ដោយៈ ភ្នំ​សន្ទុក / កំពង់ធំៈ លោកស្រី លំ គ​ន្ធា​រី អភិបាលរង​ខេត្តកំពង់ធំ លោក​អភិបាលស្រុក ក្រុមប្រឹក្សាឃុំ លោក​មេភូមិ ប្រជាពលរដ្ឋ​ប្រមាណ​ជាង ២០០ នាក់ អញ្ជើញ​ចូលរួម ក្នុង​ពិធី​ប្រកាស​ទ​ទូល​ស្គាល់​សមាសភាព ប្រធាន​ក្រុមប្រឹក្សាឃុំ មេឃុំ ជំទប់ និង​សមាជិក ក្រុមប្រឹក្សាឃុំ​ត្រពាំង​ឫស្សី ស្រុក​កំពង់ស្វាយ ខេត្តកំពង់ធំ នា​ព្រឹក​ថ្ងៃទី​៤ ខែកក្កដា ឆ្នាំ​២០២២ នៅ​សាលាឃុំ​ត្រពាំង​ឫស្សី​។​

​លោក អ៊ុត វណ្ណា​រី​ន ត្រូវបាន​ប្រកាស ចូលកាន់​មុខតំណែង ជា​មេឃុំ​ថ្មី នៅ​ឃុំ​ត្រពាំង​ឫស្សី ហើយ​មេឃុំ​ថ្មី​រូបនេះ បាន​ឡើង​ប្ដេជ្ញាចិត្ត ផងដែរ​។

​ថ្លែង​នៅក្នុង​កម្មវិធី​នេះ លោកស្រី លំ គ​ន្ធា​រី បាន​មានប្រសាសន៍ថាៈ ត្រូវ​ពង្រឹងពង្រីក ដំណើរការ​លទ្ធិប្រជាធិបតេយ្យ ការនាំមក​នូវ​ការផ្លាស់ប្តូរ​រចនាសម្ព័ន្ធ និង​ប្រព័ន្ធគ្រប់គ្រង សេរី​ពហុបក្ស ឱ្យ​ចាក់គ្រឹះ​រហូតដល់​មូលដ្ឋាន​រដ្ឋបាល​។ នៅ​ប្រទេស​កម្ពុជា តាម អំណាច​វិមជ្ឈការ និង​វិសហមជ្ឈការ​តាមរយៈ​ការផ្ទេរ​មុខងារ​សិទ្ធិ​ស្វ័យ​សម្រេច ពី​ថ្នាក់ជាតិ​មក​រដ្ឋបាល​ថ្នាក់ក្រោម​ជាតិ ដើម្បី​ឆ្លើយតប​តម្រូវការ​ជាក់ស្ដែង របស់​ប្រជាពលរដ្ឋ តាម​មូលដ្ឋាន​នីមួយៗ​។ ការលើកកម្ពស់​ការចូល​រួម​ភាពជា​ម្ចាស់​របស់​ប្រជាពលរដ្ឋ គ្រប់​មូលដ្ឋាន ក្នុងការ​អភិវឌ្ឍ​មូលដ្ឋាន​របស់ខ្លួន សំដៅ​ចូលរួម​កាត់បន្ថយ​ភាពក្រីក្រ និង​លើកកម្ពស់​គុណភាព នៃ​ជីវិត​របស់​ប្រជាពលរដ្ឋ​៕/V