​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ លោក បូ​វី វូ (Bowie Wu) ដែល​គ្រប់​គ្នា​បាន​ស្គាល់​នៅក្នុង​រឿង​ភាគ​ហុងកុង​នោះ ប្រហែល​ឈាន​ចូល​វ័យ ៩០​ឆ្នាំ​កាល​ពី​ខែ​មករា​ក៏ពិតមែន​ប៉ុន្តែ​មើល​ទៅ​មិន​​ចាស់​ដូច​អាយុ​សោះ​។​

​នៅក្នុង​ការបង្ហាញ​ខ្លួន​នា​ពេល​ថ្មីៗ​នេះ​ក្នុង​កម្មវិធី​ទូរទស្សន៍​ហុងកុង តារា​សម្តែង​រូបនេះ​បាន​វាយតម្លៃ​សុខភាព​ល្អ​របស់​គាត់​គឺ​បាន​ដោយសារ​ការដើរ ដែល​ជា​ទម្លាប់​មួយ​គាត់​បាន​អនុវត្ត​តាំងពី​អាយុ ២១ ឆ្នាំ​។​

​គាត់​បាន​និយាយថា ទម្លាប់​ដើរ​បាន​ចាប់ផ្តើម​នៅពេល​ដែល​គាត់​ឃើញ​បុរស​វ័យ​កណ្តាល​ម្នាក់​ដើរ​ដោយ​មាន​ជំនួយ​ពី​គិលានុបដ្ឋាយិកា​។ ជា​ច្រើន​ខែ​ក្រោយ​មក គាត់​បាន​ឃើញ​បុរស​ដដែល​ដើរ​ម្តងទៀត ប៉ុន្តែ​លើក​នេះ​មិន​មាន​អ្នក​ជួយ​ទេ​។​

​នៅ​ពេល​ចូល​ទៅ​សួរ បុរស​នោះ​បាន​និយាយថា អាថ៌កំបាំង​សុខ​ភាព​ប្រសើរ​ឡើង​វិញ​របស់​គាត់​គឺ​ត្រូវ​មាន​ទម្លាប់​ដើរ​ឱ្យ​បាន​ច្រើន ដែល​វា​ជា​ជម្រើស​នៃ​របៀប​រស់នៅ​មួយ​ដែល​លោក​វូ​ត្រងត្រាប់​តាម​រហូត​​មក​។​

​លោក​វូ​បាន​និយាយថា “​ខ្ញុំ​ដើរ​រាល់ថ្ងៃ​និង​ធ្វើ​លំ​ហាត់ប្រាណ​រាងកាយ​។ ខ្ញុំ​ដើរ​យ៉ាងហោចណាស់​មួយ​ម៉ោង​ឬ​ពីរ​ម៉ោង​ក្នុង​មួយថ្ងៃ​។ ពេល​ខ្លះ​ខ្ញុំ​ច្រៀង​ពេល​ខ្ញុំ​ដើរ រលាក់​ដៃ​ជើង​ហើយ​ជារឿយៗ​ធ្វើ​ចលនា​រាង​​កាយ​របស់ខ្ញុំ និង​ដើរ​ដើម្បី​ជំរុញ​ចលនា​ឈាម​រត់​”​។​

​លោក​វូ ដែល​បាន​ចាប់ផ្តើម​អាជីព​សម្តែង​ក្នុង​ទសវត្សរ៍​ឆ្នាំ ១៩៥០ បាន​បង្ហាញ​ខ្លួន​នៅក្នុង​ខ្សែភាពយន្ត​ហុងកុង​ជាច្រើន រួម​ទាំង​ការ​ដើរតួ​ជា​មេ​ប៉ូលិស​ក្នុង​រឿង The Haunted Cop Shop (១៩៨៧) រួមជាមួយ ជែក​គី ចឿង (Jacky Cheung) និង​តារា​ស្លាប់ទៅ រីក​គី ហ៊ុយ (Ricky Hui)៕

​លោក បូ​វី វូ អាយុ ៩០ ឆ្នាំ​ហើយ​នៅតែ​មាន​សុខភាព​ល្អ ដោយសារ​ដើរ​ច្រើន​