​ប្រែ​សម្រួលៈ​បំណង​(​ដេល្លី​ម៉េល​,​អេ​ភី​)៖​ខ្មាន់កាំភ្លើង​ម្នាក់​បាន​បាញ់​ចេញពី​ដំបូល​ផ្ទះ​ទៅ​លើ​ការ​ដង្ហែ​ក្បួន​អបអរ​ទិវា​ឯករាជ្យ​អាម៉េរិក​ថ្ងៃ​៤ កក្កដា នៅ​ទីក្រុង​ស៊ីកា​ហ្គោ​កាលពី​ថ្ងៃ​ចន្ទ ដោយ​បាន​សម្លាប់​មនុស្ស​​យ៉ាងតិច​៦​នាក់​និង​របួស​យ៉ាងតិច​៣០​នាក់ ព្រមទាំង​បញ្ជូន​អ្នកចូលរួម​និង​អ្នក​ឈរ​មើល​រាប់រយ​នាក់​រត់​ភៀសខ្លួន​ប្រាស​យកអាយុ​ទាំង​ភ័ត​តក្កមា​។​

​ជនសង្ស័យ​នៅ​មិន​ទាន់​ចាប់ខ្លួន​បាន​នៅឡើយ​ទេ​នៅ​ប៉ុន្មាន​ម៉ោង​ក្រោយមក​នៅ​ពេល​សមត្ថកិច្ច​ស្វែងរក​ពេញ​តំបន់​កើតហេតុ​។​

​មេ​ប៉ូលិស​សង្កាត់​ហាយ​លែ​ន​ផាក​(Highland Park)​លោក ឡូ ចូក​មិន (Lou Jogmen)​បាន​និយាយ​កាលពី​រសៀល​ថ្ងៃ​ចន្ទ​ថា ប៉ូលិស​បាន​កំណត់​អត្តសញ្ញាណ​បុរស​អាយុ​២២​ឆ្នាំ ឈ្មោះ​រ៉ូ​ប៊ឺត​អ៊ី​. គ្រី​ម៉ូ ទ្រី​(Robert E. Crimo III)​ជា​ជនសង្ស័យ​និង​ត្រូវ​ប្រុងប្រយ័ត្ន ដោយសារ​ជន​នេះ​ត្រូវ​គេ​គិត​ថា​មាន​អាវុធ​និង​គ្រោះថ្នាក់​។​ទោះជា​យ៉ាងណា​ប៉ូលិស​បាន​បដិសេធ​មិន​ព្រម​ឆ្លើយ​នឹង​សំណួរ​ថា​តើ​គេ​កំណត់​​ជន​ឈ្មោះ​គ្រី​ម៉ូ​នេះ​ជា​ជនសង្ស័យ​ដោយ​ហេតុផល​អ្វី​។​

​អាជ្ញាធរ​បាន​ពណ៌នារ​ថយ​ន្ត​របស់​ជនសង្ស័​យ​ជា​ហុងដា​ពណ៌​ទឹកប្រាក់ ជាមួយ​នឹង ស្លាក​លេខ​DM 80653​។​

​ការបាញ់ប្រហារ​ក្នុង​ទិវា​៤​កក្កដា​នេះ​ជា​ហេតុការណ៍​សោកនាដកម្ម​ដោយ​កាំភ្លើង​ចុងក្រោយ​មួយ​ដែល​បំផ្លាញ​ជីវិត​អាម៉េរិក​។​សាលារៀន ព្រះវិហារ ហាង​ទំនិញ​និង​ឥឡូវ​ការ​ដង្ហែ​ក្បួនសហគមន៍​សុទ្ធ​តែ​ក្លាយ​​ជា​កន្លែង​ពិឃាត​នៅ​ប៉ុន្មាន​ខែ​ចុងក្រោយ​នេះ​។​ពេលនេះ ការ​បង្ហូរឈាម​កើតឡើង​នៅពេល​ប្រជាជាតិ​អបអរ​កំណើត​របស់​ខ្លួន​ព្រមទាំង​ចំណង​ដែល​ចង​អាម៉េរិក​អោយ​រួបរួម​គ្នា​។​

​អភិបាលក្រុង លោកស្រី ណាន់​ស៊ី រ៉ូ​ធឺ​រី​ង​(Nancy Rotering )​បាន​និយាយថា អំពើហិង្សា​បាន​«​អង្រួន​ស្នូល​របស់​យើង នៅ​ថ្ងៃ​ដែល​យើងទាំងអស់គ្នា​អបអរ​សហគម​ន៍​ភាពនិង​សេរីភាព​របស់​យើង​។​យើង​បែរ​​ជា​កាន់​មរណទុក្ខ​និង​តស៊ូ​នឹង​ភេរវកម្ម​ដែល​ធ្លាក់​មក​លើ​ពួកយើង​»​។​

​ការបាញ់ប្រហារ​នេះ​កើត​ឡើង​នៅក្នុង​ផ្លូវ​ដង្ហែ​ក្បួន កន្លែង​ដែល​អ្នកស្រុក​អាច​មើលឃើញ​ទ​ដ្ឋ​ភាព​ទាំងមូល​បានល្អ​។​ស្នូរ​កាំភ្លើង​បាន​បញ្ជូន​អ្នកចូលរួម ព្រមទាំង​អ្នក​ទៅ​មើល​ដោយ​ខ្លះ​មាន​ប្រឡាក់​ឈាម​ផង​​រត់​ប្រាស​អាយុ​រៀងៗ​ខ្លួន​។​

ផ្លូវបែកជាបួន កន្លែងដែលខ្មាន់កាំភ្លើងបាញ់ពីដំបូងអាគារលើក្បួនដង្ហែ

​ប្រធានាធិបតី ចូ បៃ​ដិន កាលពី​ថ្ងៃ​ចន្ទ​បាន​និយាយាថា លោក​និង​ជំទាវ​ទីមួយ ជី​ល បៃ​ដិន «មានការរ​ន្ធ​ត់​ចិត្ត​ចំពោះ​អំពើ​ហិង្សា​ដោយ​កាំភ្លើង​ដ៏​គ្មាន​ន័យ​ដែល​នាំ​ទុក្ខសោក​ជាថ្មី​ដល់​សហគមន៍​អាម៉េរិក​នៅ​​ចំ​ទិវា​ឯករាជ្យ​ជាតិ​»។​លោក​បាន​ស្នើ​ទៅ​ផ្នែក​អនុវត្ត​ច្បាប់​សហព័ន្ធ​ជួយ​ស្វែងរក​ជន​បាញ់ប្រហារ ដែល​កំពុង​នៅ​គេច​ខ្លួន​នៅឡើយ​នាពេលនេះ​។​

​ប៉ូលិស​ជឿថា មាន​អ្នក​បាញ់ប្រហារ​តែ​ម្នាក់ តែ​បាន​ព្រមាន​ថា​ជន​នេះ​អាច​នៅ​មាន​អាវុធ​និង​គ្រោះថ្នាក់​នៅឡើយ​។​

​ក្នុងពេល​ជាមួយគ្នា បណ្តា​ទីក្រុង​ក្បែរ​ខាង​ជាច្រើន​បាន​លុបចោល​ព្រឹត្តិការណ៍​ជាច្រើន រួម​មាន​ការដើរ​ដង្ហែ និង​ការបាញ់​កាំជ្រួច​ផ្កា​៕

​សមត្ថកិច្ច​អាម៉េរិក​នៅ​បន្ត​តាម​រក​ជន​បាញ់ប្រហារ​នៅ​ប៉ុន្មាន​ម៉ោង​ក្រោយ​ការបាញ់​សម្លាប់​មនុស្ស​ប្រាំមួយ​នាក់​នៅ​ស៊ី​កាហ្គោ​