ដោយៈ ឆាំង យុ នាយក​មជ្ឈមណ្ឌល​ឯកសារ​កម្ពុជា​/ភ្នំពេញ៖មជ្ឈមណ្ឌល​ឯកសារ​កម្ពុជា ប្តេជ្ញា​ផ្តល់​សិទ្ធិអំណាច​ដល់​អ្នក​រស់​រាន​មានជីវិត​ពីរ​បប​ខ្មែរក្រហម ក្រុមគ្រួសារ សហគមន៍ និង​សាធារណជន ជាមួយនឹង​ការទទួលបាន​ព័ត៌មាន​កាន់តែច្រើន​អំពី​ប្រវត្តិសាស្ត្រខ្មែរក្រហម​។ ជាមួយគ្នានេះដែរ មជ្ឈមណ្ឌល​ឯកសារ​កម្ពុជានៅតែ​បន្តធ្វើ​ឲ្យ​បណ្ណសារ​របស់ខ្លួន​កាន់តែ​អាច​ចូល​ប្រើប្រាស់​បាន​ទូលំទូលាយ​តាមរយៈ​ប្រព័ន្ធ​អន​ឡាញ​។ មជ្ឈមណ្ឌល​ឯកសារ​កម្ពុជា ក៏​កំពុង​ធ្វើ​ឲ្យ​បណ្ណសារដ្ឋាន​រូបវ័ន្តរ​បស់​ខ្លួន​កាន់តែ​អាច​ចូល​ប្រើប្រាស់​បាន​ដោយផ្ទាល់​ផងដែរ​។​

ដោយៈ ឆាំង យុ នាយក​មជ្ឈមណ្ឌល​ឯកសារ​កម្ពុជា(រូបថតឯកសារ)

​មជ្ឈមណ្ឌល​ឯកសារ​កម្ពុជា មាន​មោទកភាព​ក្នុងការ​ប្រកាស​ជា​ផ្លូវការ​នូវ​ការបើក​ដំណើរការ​មជ្ឈមណ្ឌល​ប្រចាំ​តំបន់​ទាំង​ប្រាំរបស់ខ្លួន ដែល​តំណាង​ឲ្យ​បណ្តាញ​មជ្ឈមណ្ឌល​ឯកសារ​កម្ពុជា​នៅ​ទូទាំងប្រទេស​។​

ការបង្កើត​មជ្ឈមណ្ឌល​ប្រចាំ​តំបន់​ទូទាំងប្រទេស ស្របតាម​បំណងប្រាថ្នា​របស់​ជនរ​ង​គ្រោះ​ពីរ​បប​ខ្មែរក្រហម ដែល​ចង់ឃើញ​នូវ​ធនធាន​លើ​បទពិសោធន៍ និង​រឿងរ៉ាវ​នៃ​សម័យកាល​ប្រវត្តិសាស្ត្ររ​បស់​ពួកគេនៅ​គ្រប់​តំបន់​នៃ​ប្រទេស​កម្ពុជា​។​

​មជ្ឈមណ្ឌល​នៅតាម​សហគមន៍​មិន​ត្រឹមតែ​ផ្តល់នូវ​ការរៀបចំ​ដ៏​សម្បូរបែប​នៃ​ធនធាន​ពហុ​ប្រព័ន្ធ​ផ្សព្វផ្សាយ​សម្រាប់​ការអប់រំ និង​ការស្រាវជ្រាវ​ប៉ុណ្ណោះ​ទេ មជ្ឈមណ្ឌល​នៅតាម​សហគមន៍​ក៏​បម្រើ​ជាទី​តាំង​ប្រជុំ​ដ៏​សំខាន់​សម្រាប់​វេទិកា​សហគមន៍ ការធ្វើ​បទ​បង្ហាញ​របស់​វាគ្មិន សន្និសីទ ការពិនិត្យ​សៀវភៅ​ឡើងវិញ ការតាំងពិព័រណ៍​សិល្បៈ និង​តន្ត្រី ព្រមទាំង​ព្រឹត្តិការណ៍​វប្បធម៌​ផ្សេងៗ​ទៀត​។ មជ្ឈមណ្ឌល​ឯកសារ​កម្ពុជា ក៏បាន​បង្កើត​អង្គភាព​សេវាកម្ម​យុវជន​ស្ម័គ្រចិត្ត​មួយ​ដែលមាន​ឈ្មោះថា ក្រុម​អ្នកស្ម័គ្រចិត្ត​កម្ពុជា ដើម្បី​បង្កើន​ភាពងាយស្រួល និង​ផ្សព្វផ្សាយ​កិច្ចការ​របស់​មជ្ឈមណ្ឌល​ដល់​សហគមន៍​មូលដ្ឋាន​។ ក្រុម​អ្នកស្ម័គ្រចិត្ត​កម្ពុជា ទាញយក​ការ​បំផុសគំនិត​របស់ខ្លួន​ពី​ក្រុម​អ្នកស្ម័គ្រចិត្ត​អាមេរិក (AmeriCorps) ដែលជា​អង្គភាព​សេវាកម្ម​យុវជន​ស្ម័គ្រចិត្ត​នៅ​សហរដ្ឋអាមេរិក ដែល​ឧទ្ទិស​ដល់​ការអភិវឌ្ឍន៍​ភាពជា​អ្នកដឹកនាំ និង​ជំនាញ​វិជ្ជាជីវៈ​របស់​អ្នកស្ម័គ្រចិត្ត ដល់​ការកសាង និង​កែលម្អ​សហគមន៍​ឡើងវិញ​។ មជ្ឈមណ្ឌល​នីមួយៗ​មាន​អ្នកស្ម័គ្រចិត្ត​ចំនួន​ពី ៥​នាក់ ទៅ ១០ នាក់​ដែល​ត្រូវបាន​ជ្រើសតាំង ហើយ​នៅ​ទូទាំងប្រទេស មជ្ឈមណ្ឌល​ឯកសារ​កម្ពុជា មាន​ក្រុម​អ្នកស្ម័គ្រចិត្ត​កម្ពុ​ជាជាង ៥00 នាក់ ដើម្បី​ជួយ​ដល់​អ្នក​រស់រានមានជីវិត​ចំពោះ​ទម្លាប់​នៃ​ការរស់នៅ​ប្រចាំថ្ងៃ ប្រមូល​ប្រវត្តិ​ផ្ទាល់មាត់ និង​ធ្វើការ​ស្រាវជ្រាវ​អំពី​ប្រវត្តិ​សហគមន៍​មូលដ្ឋាន​។​


មន្រ្តីអង្គការសហប្រជាជាតិចូលរួមពិធីសម្ពោធខ្សែភាពយន្តឯកសារឆ្មាំព្រៃ។(បណ្ណសារមជ្ឈមណ្ឌលឯកសារកម្ពុជា)

​មជ្ឈមណ្ឌល​ឯកសារ​កម្ពុជា បន្តធ្វើ​ការងារ​លើ​ការបង្កើន​ធនធាន​ដែលមាន​នៅក្នុង​មជ្ឈមណ្ឌល​នីមួយៗ និង​ការបង្កើត​មជ្ឈមណ្ឌល​ប​ន្ថែ​ម​នៅក្នុង​តំបន់​ផ្សេងទៀត​។​​មជ្ឈមណ្ឌល​នៅតាម​ខេត្ត​ទាំង​៥ រួមមាន​៖ ១) មជ្ឈមណ្ឌល​សន្តិភាព​អន្លង់វែង
,២) មជ្ឈមណ្ឌល​ឯកសារ​ខេត្តព្រៃវែង ,៣) មជ្ឈមណ្ឌល​ឯកសារ​ខេត្តកំពង់ចាម ,៤) មជ្ឈមណ្ឌល​ឯកសារ​កោះ​ថ្ម និង
៥) មជ្ឈមណ្ឌល​ឯកសារ​ខេត្តតាកែវ​។
​សា​ធារ​ជន​ចូល​ប្រើប្រាស់​បណ្ណសារ​ឌីជីថល​របស់​មជ្ឈមណ្ឌល​ឯកសារ​កម្ពុជា សូម​ទាក់ទង​ទង ៖ រស់ សំពៅ​, អ៊ី​ម៉ែ​ល ៖ [email protected] សា​ធារ​ជន​ចូល​អាន​ឯកសារ​នៅ បណ្ណាល័យ​សម្តេចម៉ែ សូម​ទាក់ទង ៖ សុភ័ក្ត្រ ភា​ណា​, អ៊ី​ម៉ែ​ល [email protected]​៕សរន

 សិស្សានុសិស្សទស្សនកិច្ចចេតិយរំឭកវិញ្ញាណក្ខន្ធជនរងគ្រោះពីរបបខ្មែរក្រហមនៅឃុំគគរ ស្រុកកំពង់សៀម ខេត្តកំពង់ចាម។(បណ្ណសារមជ្ឈមណ្ឌលឯកសារកម្ពុជា)

 

ពីឆ្វេងទៅស្តាំ៖ឡូហ្គោកម្មវិធីអភិវឌ្ឍន៍សហប្រជាជាតិ។ ឡូហ្គោសហគមន៍អឺរ៉ុប។ឡូហ្គោទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ។(បណ្ណសារមជ្ឈមណ្ឌលឯកសារកម្ពុជា)