​ប្រែ​សម្រួលៈ​បំណង​(CNA)៖ ទិន្នន័យ​ផ្លូវការ​បាន​បង្ហាញ​កាលពី​ថ្ងៃ​សុក្រ​ទី​០១​កក្កដា​ថា អតិផរណា​របស់​ប្រទេស​ស្រីលង្កា​ឡើង​ដល់​កំរិត​ខ្ពស់​បំផុត​ជាប់ៗ​គ្នាលើក​ទី​ប្រាំបួន​នៅ​ខែមិថុនា គឺ​ឡើងដល់​៥៤​ភាគរយ​នៅ​មួយ​ថ្ងៃក្រោយ​អង្គការ​IMF​បាន​ស្នើសុំ​ប្រជាជាតិ​ក្ស័យធន​មួយ​នេះ​ទប់​ថ្លៃទំនិញ​ដែល​ឡើង​កប់​ពពក​និង​បំបាត់អំពើពុករលួយ​។​

​វា​ជា​លើកដំបូង​ដែល​កំណើន​នៅក្នុង​ស​ន្ទ​ស្សន៍​ថ្លៃទំនិញ​ប្រើប្រាស់​ក្រុង​កូឡុំបូ​(CCPI)​ឡើង​ហួស​៥០​ភាគរយ នេះ​បើ​តាម​នាយកដ្ឋាន​ជំរឿន​និង​ស្ថិតិ​។​

​ការបញ្ចេញ​តួលេខ​នេះ​កើតឡើង​តែ​ប៉ុន្មាន​ម៉ោង​ក្រោយ​អង្គការ​រូបិយវត្ថុ​អន្តរជាតិ​IMF​បាន​ទទូច​សុំ​អោយ​ស្រីលង្កា​ទប់​កុំអោយ​អតិ​ផ​រណា​ឡើង​កប់​ពពក​និង​ដោះស្រាយ​អំពើពុករលួយ ជា​ផ្នែក​នៃ​កិច្ច​ខិត​​ខំ​របស់​ខ្លួន​ដើម្បី​សង្គ្រោះ​សេដ្ឋកិច្ចប្រទេសនៅអាស៊ីខាងត្បូងមួយនេះ ។​

IMF​បានបញ្ចប់​ការពិភាក្សា​ផ្ទាល់​ចំនួន​ដប់​ថ្ងៃ​ជាមួយ​អាជ្ញាធរ​ស្រីលង្ការ​នៅ​កូឡុំបូ​កាលពី​ថ្ងៃ​ព្រហស្បតិ៍​ក្រោយ​រដ្ឋាភិបាលទីក្រុងកូឡុំបូ​ស្នើសុំ​អោយ​ជួយ​សង្គ្រោះ​។​

​សូមបញ្ជាក់​ថា​ស​ន្ទ​ស្សន៍ CCPI​នេះ​បាន​ចេញ​កំរិត​អតិផរណា​ឡើង​ដល់​កំពូល​ប្រចាំខែ​ថ្មីៗ​ជាប់​ចាប់តាំងពី​ខែតុលា​ឆ្នាំ​មុន ដែល​ពេលនោះ​វា​មានកំ​រឹត​ត្រឹម​៧,៦​ភាគរយ​ប៉ុណ្ណោះ​។​នៅ​ខែ​ឧសភា​ឆ្នាំនេះCCPIបាន​​ស្ទុះ​ឡើង​ដល់​៣៩,១​ភាគរយ​។​

​ប្រាក់​រូពី​(rupee)​របស់​ជាតិ​នៅ​ឆ្នាំ​នេះ បាន​បាត់បង់​តំលៃ​ជាង​ពាក់កណ្តាល​ធៀប​នឹង​ប្រាក់​ដុល្លារ​អាម៉េរិក​ខណៈ​អ្នកសេដ្ឋកិច្ច​ខ្លះ​បាន​និយាយថា ថ្លៃទំនិញ​ប្រើប្រាស់​ឡើង​លឿនជាងលទ្ធភាពដែល​​អ្នកជំនាញ​អាចកត់ត្រា​នៅ​​ក្នុង​ស្ថិតិ​ផ្លូវការ​ទៅទៀត​។​

​យោ​ង​តាម​អ្នកសេដ្ឋកិច្ច​ម្នាក់​នៅ​សកល​វិទ្យាល័យ​ច​ន ហប់​ឃី​នស៍​( Johns Hopkins)​លោក ស្ទេ​វ ហាន់​កេ​(Steve Hanke)ដែល​តាមដាន​កន្លែង​មាន​បញ្ហា​នៅក្នុង​លោក អតិផរណា​របស់​ស្រីលង្កា​​មាន​កំរិត​ដល់​ទៅ​១២៨​ភាគរយ គឺ​នៅ​ក្រោយ​តែ​ប្រទេស​ហ្ស៊ី​មបា​វ៉េ​តែមួយគត់ ដែល​មាន​អតិផរណា​៣៦៥​ភាគរយ​។​

​ប្រឈម​នឹង​កង្វះ​ថាមពល​យ៉ាង​អត្ត​ខាត់ ស្រីលង្កា​កំពុង​បិទ​ស្ថាប័នរដ្ឋ​មិនចាំបាច់​សំរាប់​ពេល​កន្លះ​ខែ ជាមួយនឹង​ការបិទ​សាលារៀន​ដើម្បី​កាត់បន្ថយ​ការធ្វើដំណើរ​។​

​ប្រទេស​ដែល​មាន​ប្រជាជន​២២​លាន​នាក់​នេះ​កំពុង​ជួប​ការខ្វះខាត​ទំនិញ​ចាំបាច់​ជាខ្លាំង រួម​មាន​ស្បៀង ប្រេងឥន្ធនៈ​និង​ថ្នាំពេទ្យ ។​ការតវ៉ា​ប្រឆាំង​នៅតែ​បន្ត​នៅក្រៅ​ការិយាល័យ​ប្រធានាធិបតី​ដើម្បី​​ទាមទារ​អោយ​លោក​ចុះចេញ​ពី​តំណែង​ដោយសារតែ​ដឹកនាំ​ប្រទេស​មិនបាន​ល្អ​។​

បញ្ជាក់ថា ​ស្រីលង្កា​បាន​ងាក​ទៅរក​អោយ​IMF​ជួយ​កាលពី​ខែ​មេសា ក្រោយ​ប្រទេស​ប្រកាសថា​លែងមាន​លទ្ធភាព​សងបំណុល​បរទេស​៥១​ពាន់​លាន​ដុល្លារ​៕

​ប្រទេស​ដែល​មាន​ប្រជាជន​២២​លាន​នាក់​នេះ​កំពុង​ជួប​ការខ្វះខាត​ទំនិញ​ចាំបាច់​ជាខ្លាំង រួម​មាន​ស្បៀង ប្រេងឥន្ធនៈ​និង​ថ្នាំពេទ្យ