​ដោយៈ ចាន់តូ / ភ្នំពេញ​: យុវជន​ពីរ​នាក់ ក្នុងនោះ​ម្នាក់ បាន​ស្លាប់ និង​ម្នាក់ទៀត រងរបួស​ធ្ងន់ បន្ទាប់ពី​ជិះ​ម៉ូតូ​មួយគ្រឿង ឌុប​គ្នា ក្នុង​ល្បឿន​យ៉ាង​លឿន បាន​ជ្រុល​ទៅបុក​ជាមួយ​រថយន្ត តូយ៉ូតា ព្រូស ពេញទំហឹង កាលពី​វេលា​ម៉ោង​១១​និង​២០​នាទី យប់​ថ្ងៃ​ចន្ទ ទី​៤ ខែ​កក្ដ​ដា ឆ្នាំ​២០២២ នៅក្នុង​សង្កាត់​បឹងត្របែក ខណ្ឌចំការមន រាជធានី​ភ្នំពេញ​។

​តាម​ប្រភពពី​កន្លែងកើតហេតុ បាន​ឲ្យ​ដឹងថា មុនពេល​កើតហេតុ គេ​ឃើញ​យុវជន ពីរ​នាក់ ជិះ​ម៉ូតូ​ម៉ាក​ហុងដា ស្គុ​ប​ពី ពណ៌​ស ពាក់​ផ្លាកលេខ ភ្នំពេញ 1HX 2241 ធ្វើដំណើរ​តាម​បណ្ដោយ​ផ្លូវ​លេខ​១៣៥ ទិសដៅ​ពី​ខាងត្បូង ទៅខាង​ជើង ក្នុង​ល្បឿន​យ៉ាង​លឿន ខណ​: មកដល់​ចំណុចកើតហេតុ​ខាងលើ ស្រាប់​តែមាន​រថយន្ត​តូយ៉ូតា ព្រូស ពណ៌​ស ពាក់​ផ្លាកលេខ ភ្នំពេញ 2BC.2373 បើកបរ​ដោយ​បុរស​ម្នាក់ ធ្វើដំណើរ​តាម​បណ្តោយ​ផ្លូវ​ម៉ៅ​សេទុង ទិសដៅ​ពី​ខាងលិច ទៅខាង​កើត ក្នុង​ល្បឿន​លឿន​ដូចគ្នា ក៏​បត់​មក​ផ្លូវ​លេខ ១៣៥ ជ្រុល​ទៅបុក​ម៉ូតូ ពេញទំហឹង បណ្ដាល​ឲ្យ​ម៉ូតូ​ប៉ើង​ទើរ​លើ​រថយន្ត បង្ក​ឱ្យ​អ្នកជិះ​ម៉ូតូ ទាំងពីរ​នាក់ រងរបួស​ធ្ងន់ ហើយ​ត្រូវបាន​គេ​បញ្ជូនទៅ​សង្គ្រោះ នៅឯ​មន្ទីរពេទ្យ​ឯកជន ប៉ុន្តែ​ដោយ​ស្ថានភាព​របួសធ្ងន់​ពេក យុវជន​ម្នាក់ ក៍បាន​ដាច់ខ្យល់​ស្លាប់​តែម្ដង​។

​ក្រោយ​កើតហេតុ សមត្ថកិច្ច បាន​ឃាត់ខ្លួន​អ្នកបើកបរ រថយន្ដ​។ សមត្ថកិច្ច​ជំនាញ បាន​ចុះមក​វាស់វែង យក​រថយន្ត និង​ម៉ូតូ ទៅ​រក្សាទុក នៅ​ការិយាល័យ​ចរាចរណ៍​ផ្លូវគោក នៃ​ស្នងការដ្ឋាន​នគរបាល រាជធានី​ភ្នំពេញ រង់ចាំ​ដោះស្រាយ​តាមផ្លូវ​ច្បាប់​។ ដោយឡែក សព​ជនរងគ្រោះ​សមត្ថកិច្ច ធ្វើ​កំណត់ហេតុ​ប្រគល់​ឲ្យ​ក្រុមគ្រួសារ​៕/V​