ដោយ​៖ ដេប៉ូ / ភ្នំពេញ​៖ រដ្ឋមន្ត្រី​ក្រសួងបរិស្ថាន លោក សាយ សំ​អាល់ និង​ជា​ប្រធាន​ក្រុម​ប្រឹក្សាជាតិ​អភិវឌ្ឍន៍​ដោយ​ចីរភាព បាន​បើក​កិច្ចប្រជុំ​មួយ ជាមួយ​ភាគី​ពាក់ព័ន្ធ ដើម្បី​ពិភាក្សា ស្តីពី​កិច្ចសហប្រតិបត្តិការ លើ​បរិវត្ត​កម្ម​សេដ្ឋកិច្ច​បៃតង (Green Economy Transformation) សម្រាប់​កម្ពុជា​។

​កិច្ចប្រជុំ​នេះ បានធ្វើ​ឡើង រវាង លោក សាយ សំ​អាល់ ជាមួយ លោក Asad Naqvi ប្រធាន​លេខាធិការដ្ឋាន​កម្មវិធី​ភាពជា​ដៃគូ សម្រាប់​សកម្មភាព​សេដ្ឋកិច្ច​បៃតង (Partnership for Action on Green Economy-PAGE) ដោយមាន​ការចូលរួម ពី​ថ្នាក់ដឹកនាំ​ក្រសួងបរិស្ថាន តំណាង​ក្រសួង​ពាក់ព័ន្ធ តំណាង​នាយកដ្ឋាន​ជំនាញ នៃ​ក្រសួងបរិស្ថាន និង​ស្ថាប័ន​ជំនាញ​ចំនួន​៥ របស់​អង្គការសហប្រជាជាតិ រួមមាន UNEP, ILO, UNDP, UNIDO និង​UNITAR សរុប​ចំនួន ២៧​រូប តាមរយៈ​ប្រព័ន្ធ​វីដេអូ​ពី​ចម្ងាយ នា​រសៀល​ថ្ងៃទី​៤ ខែកក្កដា ឆ្នាំ​២០២២​។

​ថ្លែង​ក្នុង​ពិធី​នេះ លោក រដ្ឋមន្ត្រី​ក្រសួងបរិស្ថាន បាន​បញ្ជាក់ថា​: សុខសន្តិភាព និង​ស្ថិរភាព​នយោបាយ​ពេញលេញ ឆ្នាំ​១៩៩៨ បាន​នាំឱ្យ​កម្ពុជា ស្គាល់​កំណើនសេដ្ឋកិច្ច​ខ្ពស់​ជាប្រចាំ មុន​ការមកដល់ នៃ​ជំងឺ​កូ​វីដ​-១៩ ។ ទន្ទឹមនឹងនេះ កម្ពុជា ចាប់អារម្មណ៍ ក្នុងការ​ជំរុញឱ្យមាន​សេដ្ឋកិច្ច​បៃតង​ផងដែរ ដោយ​លោក​បានស្នើ​ឱ្យមាន​ការពិភាក្សា​ស៊ីជម្រៅ ជាមួយ​អ្នកជំនាញ​ជាតិ និង​សិក្សា​ឱ្យបាន​ច្បាស់ ពី​អ្វីដែល​កម្ពុជា ត្រូវ ឬ​គួរ​ធ្វើ ដើម្បី​ជំរុញឱ្យមាន​បរិវត្ត​កម្ម​សេដ្ឋកិច្ច​បៃតង ក្នុង​ប្រព័ន្ធ​សេដ្ឋកិច្ច​របស់​កម្ពុជា​។

​ក្នុងឱកាស​នោះដែរ តំណាង PAGE បាន​ជម្រាបជូន​ពីបទ​ពិសោធន៍​សកល​មួយចំនួន ក្នុងការ​ជំរុញ​វិស័យ​ផ្សេងៗ​នៃ​សេដ្ឋកិច្ច ដើម្បី​ជំរុញ​ការផ្លាស់ប្តូរ ទៅកាន់​សេដ្ឋកិច្ច​បៃតង ដូចជា​ការដោះស្រាយ​បញ្ហា​ប្រែប្រួល​អាកាសធាតុ ការអភិរក្ស​ជីវៈចម្រុះ ប្រសិទ្ធភាព​ថាមពល ការប្រើប្រាស់​ធនធាន ប្រកបដោយ​ប្រសិទ្ធភាព ក្នុង​ផលិតផល​ក្នុងស្រុក​សរុប (GDP) ជាដើម ដែល​នឹង​បង្កើតឱ្យមាន​ប្រាក់ចំណូល ការងារ ភាពក្រីក្រ និង​ពង្រឹង​មូលដ្ឋានគ្រឹះ​អេកូឡូស៊ី​សេដ្ឋកិច្ច​។

​ជា​លទ្ធផល​ចម្បងៗ នៃ​កិច្ចប្រជុំ​នេះ រួមមាន​: ១) ឯកភាព​ឱ្យមាន​ការសិក្សា​ស៊ីជម្រៅ អំពី​ការអភិវឌ្ឍ​សេដ្ឋកិច្ច​បៃតង​នៅ​កម្ពុជា ដើម្បី​កំណត់​រក​សកម្មភាព និង​អនុសាសន៍​គោលនយោបាយ សម្រាប់​សេដ្ឋកិច្ច​បៃតង ដោយមាន​ក្រុមប្រឹក្សា​អភិវឌ្ឍន៍ ដោយ​ចីរភាព ជា​អ្នកសម្របសម្រួល​ជាមួយ PAGE និង ២) ការជួបពិភាក្សា​កម្រិត​នយោបាយ សម្រាប់​កំណត់​យុទ្ធសាស្ត្រ ចំណុច​ចាប់ផ្តើម និង​ការសម្របសម្រួល ក្នុងការ​អនុវត្ត​សេដ្ឋកិច្ច​បៃតង​៕/V​