​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ បណ្តា​ប្រទេស​នៅ​ទូទាំង​អាស៊ី​កំពុង​ចាត់​វិធានការ​ដើម្បី​ដោះស្រាយ​អតិផរណា​ដែល​កំពុង​កើនឡើង​ខ្ពស់​ខណៈ​ការ​លុកលុយ​របស់​រុស្ស៊ី​លើ​អ៊ុយ​ក្រែន​នៅតែ​បន្ត​​មាន​ឥទ្ធិពល​ដូមី​ណូ (Domino) លើ​ខ្សែ​សង្វាក់​ផ្គត់ផ្គង់ ដែល​ត្រូវបាន​រំខាន​រួចជាស្រេច​ចំ​ពេល​មាន​ជំងឺ​រាតត្បាត​។​

​នៅក្នុង​ប្រទេស​ម៉ាឡេស៊ី កន្លែង​ដែល​អតិផរណា​ស្បៀងអាហារ​ស្ថិតក្នុង​កម្រិត​ខ្ពស់​បំផុត​ក្នុង​រយៈពេល​១១ ឆ្នាំ​នៅ​កម្រិត ៥,២ ភាគរយ នាយករដ្ឋមន្ត្រី អ៊ី​ស្មា​អ៊ី​ល សា​ព្រី យ៉ា​កូប (Ismail Sabri Yaakob) បាន​និយាយ​កាលពី​ថ្ងៃអាទិត្យ ទី ០៣ កក្កដា​ថា រដ្ឋាភិបាល​កំពុង​ចាត់​វិធានការ​ដើម្បី​ដោះស្រាយ​ការកើនឡើង​ថ្លៃ​រស់នៅ​។​

​រដ្ឋាភិបាល​នឹង​ចំណាយ​ប្រាក់ ៧០ ពាន់​លាន​រីង​ហ្គី​ត (២២ ពាន់​លាន​ដុល្លារ​) លើ​ការឧបត្ថម្ភ​ធន​នៅ​ឆ្នាំនេះ ដែល​ជា​កញ្ចប់​គាំទ្រ​ខ្ពស់​បំផុត​របស់​ប្រទេស​ក្នុង​ប្រវត្តិសាស្ត្រ​ដើម្បី​ទប់ស្កាត់​ការកើនឡើង​នៃ​ថ្លៃ​សាំង​ ប្រេងម៉ាស៊ូត ហ្គាស ប្រេង​ចម្អិន​អាហារ ម្សៅ និង ថ្លៃ​អគ្គិសនី​។​

​ប្រាក់​ជាង ៧០០ លាន​រីង​ហ្គី​តត្រូវ​បានប​ម្រុង​ទុក​ដើម្បី​រក្សា​តម្លៃ​សាច់​មាន់​ឱ្យ​នៅ​ត្រឹម ៩,៤០ រីង​ហ្គី​ត​ក្នុង​មួយ​គីឡូក្រាម ខណៈ​ការឧបត្ថម្ភ​ធន​ប្រេង​ចម្អិន​អាហារ​ចំនួន ៤​ពាន់​លាន​រីង​ហ្គី​ត​គឺ​ជិត​ស្មើ​ពីរ​​ដង​នៃ​ការឧបត្ថម្ភ​ធន ២ ពាន់​លាន​រីង​ហ្គី​ត​កាលពី​ឆ្នាំមុន​។​

​បន្ទាប់​ពី​ការ​ចែក​លុយ​សុទ្ធ​ចំនួន​ពីរ​លើក​ដល់​ក្រុមគ្រួសារ​ដែល​មាន​ចំណូល​ទាប លោកនាយក​រដ្ឋមន្ត្រី​អ៊ី​ស្មា​អ៊ី​ល​កាលពី​ថ្ងៃអាទិត្យ​បានចង្អុលបង្ហាញ​ថា ប្រហែលជា​មាន​ការ​ចែក​លុយ​ជូន​ជា​លើក​ទី​បី​។​

– ប្រទេស​ថៃ​

​អតិផរណា​របស់​ថៃ​គឺ​ស្ថិតក្នុង​កម្រិត​ខ្ពស់​បំផុត​ក្នុង​រយៈពេល ១៤ ឆ្នាំ ដោយ​បាន​ឆ្លង​ផុត​កម្រិត ៧ ភាគរយ​កាលពី​ខែ​ឧសភា​។​

​ក្រុមប្រឹក្សា​សន្តិសុខ​ជាតិ (NSC) ត្រូវ​គេ​រំពឹងថា​នឹង​បង្កើត​ក្រុម​អ្នកជំនាញ​ពិសេស​មួយ​ដើម្បី​ដោះស្រាយ​វិបត្តិ​ប្រេងឥន្ធនៈ​និង​ស្បៀងអាហារ​របស់​ប្រទេស​នេះ នៅ​ពេល​ពួកគេ​ប្រជុំ​នៅ​ថ្ងៃ​ចន្ទ​នេះ​។​

​អគ្គលេខាធិការ NSC លោក ស៊ូ​ផុត ម៉ា​ឡា​នី​យ៉ុម (Supot Malaniyom) បាន​និយាយថា ក្រុមការងារ​និង​ទីភ្នាក់ងារ​ពាក់ព័ន្ធ​នឹង​ដោះស្រាយ​វិបត្តិ​ជា​បី​ដំណាក់កាល​រហូតដល់​ដំណាច់​ឆ្នាំ​ក្រោយ​។ វា​នឹង​មាន​ការផ្តោត​ជាពិសេស​លើ​ការកើនឡើង​ថ្លៃ​ប្រេងឥន្ធនៈ ដែល​កំពុង​ប៉ះពាល់​ដល់​វិស័យ​ដឹកជញ្ជូន​និង​អតិផរណា​កាន់តែ​អាក្រក់​។​

​លោក​បាន​និយាយប្រាប់​វេបសាយ The Nation ថា “NSC នឹង​ផ្តោត​លើ​ស្ថិរភាព​ដើម្បី​ទប់ស្កាត់​ភាពខ្វះខាត​”​។​

​រដ្ឋមន្ត្រី​ក្រសួង​ហិរញ្ញវត្ថុ លោក អា​ខុម តឺម​ភីតា​យ៉ាប៉ៃ​ស៊ីត (Arkhom Termpittayapaisith)​បាន​និយាយ​កាលពី​ថ្ងៃ​សៅរ៍​សប្តាហ៍​មុន​ថា​រដ្ឋាភិបាល​នឹង​ស្វែងរក​ការដំឡើង​ប្រាក់​ឈ្នួល​សម្រាប់​​និយោជិត​ក្នុង​វិស័យ​ឯកជន​ដើម្បី​ជួយ​ពួកគេ​ទប់ទល់​នឹង​ការកើនឡើង​ការចំណាយ​។​

​លោក​អា​ខុម​បាន​និយាយថា អតិផរណា​របស់​ថៃ​នឹង​នៅតែ​មាន​កម្រិត​ខ្ពស់​សម្រាប់​រយៈពេល​នៅសល់​នៃ​ឆ្នាំ​នេះ​។ លោក​បន្តថា “​សេដ្ឋកិច្ច​ថៃ​កំពុង​រង​ផលប៉ះពាល់​មិន​ត្រឹមតែ​ពី​កូវី​ដ​១៩ ប៉ុណ្ណោះ​ទេ​ប៉ុន្តែ​​ថែម​ទាំង​អតិផរណា​ខ្ពស់​ដែល​បណ្តាល​មក​ពី​សង្គ្រាម​អ៊ុយ​ក្រែន​ទៀតផង​។ អតិផរណា​នៅ​ឆ្នាំ​នេះ​ទំនងជា​មិន​ធ្លាក់ចុះ​ដល់​កម្រិត​ដែល​ធ្លាប់​ឃើញ​ជាច្រើន​ឆ្នាំ​កន្លងមក​នោះទេ​”​។​

​ធនាគារកណ្តាល​ថៃ​ត្រូវ​គេ​រំពឹងថា​នឹង​ដំឡើង​អត្រា​ការប្រាក់​គោលនយោបាយ​របស់​ខ្លួន ដែល​បច្ចុប្បន្ន​មាន​ត្រឹម ០,៥ ភាគរយ នៅ​ខែ​ក្រោយ​។​

– កូរ៉េខាងត្បូង​

​នៅក្នុង​ប្រទេស​កូរ៉េខាងត្បូង រដ្ឋាភិបាល​បាន​បន្ថយពន្ធ​ពី ២២,៥ ភាគរយ​ទៅ ២៥ ភាគរយ​លើ​សាច់​ជ្រូក​នាំចូល​ចំនួន ៥០.០០០ តោន ចាប់ពី​ថ្ងៃ​ព្រហស្បតិ៍​សប្តាហ៍​មុន​។​

​វិធានការ​នេះ​ធ្វើឡើង​ដើម្បី​បញ្ចុះ​តម្លៃ​ផលិតផល​សាច់​ជ្រូក​ឱ្យ​បាន​២០​ភាគរយ​។​

​តម្លៃ​ជា​មធ្យម​នៃ​សាច់ជ្រូក​បាន​កើនឡើង​ជិត ១៥ ភាគរយ​កាលពី​ខែ​មុន​រហូត​ដល់ ២.៩១១ វ៉ុន (២,២៤ ដុល្លារ​) ក្នុង ១០០​ក្រាម​នេះ​បើ​យោង​តាម​ទិន្នន័យ​ពី​វិទ្យាស្ថាន​កូរ៉េ​សម្រាប់​ការវាយតម្លៃ​គុណភាព​​ផលិតផល​សត្វ​។​

​អ្នកឃ្លាំមើល​ឧស្សាហកម្ម​និយាយ​ថា​ការកើនឡើង​នៃ​តម្លៃ​សាច់ជ្រូក​ត្រូវបាន​រុញ​ដោយ​ការ​លុកលុយ​របស់​រុស្ស៊ី​លើ​អ៊ុយ​ក្រែន​ក៏ដូចជា​អតិផរណាផ​ង​ដែរ​។​

​មន្ត្រី​ម្នាក់​មក​ពី​សមាគម​សាច់ជ្រូក​កូរ៉េ បាន​និយាយថា “​ពោត​មាន​ចំនួន​ពាក់កណ្តាល​នៃ​ចំណី​ដែល​ប្រើប្រាស់​សម្រាប់​ជ្រូក​។ ប៉ុន្តែ​សង្គ្រាម​រវាង​ប្រទេស​ទាំង​ពីរ​ដែល​ជា​អ្នកផ្គត់ផ្គង់​ស្រូវ​សាលី​និង​ពោត​ដ៏​ធំ​​បំផុត​ទាំង​ពីរ បាន​នាំឱ្យ​មាន​ការខ្វះខាត​គ្រាប់​ធញ្ញជាតិ ដែល​បណ្តាល​ឱ្យ​តម្លៃ​ដំណាំ​សម្រាប់​ចំណី​សត្វ​កើនឡើង​ខ្ពស់​”​។​

​ពន្ធ​ក៏​ត្រូវបាន​ដក​ចេញ​ផងដែរ​លើ​ទំនិញ​ចំនួន​ប្រាំមួយ​មុខ​ផ្សេងទៀត រួម​ទាំង​ប្រេង​ផ្កា​ឈូករ័ត្ន និង​ស្រូវ​សាលី​រហូតដល់​ដំណាច់​ឆ្នាំ​នេះ ហើយ​បញ្ជី​នៃ​អាហារ​កែច្នៃ​សាមញ្ញៗ​ដូចជា​គីមឈី​ត្រូវបាន​លើកលែ​ង​ពី​ពន្ធ​លើ​តម្លៃ​បន្ថែម​។​

​ធនាគារ​កណ្តាល​របស់​កូរ៉េខាងត្បូង​បាន​ដំឡើង​អត្រា​ការប្រាក់​គោលនយោបាយ​របស់​ខ្លួន​ដល់ ១,៧៥ ភាគរយ​នៅក្នុង​ខែ​ឧសភា ដើម្បី​បន្ធូរបន្ថយ​អតិផរណា​ពី​កម្រិត​ខ្ពស់​បំផុត​ក្នុង​រយៈពេល ១៤ ឆ្នាំ​។​

​អតិផរណា​ទំនិញប្រើប្រាស់​នៅក្នុង​ខែ​ឧសភា​បាន​កើនឡើង​ដល់ ៥,៤ ភាគរយ​ដោយ​អត្រា​កាលពី​ខែ​មុន​រំពឹង​កើនឡើង​លើស​ពី ៦ ភាគរយ​។​

– ជប៉ុន​

​នៅ​ប្រទេស​ជប៉ុន តម្លៃ​ទំនិញប្រើប្រាស់​ស្នូល​បាន​ហក់​ឡើង ២,១ ភាគរយ​ធៀប​ឆ្នាំមុន​គិត​ត្រឹម​ខែឧសភា បន្ទាប់​ពី​កើនឡើង​ដូច​គ្នា​កាលពី​ខែ​មេសា​។​ការកើនឡើង​ថ្លៃ​ទំនិញ​នេះ​គឺ​ខ្ពស់បំផុត​ក្នុង​រយៈពេល​​ប្រាំពីរ​ឆ្នាំ​។​

​នាយករដ្ឋមន្ត្រី ហ្វ៊ុយ​មី​អូ គី​ស៊ី​ដា បាន​និយាយថា រដ្ឋាភិបាល​គ្រោង​នឹង​បន្ធូរបន្ថយ​ផល​ប៉ះពាល់​នៃ​ការកើនឡើង​តម្លៃ​អគ្គិសនី ដោយ​ផ្តល់​រង្វាន់​ដល់​ក្រុម​គ្រួសា​រណា​ដែល​សន្សំសំចៃ​ថាមពល​ដែល​អាច​ជួយ​​បន្ថយថ្លៃ​ប្រើប្រាស់​ភ្លើង​។​

​ក្រុមការងារ​របស់​រដ្ឋាភិបាល​បាន​ជួបប្រជុំ​គ្នា​ជា​លើកដំបូង​កាលពី​ខែ​មុន ដើម្បី​ដោះស្រាយ​អតិផរណា​។​

​វិធានការ​សង្គ្រោះបន្ទាន់​ដែល​មាន​តម្លៃ ១៣ ទ្រី​លាន​យ៉េន (​ជាង ៩៦ ពាន់​លាន​ដុល្លារ​) ដែល​មួយ​ផ្នែក​ត្រូវបាន​ផ្តល់​មូលនិធិ​ដោយ​វិស័យ​ឯកជន​នឹង​ត្រូវ​អនុវត្ត​ដើម្បី​ដោះស្រាយ​ជាមួយ​នឹង​ការកើនឡើង​​នៃ​តម្លៃ​ស្រូវ​សាលី ជី​រ ចំណី​សត្វ និង​ថាមពល​។​

– បង់​ក្លា​ដែស​

​នៅ​ប្រទេស​បង់​ក្លា​ដែស តម្លៃ​អង្ករ​ល្អ​បាន​កើនឡើង ៩ ភាគរយ​កាលពី​ខែ​មុន ខណៈ​ទឹកជំនន់​និង​អាកាសធាតុ​មិន​អំណោយផល​នៅ​ផ្នែក​ខ្លះ​នៃ​ប្រទេស​បាន​ប៉ះពាល់​ដល់​ទិន្នផល​ដំណាំ​។​

​រដ្ឋាភិបាល​បាន​ផ្តល់​ការអនុញ្ញាត​ឱ្យ​ក្រុមហ៊ុន​ម្ហូបអាហារ​ចំនួន ៩៥ នាំចូល​អង្ករ​ចំនួន ៤០៩.០០០ តោន​នៅត្រឹម​ពាក់កណ្តាល​ខែ​សីហា​ដើម្បី​ធ្វើឱ្យ​តម្លៃ​ធ្លាក់ចុះ​វិញ​។​

​ពន្ធ​នាំចូល​អង្ករ​ចន្លោះ​ពី​ថ្ងៃទី ២២ ខែ​មិថុនា​ដល់​ថ្ងៃទី ៣១ ខែតុលា នឹង​ត្រូវ​កាត់បន្ថយ​ពី ៦២,៥ ភាគរយ​មក​មក​នៅត្រឹម ២៥,៧៥ ភាគរយ​។​

– ប៉ា​គី​ស្ថាន​

​នៅក្នុង​ប្រទេស​ប៉ា​គី​ស្ថាន អតិផរណា ដែល​វាស់វែង​ដោយ​ស​ន្ទ​ស្សន៍​តម្លៃ​ទំនិញ​ប្រើប្រាស់ បាន​កើនឡើង​ដល់ ២១,៣ ភាគរយ​កាលពី​ខែ​មុន ដែល​ជា​កម្រិត​ខ្ពស់​បំផុត​ក្នុង​រយៈពេល​ជាង ១៣ ឆ្នាំ​។​

​ប្រេងឥន្ធនៈ អ៊ីដ្រូកាបូន​រាវ និង​ថ្លៃ​អគ្គិសនី​បាន​កើន​ឡើង​ខ្លាំង​បំផុត​ធៀប​នឹង​ឆ្នាំ​មុន ដោយ​តម្លៃ​ប្រេងឥន្ធនៈ​កើនឡើង​យ៉ាងហោចណាស់ ៩៥ ភាគរយ​។​

​តម្លៃ​ប្រេងឥន្ធនៈ​បាន​កើនឡើង​បន្ថែម​ទៀត​កាលពី​ថ្ងៃ​ព្រហស្បតិ៍​សប្តាហ៍​មុន ព្រោះ​រដ្ឋាភិបាល​បាន​ដំឡើង​ពន្ធ​លើ​ប្រេងឥន្ធនៈ ដើម្បី​កាត់បន្ថយ​ឱនភាព​សារពើពន្ធ​របស់​ខ្លួន​។​

​ដោយ​ដកស្រង់​របាយការណ៍​ស្រាវជ្រាវ​ដោយ​ក្រុមហ៊ុន​ឈ្មួញ​ជើងសា​ប៉ា​គី​ស្ថាន Topline Securities ទីភ្នាក់ងារ​សារព័ត៌មាន​រ៉​យ​ទ័របាន​រាយការណ៍​ថា ការដំឡើង​អត្រា​ការប្រាក់​គោលនយោបាយ​ដោយ​ធនាគារកណ្តាល​ក៏​ត្រូវ​បាន​រំពឹងទុក​ផងដែរ​នៅពេល​ដែល​ធនាគារ​កោះប្រជុំ​ក្នុង​សប្តាហ៍​នេះ​។​

​ធនាគារ​រដ្ឋ​ប៉ា​គី​ស្ថាន​បាន​ដំឡើង​អត្រា​គោលនយោបាយ​រួច​ហើយ​គឺ ៤០០ ពិន្ទុ​មូលដ្ឋាន​នៅ​ឆ្នាំ​នេះ​៕

​ម៉ាឡេស៊ី​ឧបត្ថម្ភ​ធន​ប្រេង​ចម្អិន​អាហារ​ចំនួន ៤ ពាន់​លាន​រីង​ហ្គី​ត​នៅ​ឆ្នាំនេះ​