្ឋកិច្ច​របស់​ចិន​នឹង​កើនឡើង​​បន្ទាប់​ពី​ការ​ចុះខ្សោយ​មួយរយៈ​។ ប៉ុន្តែ​ឥឡូវនេះ​មាន​ហានិភ័យ​នៃ​ការធ្លាក់​ចុះ​នៅក្នុង​សេដ្ឋកិច្ច​របស់​សហរដ្ឋ​អាម៉េរិក​និង​អឺរ៉ុប​។ វា​នឹង​មាន​ការប្រកួតប្រជែង​រវាង​សេដ្ឋកិច្ច​ទាំង​ពីរ​ប៉ុន្តែ​មាន​ភាព​មិន​​ច្បាស់លាស់​ច្រើនណាស់​លើ​ទស្សនវិស័យ​សេដ្ឋកិច្ច​សកល​”៕

​កង់​មួយ​ជិះ​កាត់​រោងចក្រ​នៅ​ភាគខាងត្បូង​ក្រុង​តូ​ក្យូ ប្រទេស​ជប៉ុន កាលពី​ថ្ងៃទី​១៨ សីហា ឆ្នាំ​២០១៦