ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី វ្ល៉ា​ឌី​មៀ ពូ​ទីន កាលពី​ថ្ងៃ​ចន្ទ​ទី​៤​កក្កដា បាន​បញ្ជា​ឱ្យ​កងទ័ព​រុស្ស៊ី​ធ្វើ​ការវាយលុក​ឱ្យ​កាន់តែ​ជ្រៅ​ទៅក្នុង តំបន់​ដុន​បា​សភាគ​ខាងកើត​អ៊ុ​យក្រែន បន្ទាប់​ពី​កងកម្លាំង​របស់​ទីក្រុង​មូ​ស្គូ​បាន​ដណ្តើមយក​ទីក្រុង​យុទ្ធសាស្ត្រ លី​ស៊ី​ចាន់​ស​ខ៍ (Lysychansk)​។​

​រដ្ឋមន្ត្រី​ការពារជាតិ​រុស្ស៊ី លោក សឺ​ហ្គេ សយ​ហ្គូ (Sergei Shoigu)​បាន​ប្រាប់​លោក​ពូ​ទីន​នៅក្នុង​កិច្ចប្រជុំ​មួយ​ថា កងកម្លាំង​របស់​ទីក្រុង​មូ​ស្គូ​ឥឡូវ​នេះ​បាន​គ្រប់គ្រង​តំបន់​លូ​ហា​នស​ខ៍ទាំង​ស្រុង​។​

​ដោយ​បង្ហាញ​សញ្ញា​វាយលុក​មិន​ព្រម​ផ្អាក​និង​ឥឡូវ​រុស្ស៊ី​សម្លឹង​កាន់កាប់​តំបន់​ដូណិត​សខ៍ទាំង​មូល លោកពូ​ទីន​បាន​ប្រាប់​លោក​សយហ្គូ​ថា កងទ័ព​ដែល​ឈរជើង​នៅ​ទី​នោះ​ត្រូវតែ​បន្ត​ប្រតិបត្តិការ​របស់​​ពួកគេ​។​

​លោកពូ​ទីន​បាន​និយាយថា “​អង្គភាព​យោធា​ទាំងអស់ រួម​ទាំង​ក្រុម​បូព៌ា​និង​ក្រុម​បស្ចិម​ត្រូវតែ​បំពេញ​ភារកិច្ច​របស់​ពួកគេ​តាម​ផែនការ​ដែល​បាន​អនុម័ត​ពី​មុន​។​ខ្ញុំ​សង្ឃឹមថា​អ្វីៗ​នឹង​បន្ត​ក្នុងទិសដៅ​​របស់​ពួកគេ​ដូចដែល​បាន​កើតឡើង​នៅ​លូ​ហា​នស​ខ៍​រហូតមកទល់​ពេលនេះ​”​។​

​កងទ័ព​អ៊ុយ​ក្រែន​បាន​និយាយកាល​ពី​ថ្ងៃអា​ទិ​ត្យ​ថា ខ្លួន​កំពុង​ដកថយ​ពី​ទីក្រុង​លី​ស៊ី​ចាន់​ស​ខ៍​ដើម្បី​ការពារ​អាយុជីវិត​ទាហាន​របស់ខ្លួន ដែល​ចាញ់​ប្រៀប​ទាំង​ចំនួន​និង​អាវុធ​ធៀប​នឹង​កងកម្លាំង​រុស្ស៊ី​។​

​ប្រធានាធិបតី​អ៊ុយ​ក្រែនលោក វ៉ូ​ឡូ​ឌី​មៀ ហ្សេ​លេន​ស្គី បាន​និយាយ​នៅក្នុង​សុន្ទរកថា​នា​ពេល​រាត្រី​របស់គាត់ ដោយ​ពណ៌នា​អំពី​ការវាយលុក​កាន់តែ​ខ្លាំង​របស់​រុស្ស៊ី​ថា​”​សត្រូវ​នៅតែ​បន្ត​វាយលុក​តាម​តំបន់​​ព្រំដែន​នៃ​តំបន់​ស៊ូ​មី (Sumy)​ទីក្រុង​ខា​គី​វ និង​តំបន់​ដុន​បា​ស​”​។​

“​យើង​ត្រូវតែ​កម្ទេច​ពួកគេ​។ នេះ​ជា​កិច្ចការ​ដ៏​លំបាក វា​ទាមទារ​ពេលវេលា​និង​ការខិតខំ​ប្រឹងប្រែង​ដ៏​អស្ចារ្យ​។ ប៉ុន្តែ​យើង​គ្មាន​ជម្រើស​ផ្សេង​ទេ​”​។​

​ខណៈ​សង្គ្រាម​ឈាន​ចូលដល់​ខែ​ទី​ប្រាំ អ៊ុយ​ក្រែន​បាន​ប្រាប់​នៅ​សន្និសីទ​ស្តីពី​ការកសាង​ឡើងវិញ​នៅ​ប្រទេស​ស្វីស​កាលពី​ថ្ងៃ​ចន្ទថា អ៊ុយ​ក្រែន​ត្រូវការ​ប្រាក់ ៧៥០ ពាន់​លាន​ដុល្លារ​ដើម្បី​កសាង​ប្រទេស​ឡើងវិញ​៕

​អ៊ុយ​ក្រែន​ត្រូវការ​ប្រាក់ ៧៥០ ពាន់​លាន​ដុល្លារ​ដើម្បី​កសាង​ប្រទេស​ឡើងវិញ