ប្រែ​សម្រួលៈ​បំណង​(​ដេល្លី​ម៉េល​)៖ យោធា​អ៊ុយ​ក្រែន​កាលពី​ថ្ងៃអាទិត្យ​បាន​ដកថយ​ចេញពី​ទីក្រុង​លី​ស៊ី​ចាន់​ស​ខ៍​( Lysychansk)​នៅពេល​កងកម្លាំង​រុស្ស៊ី​អះអាង​ជ័យជម្នះ​ធំ​មួយ​ដោយសារ​ដណ្តើមបាន​​ការគ្រប់គ្រង​តំបន់​លុន​ហា​ន់ស​ខ៍​(Lugansk)​ទាំងមូល​។​

​ទីក្រុង​លី​ស៊ី​ចាន់​រង​ការខូចខាត​ក្រោយ​ស្ថិតក្រោម​ការបាញ់​ផ្លោង​និង​ប្រយុទ្ធ​គ្នា​ជា​ខ្លាំង​រាប់សប្តាហ៍

​ការដកចេញ​របស់​ក​ង​កម្លាំង​អ៊ុយ​ក្រែន​កើត​ឡើង​ក្រោយ​ការប្រយុទ្ធ​គ្នា​ដ៏​ខ្លាំង​អស់​រាប់​សប្តាហ៍​និង​កត់សំគាល់​ការទម្លាយ​ឧបសគ្គ​ធំ​ចុង​ក្រោយ​មួយ​សំរាប់​កងកម្លាំង​រុស្ស៊ី​ក្នុង​រយៈពេល​ជាង​បួន​ខែ​មកនេះ​​ក្រោយ​ពី​ខ្លួនងា​ក​ចេញពី​ការ​ផ្តោតលើ​ការ​វាយ​កាន់កាប់​រដ្ឋធានី​គៀវ​។​

​លី​ស៊ី​ចាន់​ស​ខ៍ ជា​ទីក្រុង​ធំ​ចុង​ក្រោយ​នៅក្នុង​តំបន់​លុន​ហាន់​ស​ខ៍​នៃ​តំបន់​ដុន​បាស​ភាគ​ខាងកើត​អ៊ុយ​ក្រែន​ដែល​បន្ត​នៅក្នុង​ដៃ​អ៊ុ​យក្រែន ហើយ​ការបាត់បង់​ទីក្រុង​នេះ​ផ្តល់​អោយ​កងកម្លាំង​រុស្ស៊ី​នូវ​ប្រៀប​​ក្នុងការ​វាយយក​ទីក្រុង​ក្រា​ម៉ា​ត​ស​ខ៍​(Kramatorsk)​និង​ស្លូ​វៀនស​ខ៍​(Sloviansk)​ក្នុង​តំបន់​ដុន​ណិ​ត​ស​ខ៍​(Donetsk)​ក្បែរ​ខាង​។​

​ប្រធានាធិបតី​អ៊ុយ​ក្រែន​មុននេះ​បាន​បដិសេធ​ថា​លី​ស៊ី​ចាន់​ស​ខ៍មិនបាន​ធ្លាក់​ក្នុង​ដៃ​រុស្ស៊ីទេ មុន​យោធា​អ៊ុយ​ក្រែន​ប្រកាសថា​ខ្លួន​ដកចេញ​ពី​ទី​នេះ​នៅ​ល្ងាច​ថ្ងៃ​អាទិត្យ​។​

​យោធា​បាន​និយាយថា​«​ការបន្ត​ការពារ​ទីក្រុង​នេះ​នឹង​នាំ​ដល់​ការបាត់បង់​អាយុជីវិត​ពលទាហាន​ច្រើន​ដោយសារ​រុស្ស៊ី​មានប្រៀប​ជាង​ទាំង​គ្រឿង​បរិក្ខា​យោធា​និង​ចំនួន​ទាហាន​។​ដើម្បី​រក្សា​អាយុជីវិត​យុទ្ធ​​ជន​អ៊ុ​យក្រែន យើង​បាន​សំរេចចិត្ត​ដកទ័ព​។ ឆន្ទៈ​រឹង​ដូច​ដែក​និង​ទឹកចិត្ត​ស្នេហា​ជាតិ​មិន​គ្រប់គ្រាន់​ដើម្បី​ដណ្តើមបាន​ជោគជ័យ​ទេ វាត្រូវ​មាន​ប្រភព​ធនធាន​សម្ភារ​និង​បច្ចេកទេស​បន្ថែម​ទៀត​»​។​

​បរាជ័យ​ចុងក្រោយ​នេះ​របស់រប​ស់អ៊ុយ​ក្រែន​នេះ​កើត​ឡើង​បន្ទាប់ពី​នាយករដ្ឋមន្ត្រី​អូស្ត្រាលី​លោក អ៊ែន​ថូ​នី អាល់​បាណេ​ស កាលពី​ថ្ងៃអាទិត្យ​បាន​សន្យា​ផ្តល់​ជំនួយ​យោធា​បន្ថែម​ទៀត រួម​មាន​រថពាសដែក​​និង​ដ្រូ​ន​ក្នុង​អំឡុ​ងពេល​លោក​ជួប លោក​ហ្សេ​ឡេន​ស្គី នៅ​ទីក្រុង​គៀវ​។​

​នាយករដ្ឋមន្ត្រី​អូស្ត្រាលី​ធ្វើ​ទស្សនកិច្ច​អ៊ុយ​ក្រែន​កាលពី​ថ្ងៃអាទិត្យ និង​សន្យា​ផ្តល់​ជំនួយ​យោធា​បន្ថែម​

​នៅក្នុង​ការ​ថ្លែង​កាលពី​យប់​ថ្ងៃអាទិត្យ លោក​ហ្សេ​ឡេន​ស្គី​បាន ប្តេជ្ញា​បន្ត​ប្រយុទ្ធ​និង​វាយ​យក​មក​វិញ​ទឹកដី​ដែល​បាត់បង់ ហើយ​ធានា​ថា​យោធា​អ៊ុយ​ក្រែ​ននឹង​ទទួល​បានសព្វាវុធកា​ន់តែ​ទំ​នើប​ឡើង​។​

​ប្រធានាធិបតី​អ៊ុ​យក្រែន លោក​វ៉ូ​ឡូ​ឌី​មៀ ហ្សេ​ឡេន​ស្គី​កាលពី​ថ្ងៃអាទិត្យ​បាន​ទទួលស្គាល់ថា កងកម្លាំង​អ៊ុយ​ក្រែន​បាន​ដក​ចេញពី​ទីក្រុង​លី​ស៊ី​ចាន់​ស​ខ៍​ក្នុង​តំបន់​ដុន​បាស​​តែ​បាន​ប្តេជ្ញា​ស្តារ​ការគ្រប់គ្រង​តំបន់​នេះ​មកវិញ ដោយសារ​កល​យុទ្ធ​យោធា​និង​លទ្ធភាព​នៃ​ការទទួល​បាន​សព្វាវុធ​ថ្មីៗ​និង​ប្រសើរឡើង​

​នៅ​ថ្ងៃអាទិត្យ​នេះដែរ រុស្ស៊ី​បាន​ចោទប្រកាន់​អ៊ុយ​ក្រែនថា​បានបាញ់​កាំជ្រួច​ក្បាល​គ្រាប់​ចង្កោម​ចំនួន​បី​ដើម​ដាក់​ទីក្រុង​បែ​ល​ហ្គោ​រ៉ូត​(Belgorod)​នៅជាប់​នឹង​ព្រំដែន​អ៊ុ​យក្រែន បន្ទាប់​ពី​បេឡា​រូ​សបាន​​និយាយថា​ខ្លួន​បាន​ស្ទាក់​កំទេច​កាំជ្រួច​របស់​អ៊ុ​យក្រែន​។​

​រដ្ឋាភិបាល​ទីក្រុង​មូ​ស្គូ​ក៏​បាន​អះអាង​ថា កងការពារ​ដែនអាកាស​របស់​ខ្លួន​បាន​បាញ់​ទម្លាក់​កាំជ្រួច​ចង្កោម​ធុន​តូច​ឆ្កា​-​អ៊ុយ​(Tochka-U)​ចំនួន​បី​ដើម​ដែល​ពួក​ជាតិនិយម​អ៊ុយ​ក្រែន​បាញ់​សំដៅ​ទីក្រុង​​បែ​ល​ហ្គោ​រ៉ូត​។​

​ការវាយប្រហារ​ដោយ​កាំជ្រួច​របស់​អ៊ុយ​ក្រែន​ចូល​ក្រុងបែល​ហ្គោ​រ៉ូត​កាលពី​ថ្ងៃអាទិត្យ​បាន​សម្លាប់​មនុស្ស​បីនាក់ និង​បំផ្លាញ​ផ្ទះ​ប្រមាណ​៥០៕

ទីក្រុងបែលហ្គោរ៉ូត របស់រុស្ស៊ីរងការវាយប្រហារដោយកាំជ្រួចអ៊ុយក្រែន