​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប៉ូលិស​បាន​និយាយថា ខ្មាន់កាំភ្លើង​ម្នាក់​បាន​បើក​ការបាញ់ប្រហារ​នៅ​ខាងក្នុង​ផ្សារ​ទំនើប​ដ៏​មមាញឹក​មួយ​ក្នុង​រដ្ឋធានី​ដា​ណឺម៉ា​កកាល​ពី​ថ្ងៃអាទិត្យ​ទី​៣​កក្កដា ដោយ​សម្លាប់​មនុស្ស​បីនាក់ និង​របួសធ្ងន់​បីនាក់​ផ្សេងទៀត​។​

​អធិការ​ប៉ូលិស​ក្រុង​កូប៉ែ​ន​ហាក លោក សូ​រេ​ន ថូ​ម៉ា​សសិន (Søren Thomassen) បាន​ប្រាប់​អ្នកយកព័ត៌មាន​ថា បុរស​ជនជាតិ​ដា​ណឺ​ម៉ាក​អាយុ ២២​ឆ្នាំ​ម្នាក់​ត្រូវបាន​ចាប់ខ្លួន​បន្ទាប់ពី​ការបាញ់​​ប្រហារ​នេះ ដោយ​បន្ថែម​ថា​គ្មាន​ការចង្អុលបង្ហាញ​ណាមួយ​ថា​មាន​អ្នក​ផ្សេង​ទៀត​ពាក់ព័ន្ធ​នឹង​ការវាយប្រហារ​នេះ​ទេ ទោះបី​ប៉ូលិស​នៅ​កំពុង​ស៊ើបអង្កេត​ក៏ដោយ​។​

​អំពើហិង្សា​ដោយ​កាំភ្លើង​គឺ​កម្រ​មាន​ណាស់​នៅក្នុង​ប្រទេស​ដា​ណឺ​ម៉ាក​។​

​លោក​ថូ​ម៉ាស​សិន​បាន​និយាយថា វា​លឿន​ពេក​ដែល​នាំគ្នា​ប៉ាន់ស្មាន​ពី​ហេតុផល​ពីក្រោយ​ការបាញ់ប្រហារ ដែល​បាន​កើតឡើង​នៅ​រសៀល​ថ្ងៃ​អាទិត្យ​នៅ​ឯ​ផ្សារ​ហ្វៀល​ស៍​( Field’s)​ដែល​ជា​ផ្សារ​ទំនើប​ដ៏​​ធំ​បំផុត​មួយ​ក្នុងប្រទេស​ក្នុង​តំបន់​ស្កា​ន​ឌី​ណា​វីយ៉ា (Scandinavia)​មួយ​នេះ និង​មាន​ទីតាំង​នៅ​ជាយ​រដ្ឋធានី​ដា​ណឺ​ម៉ាក​។

​យោង​តាម​សាក្សី​បានឱ្យដឹងថា នៅពេលដែល​ការបាញ់ប្រហារ​បានកើត​ឡើង មនុស្ស​មួយចំនួន​បាន​លាក់ខ្លួន​នៅក្នុង​ហាង ខណៈ​អ្នក​ផ្សេង​ទៀត​រត់គេច​ខ្លួន​ទាំង​ភ័យ​ស្លន់ស្លោ​និង​ជាន់គ្នា​។​

​លោក ហាន គ្រី​ស្ទាន ស្តូល​ស៍ (Hans Christian Stoltz) ទីប្រឹក្សា​ផ្នែក​ព័ត៌មានវិទ្យា​អាយុ ៥៣ ឆ្នាំ ដែល​កំពុង​នាំ​កូនស្រី​របស់​គាត់​ទៅ​មើល​ការសម្តែង​របស់​តារាចម្រៀង ហា​រី ស្តាយ (Harry Styles) នៅឯ​ការប្រគុំ​តន្ត្រី ដែល​គ្រោង​ធ្វើ​នៅ​យប់​ថ្ងៃអាទិត្យ​នៅ​ជិត​ផ្សារ​ទំនើប​នេះ បាន​និយាយថា “​វា​ពិតជា​គួរ​ឱ្យ​ភ័យខ្លាច​ខ្លាំងណាស់​។​អ្នក​ប្រហែលជា​ឆ្ងល់​ថា​តើ​មនុស្ស​អាច​ធ្វើ​បែប​នេះ​ចំពោះ​​មនុស្ស​ផ្សេង​ទៀត​បាន​ដោយ​របៀប​ណា ប៉ុន្តែ​វា​ហួស​…​ហួស​ពីអ្វី​ដែល​អាច​ធ្វើទៅបាន​”​។​

​លោក​ថូ​ម៉ាស​សិន​បាន​និយាយថា ជនរងគ្រោះ​រួមមាន​បុរស​ម្នាក់​អាយុ​ខ្ទង់ ៤០ ឆ្នាំ និង “​មនុស្ស​វ័យក្មេង​” ពីរ​នាក់ ដោយ​មិន​បាន​ផ្តល់​ព័ត៌មាន​លម្អិត​ទេ​។ លោក​បន្តថា មនុស្ស​ជាច្រើន​នាក់​បាន​រងរបួស ក្នុងនោះ​មាន​បី​នាក់​របួសធ្ងន់​៕

​រថយន្ត​សង្គ្រោះ​និង​ប៉ូលិស​មកដល់​មុខ​ផ្សារ​ទំនើប Field’s ក្រោយ​ការបាញ់ប្រហារ

​នៅពេលដែល​ការបាញ់ប្រហារ​បានកើត​ឡើង មនុស្ស​មួយចំនួន​បាន​លាក់ខ្លួន​នៅក្នុង​ហាង ខណៈ​អ្នក​ផ្សេង​ទៀត​រត់គេច​ខ្លួន​ទាំង​ភ័យ​ស្លន់ស្លោ​និង​ជាន់គ្នា​