​ប្រែ​សម្រួល : កញ្ញា​ដា​លី​ស (​ស៊ីនហួ​) ៖ អាជ្ញាធរ​ចិន​បាន​ចេញផ្សាយ​ផែនការ​សកម្មភាព​មួយ​ដើម្បី​ជួយ​សម្រួល​ដល់​ការធ្វើ​ឌីជីថល​នីយកម្ម​ឧស្សាហកម្ម​ទំនិញប្រើប្រាស់​ខណៈ​ប្រទេស​នេះ​ធ្វើ​ចំណាត់ការ​​ដើម្បី​ជំរុញ​សមាហរណកម្ម​សេដ្ឋកិច្ច​ឌីជីថល​និង​សេដ្ឋកិច្ច​ពិត ហើយ​បង្កើត​និង​បំពេញ​តម្រូវការ​អ្នកប្រើប្រាស់​។​

​ចិន​មាន​បំណង​សម្រេចបាន​នូវ​សមិទ្ធផល​គួរឱ្យកត់សម្គាល់​ក្នុងការ​ធ្វើ​សមាហរណកម្ម​និង​ការអនុវត្ត​បច្ចេកវិជ្ជា​ឌីជីថល​នៅក្នុង​ឧស្សាហកម្ម​ទំនិញប្រើប្រាស់​នៅត្រឹម​ឆ្នាំ ២០២៥ នេះ​បើ​យោង​តាម​ផែនការ​​ដែល​បាន​ចេញផ្សាយ​រួមគ្នា​ដោយ​ក្រសួង​ចំនួន​ប្រាំ រួម​ទាំង​ក្រសួង​ឧស្សាហកម្ម​និង​បច្ចេកវិទ្យា​ព័ត៌មាន​ផងដែរ​។​

​ក្រសួង​បាន​និយាយថា ការធ្វើសមាហរណកម្ម​និង​ការអនុវត្ត​បច្ចេកវិជ្ជា​ឌីជីថល​បន្ថែម​ទៀត​នឹង​ជួយ​កែ​លម្អ​ការផ្គត់ផ្គង់​ទំនិញប្រើប្រាស់ ពង្រីក​ខ្សែសង្វាក់​ឧស្សាហកម្ម បង្កើន​តម្លៃ​បន្ថែម​របស់​ឧស្សាហកម្ម និង លើកទឹកចិត្ត​សហគ្រាស​ឱ្យ​ពង្រឹង​ការច្នៃប្រឌិត​ឌីជីថល​ក្នុង​ការស្រាវជ្រាវ​និង​អភិវឌ្ឍន៍ និង​ក្នុង​ការប្រកួតប្រជែង​ស្នូល​របស់​ពួកគេ​។​

​យោង​តាម​ផែនការ ចំនួន​ក្រុមហ៊ុន​ផលិត​ទំនិញប្រើប្រាស់ ដែល​ធ្វើ​ឌីជីថល​នីយកម្ម​លើ​ការគ្រប់គ្រង​និង​ប្រតិបត្តិការ​របស់​ពួកគេ បំពាក់​ឧបករណ៍​ឌីជីថល​សម្រាប់​ការស្រាវជ្រាវ ការអភិវឌ្ឍ និង​ការ​រចនា និង ណែនាំ​ពាណិជ្ជកម្ម​អេឡិចត្រូនិក​ដល់​អាជីវកម្ម​របស់​ពួកគេ គួរតែ​មាន​លើស​ពី ៨០ ភាគរយ​នៅត្រឹម​ឆ្នាំ ២០២៥​។​

​ចិន​ក៏​មាន​បំណង​ជំរុញ​រោងចក្រ​គំរូ​ចំនួន ២០០ សម្រាប់​ការផលិត​ឆ្លាត​វៃ​ក្នុង​វិស័យ​ដូចជា វាយនភ័ណ្ឌ​និង​សម្លៀក​បំពាក់ គ្រឿង​ប្រើប្រាស់​ក្នុងផ្ទះ គ្រឿង​អេឡិចត្រូនិក អាហារ និង​ថ្នាំពេទ្យ​ក្នុងអំឡុង​ផែន​​ការ​នេះ​ផងដែរ​។ ចិន​ក៏​មាន​បំណង​បង្កើត​ទីក្រុង​គំរូ​ចំនួន ៥០ ដែល​នឹង​សម្រេចបាន​នូវ​វឌ្ឍនភាព​ឌីជីថល​ដ៏​គួរឱ្យ​កត់សម្គាល់ ភាព​ចម្រុះ​នៃ​ផលិតផល គុណភាព និង​ម៉ាក​យីហោ​ផងដែរ​៕

រូបថត​នៅ​ថ្ងៃទី​១៧ ធ្នូ ឆ្នាំ​២០២១ បង្ហាញ​ស្វ័យប្រវត្តិកម្ម​នៅ​រោងចក្រ​មួយ​នៅ​ក្រុង​ហាង​ចូ​វ ខេត្ត​ចឺ​ជាំង