​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ មន្ត្រី​រដ្ឋាភិបាល​បាន​និយាយថា មនុស្ស ១៩​នាក់​បាន​ស្លាប់ និង​១២ នាក់​ផ្សេងទៀត​បាន​រងរបួស នៅពេល​ដែល​រថយន្តក្រុង​ដឹក​អ្នកដំណើរ​បាន​រអិល​ចេញពី​ផ្លូវ​លើ​ភ្នំ ហើយ​ធ្លាក់​ចូលទៅក្នុង​ជ្រោះ​ជ្រៅ​មួយ​ក្នុងពេល​កំពុង​មាន​ភ្លៀង​ធ្លាក់​ខ្លាំង​នៅ​ភាគ​និរតី​ប្រទេស​ប៉ា​គី​ស្ថាន​កាលពី​ថ្ងៃអាទិត្យ​ទី​៣​កក្កដា​។​

​លោក​ម៉ា​ថា​ប់ សា (Mahtab Shah) ជំនួយការ​រដ្ឋបាល​ស្រុក​មួយ​ក្នុង​ខេត្ត​បា​លូ​គី​ស្ថាន (Baluchistan) បាន​និយាយថា អ្នកដំណើរ​ប្រហែល ៣៥ នាក់​បាន​ជិះ​នៅលើ​ឡានក្រុង​នោះ​។ ក្រុម​អ្នក​​ជួយសង្គ្រោះ​កំពុង​ស្វែងរក​អ្នក​នៅ​រស់​ក្នុង​រថយន្ត​ខូច​ខ្ទេចខ្ទី​នេះ​និង​តំបន់​ជុំវិញ​។​

​លោក​សាបាន​និយាយថា រថយន្តក្រុង​ទំនង​ជា​រអិល​លើផ្លូវ​សើម ចំ​ពេល​មាន​ភ្លៀង​ធ្លាក់​ខ្លាំង ហើយ​អ្នកបើកបរ​បាន​បាត់បង់​ការគ្រប់គ្រងរ​ថយ​ន្ត ដែល​បាន​ធ្លាក់​ចូល​ទៅ​ក្នុង​ជ្រោះ​ជម្រៅ ៦១ ម៉ែត្រ​។​

​គ្រោះថ្នាក់​ចរាចរណ៍​សាហាវៗ​គឺជា​រឿង​ធម្មតា​នៅ​ក្នុងប្រទេស​ប៉ា​គី​ស្ថាន ដោយសារ​តែ​ហេដ្ឋារចនាសម្ពន្ធ​ផ្លូវ​ថ្នល់​អន់​និង​ការមិន​គោរព​ច្បាប់​ចរាចរណ៍ ក៏ដូចជា​យានយន្ត​ថែទាំ​មិនបាន​ល្អ​។​

​គួរ​រំលឹក​ដែរ​ថា​កាលពី​ខែ​មុន មនុស្ស​២២​នាក់​បាន​ស្លាប់​ក្នុង​ឧបទ្ទវហេតុ​ស្រដៀង​គ្នា​នេះ នៅ​ពេល​រថយន្ត​ក្រុង​មួយ​បាន​ធ្លាក់​ចូល​ជ្រោះ​ក្នុងស្រុក​គី​ឡា​សៃ​ហ្វូល​ឡា (Qila Saifullah)៕

​អ្នក​សង្គ្រោះ​កំពុង​ឈរ​ក្បែរ​រថយន្តក្រុង​ដែល​រង​ការខូចខាត​ពី​ការបើក​ធ្លាក់​ជ្រោះ​