​ដោយ​:​ សុខុម / ស្ទឹងត្រែង​: ​ប្រទះឃើញ​សព​បុរស​ម្នាក់​អណ្តែត​តាម​ទឹកទន្លេ​មេគង្គ នៅ​ស្រុក​សៀម​បូក ខេត្តស្ទឹងត្រែង កាលពី​រសៀល​ថ្ងៃទី​៥ ខែកក្កដា​ឆ្នាំ​២០២២ បន្ទាប់ពី​បុរស​នោះ បាន​លោត​ពីលើ​ស្ពាន​មេគង្គ នៅ​ភូមិ​បា​ចុង សង្កាត់​ព្រះបាទ ក្រុង​ស្ទឹងត្រែង កាលពី​ថ្ងៃទី​១ កក្ត​ដា កន្លងទៅ​។

​សមត្ថកិច្ច បាន​ឲ្យ​ដឹងថា​: សព​បុរស​នោះ ឈ្មោះ គន់ អាយុ​៣៧​ឆ្នាំ មុខរបរ​លក់​ត្រី នៅ​ផ្សារ​សាមគ្គី ស្ទឹងត្រែង​មាន​ទីលំនៅ​ស្ថិតនៅ​ភូមិ​រា​ជានុ​កូ​ល សង្កាត់​ស្ទឹងត្រែង​ក្រុង​ស្ទឹងត្រែង​។ នៅ​ថ្ងៃកើតហេតុ ថ្ងៃទី​១ កក្កដា ពីរ​នាក់​ប្ដី​ប្រពន្ធ បាននាំគ្នា​ទៅពិនិត្យ​សុខភាព នៅ​មន្ទីរពេទ្យ​។​គ្រូពេទ្យ​ប្រាប់ថា ប្ដី​របស់​នាង មាន​ជំងឺ​ក្រួស​ក្នុង​តំរងនោម​។​បន្ទាប់ពី​ចេញពី​មន្ទីរពេទ្យ​វិញ ត្រឡប់ទៅផ្ទះ រួច ប្តី​ក៏​ជិះ​ម៉ូតូ​ទៅ​ក្រៅ​បាត់​តែម្នាក់ឯង​។ ក្រោយមក ទើប​ទទួល​ព័ត៌មាន​ថា ប្តី​នាង ជិះ​ម៉ូតូ​ទៅ​លោតទឹក​ស្ពាន​មេគង្គ ដោយ​បន្សល់ទុក​តែ​ស្បែកជើង​១​គូ និង​ម៉ូតូ​មួយគ្រឿង​។

​ចាប់តាំងពី​ថ្ងៃកើតហេតុ មកទល់នឹង​រសៀល​ថ្ងៃទី​៥ ខែកក្កដា នេះ ទើប​មាន​គេ​ប្រទះឃើញ​សព​បុរស​លោត​ពីលើ​ស្ពាន​មេគង្គ កាលពី​ប៉ុន្មាន​ថ្ងៃមុន អណ្តែត​តាម​ទឹកទន្លេ​មេគង្គ នៅ​ភូមិសាស្ត្រ​ស្រុក​សៀម​បូក ខាង​ព្រំប្រទល់​ខេត្តក្រចេះ និង​ស្ទឹងត្រែង​៕/V​