ដោយ​៖ សុវណ្ណ​កុម្ភៈ / ភ្នំពេញ​៖ នៅ​ថ្ងៃទី​៥ ខែកក្កដា ឆ្នាំ​២០២២ នេះ នៅ​សាលប្រជុំ នាយកដ្ឋាន​អប់រំ​កាយ និង​កីឡា នៃ​ពហុ​កីឡដ្ឋាន​ជាតិ បាន​បើ​វគ្គ​បំប៉ន​សមត្ថភាព ដល់​សិក្ខាកាម ចំនួន ៥០ នាក់ ស្តីពី​ការរៀបចំ និង​គ្រប់គ្រង​ព្រឹត្តិការណ៍​កីឡា ។​

​លោក សុខ សប្បាយ​ណា អនុរដ្ឋលេខាធិការ ក្រសួង​អប់រំ យុវជន និង​កីឡា លោក ហួត សេង​ទ្រី ប្រធាន​នាយកដ្ឋាន​គ្រប់គ្រង និង​រៀបចំ​ព្រឹត្តិការណ៍​កីឡា បាន​អញ្ជើញ​ចូលរួម បើក​វគ្គ​នេះ ។​

​លោក ហួត សេង​ទ្រី បាន​និយាយថាៈ វគ្គ​បំប៉ន​ស្តីពី ការរៀបចំ​ការប្រកួត និង​ព្រឹត្តិការណ៍ កីឡា​ជូន​ដល់​មន្ទីរអប់រំ យុវជន និង​កីឡា រាជធានី ខេត្ត រយៈពេល ៣ ថ្ងៃ ចាប់ពី​ថ្ងៃទី​៥ ដល់​ថ្ងៃទី​៧ ខែកក្កដា ឆ្នាំ​២០២២ ។ វគ្គ​បំប៉ន​សមត្ថភាព ស្តីពី​ការ រៀបចំ​ការប្រកួត​នេះ មាន​សិក្ខា​ម​ចូលរួម ចំនួន ៥០ នាក់ អញ្ជើញ​មកពី​មន្ទីរអប់រំ យុវជន និង​កីឡា រាជធានី ខេត្ត ទាំង ២៥ ត្រៀម​ចូលរួម​ព្រឹត្តិការណ៍​កីឡា​ជាតិ លើក​ទី​៣ ឆ្នាំ​២០២២ ដែល​នឹង​ប្រព្រឹត្តទៅ ចាប់ពី​ថ្ងៃទី​១៧ ដល់​ថ្ងៃទី​២៨ ខែវិច្ឆិកា ឆ្នាំ​២០២២ ខាងមុខ ។​

​វគ្គ​បំប៉ន​នេះ ពិត​ជាមាន​សារសំខាន់ សម្រាប់​សិក្ខាកាម ដើម្បី​ពង្រឹងសមត្ថភាព និង​បង្កើន ធនធាន​មន្ត្រី​កីឡា នៅតាម​មន្ទីរអប់រំ យុវជន និង​កីឡា​រាជធានី ខេត្ត ឲ្យ​ការរៀបចំ​មាន ស្តង់ដា​តែមួយ ស្របទៅតាម​លក្ខណៈ​ជាតិ និង​អន្តរជាតិ ឲ្យ​មាន​ការយល់​គ្នា រវាង​គណៈកម្មការ​រៀប​ចំការ​ប្រកួត និង​អ្នកដឹកនាំ​ការងារ បច្ចេកទេស ដើម្បី​រួមគ្នា ឆ្ពោះទៅ​ការធ្វើជា​ម្ចាស់ផ្ទះ នៃ​ព្រឹត្តិការណ៍​កីឡា SEA GAMES លើក​ទី​៣២ ឆ្នាំ​២០២៣​។​

​លោក សុខ សប្បាយ​ណា បាន​កោតសរសើរ និង​វាយតម្លៃ​ខ្ពស់ ចំពោះ​អង្គភាព ជំនាញ និង​អគ្គនាយកដ្ឋាន​កីឡា ដែលជា​សេនាធិការ​របស់ ក្រសួង​អប់រំ យុវជន និង​កីឡា បាន​ខិតខំ ប្រឹងប្រែង​បំពេញភារកិច្ច យ៉ាងសកម្ម ក្នុងការ​រៀបចំ​សិក្ខា សាលា ដ៏​មាន​សារៈសំខាន់​នេះ ព្រមទាំង​អញ្ជើញ​ស្ថាប័ន​ពាក់ព័ន្ធ ដើម្បី​ពង្រឹង សមត្ថភាព និង​បង្កើន​ធនធាន​មន្ត្រី​កីឡា នៅតាម​មន្ទីរអប់រំ យុវជន និង​កីឡា​រាជធានី ខេត្ត ឲ្យ​ការរៀបចំ​មាន​ស្តង់ដា ស្របតាម​ការ រៀបចំ ក្នុង​តំបន់ ជាពិសេស ការត្រៀម​លក្ខណៈ​រៀបចំ ការប្រកួត​កីឡា SEA GAMES លើក​ទី​៣២ ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ​៕/V​-PC