​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កង​នាវាចរណ៍​ទី​៥​ដែល​មាន​មូលដ្ឋាន​នៅ​មជ្ឈិមបូព៌ា​របស់​កងទ័ព​ជើង​ទឹក​អាម៉េរិក​កំពុង​ចាប់ផ្តើម​ផ្តល់​រង្វាន់​សម្រាប់​ព័ត៌មាន​ដែល​អាច​ជួយ​ពួក​នាវិក​ស្ទាក់​​ចាប់​អាវុធ គ្រឿងញៀន និង​ការដឹកជញ្ជូន​ខុស​ច្បាប់​ផ្សេង​ទៀត​នៅ​ទូទាំង​តំបន់ ចំ​ពេល​មាន​ភាព​តានតឹង​ជុំវិញ​កម្មវិធី​នុយក្លេអ៊ែរ​របស់​អ៊ីរ៉ង់ និង​ការ​បំពាក់អាវុធ​ដល់​ពួក​ឧទ្ទាម​ហ៊ូ​ធី (Houthi) របស់យេ​ម៉ែន​។​

​ខណៈ​បញ្ចៀស​ការនិយាយ​ចំ​ឈ្មោះ​អ៊ីរ៉ង់ ការសម្រេចចិត្ត​របស់​កង​នាវាចរណ៍​ទី​៥​ក្នុង​ការផ្តល់​សាច់ប្រាក់​និង​ទំនិញ​ផ្សេង​ទៀត​សម្រាប់​ការ​ស៊ើបការណ៍​សម្ងាត់​នៅ​ឈូង​សមុទ្រ​ពែ​ក្ស​និង​ផ្លូវទឹក​យុទ្ធសាស្ត្រ​​ផ្សេងទៀត អាច​បង្កើន​សម្ពាធ​លើ​លំហូរ​នៃ​អាវុធ​ទៅ​កាន់​ក្រុម​ហ៊ូ​ធី ខណៈ​បទ​ឈប់​បាញ់​ដ៏​ផុយ​ស្រួយ​នៅតែ​កំពុង​អនុវត្ត​នៅក្នុង​ប្រទេស​យេ​ម៉ែន​។​

​ពួក​ហ៊ូ​ធី​បាន​គំរាមកំហែង​រួចហើយ​ដល់​ក្រុម​ការងារ​សម្ពន្ធមិត្ត​ថ្មី​មួយ ដែល​រៀបចំ​ដោយ​កង​នាវាចរណ៍​ទី​៥ នៅ​សមុទ្រ​ក្រហម​ប៉ុន្តែ​មិនទាន់​មាន​ការវាយប្រហា​រ​ណាមួយ​ដោយ​កងកម្លាំង​គាំទ្រ​ដោយ​អ៊ីរ៉ង់​​មកលើ​កងទ័ពជើងទឹក​អាម៉េរិក​នៅឡើយ​ទេ​។​

​ទន្ទឹមនឹងនេះ​ដែរ កង​នាវាចរណ៍​ទី​៥ បាន​និយាយថា ខ្លួន​និង​ដៃគូ​បាន​រឹបអូស​ថ្នាំញៀន​តម្លៃ​៥០០ លាន​ដុល្លារ​តែ​ក្នុង​ឆ្នាំ ២០២១ ដែល​នេះ​ជា​ចំនួន​ច្រើន​ជាង​បួន​ឆ្នាំមុនៗ​រួម​បញ្ចូល​គ្នា​ទៅទៀត​។​កង​​នាវាចរណ៍​ទី​៥ ក៏​បាន​ស្ទាក់ចាប់​អាវុធ​ចំនួន ៩.០០០ ដើម​ក្នុង​រយៈពេល​ដូចគ្នា​នេះ​ផង​ដែរ ពោលគឺ​ស្មើនឹង​បី​ដង​នៃ​ចំនួន​អាវុធ​ដែល​រឹបអូស​បាន​ក្នុង​ឆ្នាំ ២០២០​។​

​ប្រាក់រង្វាន់​ផ្តល់ជូន​គឺ ១០០.០០០ ដុល្លារ ឬ យានជំនិះ ទូក ឬ អាហារ ដែល​មាន​តម្លៃ​ស្មើ​៕

​ឧទ្ធម្ភាគចក្រ​អាម៉េរិក​ហោះ​សំកាំង​លើ​ទូក​ដឹក​អាវុធ​មួយ​នៅ​សមុទ្រ​អារ៉ាប់​កាលពី​ថ្ងៃទី​៦ ឧសភា ឆ្នាំ​២០២១