ដោយ​៖ រ៉ា​ម៉ន / ភ្នំពេញ​៖ នៅ​ព្រឹក​ថ្ងៃទី ៤ ខែកក្កដា ឆ្នាំ​២០២២ នេះ នា​បរិវេណ មន្ទីរពេទ្យ បង្អែក​ច្បារអំពៅ សាខា​កាកបាទក្រហមកម្ពុជា រាជធានី​ភ្នំពេញ ដឹកនាំ​ដោយ​លោក ជិន ប៊ុនធឿន នាយក​ប្រតិបត្តិ​សាខា តំណាង​លោក ឃួ​ង ស្រេង អភិបាល​រាជធានី និង​ជា​ប្រធាន គណៈកម្មាធិការ​សាខា និង​ជា ប្រធាន​ក្រុមការងារ ឥស្សរជន​ឆ្នេ​ី​ម​ថ្នាក់ជាតិ ថ្នាក់​សាខា រាជធានី​ភ្នំពេញ បានរៀបចំ​ពិធី​អប់រំ​ផ្សព្វផ្សាយ សារលិខិត​របស់ សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទ ក្រហម​កម្ពុជា និង​ជា​ឥស្សរជន​ឆ្នើម​ថ្នាក់ជាតិ នៃ​ផែនការ​សកម្មភាព រួម​អគ្គលេខា ធិ​ការ អង្គការសហប្រជាជាតិ ដើម្បី​សុខភាព​ស្ត្រី និង​កុមារ ផ្ញើជូន​បង​-​ប្អូន​ជនរួមជាតិ ក្នុង​ទិវា​ឆ្មប​ជាតិ ៥ ឧសភា ឆ្នាំ​២០២២ ក្រោម​ប្រធានបទ ” វិនិយោគ​លើ​ឆ្មប ដើម្បី​ពង្រឹង​ការថែទាំ​សុខភាព​បឋម សំដៅ​ឈានទៅដល់ ការ​គ្រប់​ដណ្តប់ សុខភាព​ជាស​កល ” ជូន​ដល់​ស្ត្រី​មាន​ផ្ទៃពោះ ស្ត្រី​មានកូន​តូច និង​ស្ត្រី​ក្រោយ សម្រាលកូន ចំនួន ៣២ នាក់​។

​នាឱកាស​នោះ ក្នុងនាម​លោក ឃួ​ង ស្រេង ប្រធាន​គណៈកម្មាធិការ សាខា​រាជធានី ភ្នំពេញ លោក ជិន ប៊ុនធឿន បាន​ពាំ​នាំនូវ​ការ​ផ្តាំផ្ញើ​សាកសួរ​សុខទុក្ខ ពី​សំណាក់ សម្តេច​កិត្តិ​ព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហមកម្ពុជា និង​ជា ឥស្សរជន​ឆ្នើម​ថ្នាក់ជាតិ នៃ​ផែនការ​សកម្មភាព​រួម អគ្គលេខាធិការ អង្គការ​សហ ប្រជាជាតិ ដើម្បី​សុខភាព​ស្ត្រី និង​កុមារ ជូន​ដល់​បងស្រី ប្អូនស្រី​ជា​មាតា​ទាំងអស់ ប្រកបដោយ​ក្តី​នឹករលឹក​។​

​លោកនាយក​ប្រតិបត្តិ​សាខា ក៏បាន​ផ្សព្វផ្សាយ​ពី​សារលិខិត​របស់ សម្តេច​កិត្តិ​ព្រឹទ្ធ បណ្ឌិត ដែល​ពោរពេញ​ទៅដោយ​អត្ថន័យ និង​ខ្លឹមសារ​យ៉ាងសំខាន់ ក្នុងនោះ សម្តេច​ប្រធាន បាន​កោតសរសើរ និង​ថ្លែងអំណរគុណ ដល់​ឆ្មប​កម្ពុជា​ទាំងអស់ ដែល​លះបង់​គ្រប់បែបយ៉ាង ដើម្បី​រក្សាបាន​ការថែទាំ​សុខភាព ជូន​ស្ត្រី​ទូទៅ ស្ត្រី​មាន​ផ្ទៃពោះ ទារក និង​កុមារ ឱ្យមាន​ដំណើរការ​ល្អជា​ប្រចាំ ព្រមទាំង​បាន អំពាវនាវ សូមឱ្យ​ឆ្មប​ទាំងអស់​បន្ត​អនុវត្ត​ការងារ ដូចជា (១)-​ផ្តល់​ប្រឹក្សា​អប់រំ​ដល់ បុរស នារី ដែល​ជិត​រៀបការ អំពី​សុខភាព​បន្ត​ពូជ ការបង្ការ​ជំងឺឆ្លង ពិសេស​ទប់ ស្កាត់​ជំងឺឆ្លង​នានា ពី​ម្តាយ​ទៅ​កូន ។ (២)-​ផ្តល់​សេវា​ថែទាំ ក្នុងពេល​មាន​ផ្ទៃពោះ បង្ការ និង​រកឃើញ​ទាន់ពេលវេលា នូវ​ផលវិបាក​នានា​។ (៣)-​ផ្តល់​សេវា​ថែទាំ ក្នុងពេល​ឈឺពោះ​សម្រាលកូន និង​ការថែទាំ​ក្រោយ​សម្រាល ។ (៤)-​ផ្តល់​សេវា ពន្យារកំណើត និង​សេវា​ចាំបាច់​ដទៃទៀត ដែល​ពាក់ព័ន្ធ​នឹង​ការងារ​ឆ្មប ។

​ជាមួយគ្នានេះ សម្តេច​ប្រធាន ក៏បាន​អំពាវនាវ​ដល់​ស្ត្រី​មាន​ផ្ទៃពោះ​ទាំងអស់ សូម​ទៅពិនិត្យ សុខភាព តាម​កាលកំណត់​របស់​គ្រូពេទ្យ​, សូម​ទៅ​សម្រាលកូន នៅ​មណ្ឌល​សុខភាព ឫ​មន្ទីរពេទ្យបង្អែក​, ត្រូវ​ពិនិត្យ​តាមដាន​សុខភាព ក្រោយ​សម្រាល និង​យក​ទារក ទៅ​ចាក់​ថ្នាំ​បង្ការ ១១ មុខ តាម​កាលកំណត់ និង​យក​កូន​ទៅ​មន្ទីរពេទ្យ​ជិត​បំផុត ឱ្យបាន​ឆាប់ នៅពេល​ទារក ឬ​កូនតូច​គ្រុនក្តៅ ឬ​មាន​អា​ការៈខុស​ប្រ​ក្រ​ត្រី ឬ​ពិបាក​ដកដង្ហើម​។​

​សូមបញ្ជាក់ថា ស្ត្រី​មាន​ផ្ទៃពោះ ស្ត្រី​មានកូន​តូច និង​ស្ត្រី​ក្រោយ​សម្រាលកូន ដែល​បាន​ចូលរួម ចំនួន ៣២​នាក់ ក្នុង​១​នាក់ៗ ទទួលបាន​កន្សែងពោះគោ​ធំ​១ កន្សែង​ជូត​ខ្លួន​ទារក​១ មុង​១ ភួយ​១ សារុង​១ សាប៊ូ​២​ដុំ ជែ​ល​លាងដៃ ២​ដប ម៉ាស ២០​បន្ទះ អាល់កុល​១​ដប និង​ថវិកា ចំនួន ៥​ម៉ឺន​រៀល​៕/V​-PC