​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នក​ថ្វាយបង្គំ​ព្រះ​ស្លៀកពាក់​ស​មកពី​ជុំវិញ​ពិភពលោក​បាន​ប្រមូលផ្តុំ​គ្នា​តាម​ដងផ្លូវ​នានា​នៃ​ទីក្រុង​មេកា (Mecca)​ខណៈ​ទីក្រុង​ដ៏​ពិសិដ្ឋ​បំផុត​របស់​​សាសនា​អ៊ីស្លាម​រៀបចំ​ធ្វើ​ធម្ម​យាត្រា​ពិធីបុណ្យ​ហាច (Hajj)​ដ៏​ធំ​បំផុត​ចាប់តាំងពី​ជំងឺ​រាតត្បាត​។​

​បដា​ស្វាគមន៍​អ្នក​ប្រណិបតន៍​សាសនា​អ៊ីស្លា​ម រួម​ទាំង​ភ្ញៀវ​អន្តរជាតិ​ដំបូង​គេ​ចាប់​តាំងពី​ឆ្នាំ ២០១៩​បាន​ព្យួរ​នៅតាម​ទីលាន​សាធារណៈ​និង​ផ្លូវឌឿងហែម​ខណៈ​កងកម្លាំង​សន្តិសុខ​ប្រដាប់អាវុធ​ល្បាត​​ទីក្រុង​បុរាណ ដែល​ជា​ស្រុកកំណើត​របស់​ព្យាកា​រី​ម៉ូ​ហា​ម៉េត​។​

​លោក អាប់ឌែល កា​ដឺ ខេ​ដឺ (Abdel Qader Kheder)​អ្នក​ហែ​ធម្ម​យាត្រា​ជនជាតិ​ស៊ូដង់​បាន​ប្រាប់​ទីភ្នាក់ងារ​សារព័ត៌មាន AFP​ក្នុង​ទីក្រុង​មេកា​មុនពេល​ព្រឹត្តិការណ៍​ដែល​រំពឹង​ចាប់ផ្តើម​នៅ​ថ្ងៃ​​ពុធ​ខាងមុខ​ថា “​នេះ​គឺជា​សេចក្តី​រីករាយ​ដ៏​បរិសុទ្ធ​។ ខ្ញុំ​សឹងតែ​មិន​ជឿ​ថា​ខ្ញុំ​បាន​មក​ទីនេះ​។ ខ្ញុំ​រីករាយ​គ្រប់​វិនាទី​”​។​

​មនុស្ស​មួយ​លាន​នាក់ រួមទាំង​អ្នក​មក​ពី​បរទេស ៨៥០.០០០​នាក់ ត្រូវបាន​អនុញ្ញាត​ក្នុង​ពិធីបុណ្យ​ហាច​នៅ​ឆ្នាំ​នេះ ដែល​ជា​សសរស្តម្ភ​សំខាន់​នៃ​សាសនា​អ៊ីស្លាម​ដែល​តម្រូវ​ឱ្យ​ប្រជាជន​មូស្លីម​ទាំងអស់​ចូលរួម​​យ៉ាងហោច​ណាស់​ម្តង​ក្នុង​មួយជីវិត បន្ទាប់​ពី​ផ្អាក​ដោយសារ​ជំងឺ​រាតត្បាត​អស់​រយៈពេល​ពីរ​ឆ្នាំ​៕

មនុស្ស​១​លាន​នាក់​ចូលរួម​ពិធីបុណ្យ​ហាច​នៅ​ឆ្នាំ​នេះ​នៅ​ទីក្រុង​មេកា​ក្រោយ​ផ្អាក​អស់​ពីរ​ឆ្នាំ​ដោយសារកូ​វីដ