​ប្រែ​សម្រួល : កញ្ញា​ដា​លី​ស (BBC) ៖ ក្រុម​មេឃ​ខៀវ Manchester City បាន​ចុះហត្ថលេខា​លើ​ខ្សែបម្រើ កាល់​វីន ហ្វី​លីព (Kalvin Phillips) របស់ Leeds United ក្នុងតម្លៃ ៤៥ លាន​ផោន (៥៤,៥១ លាន​ដុល្លារ​)​។​

​កីឡាករ​ជម្រើសជាតិ​អង់គ្លេស​វ័យ ២៦ ឆ្នាំ​រូប​នេះ​បាន​ចុះ​កិច្ចសន្យា​រយៈពេល ៦ ឆ្នាំ​ជា​មួយ​ក្រុម​ជើងឯក Premier League ។​

​រូប​គេ​ក្លាយ​ជា​កីឡាករ​ចុះហត្ថលេខា​រដូវក្តៅ​ទី​បី​របស់​លោក ប៉េប ហ្គាឌី​អូ​ឡា បន្ទាប់​ពី​ការមកដល់​របស់​កីឡាករ អៀ​លីង ហា​លែ​ន (Erling Haaland) និង ស្តេ​ហ្វាន អ័រ​តេ​ហ្គា ម៉ូ​រី​ណូ (Stefan Ortega Moreno)​។​

​ហ្វីលីពបាន​និយាយ​ថា “​ខ្ញុំ​ពិតជា​មាន​សេចក្តី​សោមន្ស​រីករាយ​ណាស់​ដែល​បាន​ចូលរួម​ជាមួយ Manchester City ។ City ជាថ្មី​ម្តងទៀត​បាន​ស​បញ្ជាក់ថា​ជា​ក្រុម​ល្អ​បំផុត​នៅក្នុង​ប្រទេស​”​។​

​ហ្វី​លីព ដែល​បាន​បង្ហាញខ្លួន ២៣៥ ដង​ក្នុង​រយៈពេល ៨ រដូវ​កាល​នៅ​ទឹកដី Elland Road គឺ​នៅសល់​ពីរ​ឆ្នាំ​ទៀត​លើ​កុងត្រា​របស់គេ​ជាមួយ Leeds​។​

​ហ្វី​លីព​និយាយថា Man City មាន “​ក្រុម​ដ៏​អស្ចារ្យ​និង​អ្នក​ចាត់ការ​ទូទៅ​ដ៏​អស្ចារ្យ​គឺ​លោក ប៉េប ហ្គាឌី​អូ​ឡា ដែល​ត្រូវបាន​ចាត់ទុកជា​អ្នកចាត់ការ​ល្អ​បំផុត​នៅក្នុង​ពិភពលោក​”​។​

​រូបគេ​បាន​បន្ថែមថា “​ការ​ដែល​អាច​លេង​ក្រោម​ការដឹកនាំ​របស់​លោក​ប៉េប​និង​រៀនសូត្រ​ពី​គាត់​និង​បុគ្គលិក​គ្រូបង្វឹក​របស់គាត់ ក៏​ដូច​ជា​ការ​ក្លាយជា​ផ្នែក​មួយ​នៃ​ក្រុម​ដ៏​អស្ចារ្យ​បែប​នេះ គឺជា​ក្តី​សង្ឃឹម​ដែល​ខ្ញុំ​រំភើប​ខ្លាំង​មិន​គួរឱ្យ​ជឿ​”៕

ហ្វី​លីព​ក្លាយ​ជា​កីឡាក​រចំ​ណូល​ថ្មី​ទី​៣​របស់ Man City សម្រាប់​រដូវ​កាល​ថ្មី