​ដោយ​៖ សុវណ្ណ​កុម្ភៈ / ភ្នំពេញ​៖ ពាក់កណ្ដាល​ខែកក្កដា ឆ្នាំ​២០២២ នេះ សហព័ន្ធ​កីឡា​ប្រដាល់សកល​កម្ពុជា នឹង​បញ្ជូន​កីឡាករ​របស់ខ្លួន ចំនួន ៩​រូប ទៅ​ហាត់​នៅ​ថៃ ដើម្បី​ត្រៀមខ្លួន សម្រាប់​ស៊ី​ហ្គេម ឆ្នាំ​២០២៣ ដែល​កម្ពុជា ធ្វើជា​ម្ចាស់ផ្ទះ​។

​អគ្គលេខាធិការ សហព័ន្ធ​កីឡា​ប្រដាល់សកល​កម្ពុជា លោក ប៊ុ​យ សុ​ភ័​ណ្ឌ បាន​ឲ្យ​ដឹងថា​: តាម​ការគ្រោងទុក​សហ​ព័ន្ធ នឹង​បញ្ជូន​កីឡាករ ដែល​កំពុង​ហ្វឹកហាត់​ទាំងអស់ ១២​នាក់ ទៅ​ហាត់​នៅ​ថៃ រយៈពេល ២ សប្ដាហ៍​។ ប៉ុន្តែ ដោយសារ​មាន​កីឡាករ ៣​រូប ដែល​មិនមាន​លិខិតឆ្លងដែន ទើប​សហព័ន្ធ សម្រេច​បញ្ជូន​ចំនួន ៩​នាក់ ដែលមាន​លិខិតឆ្លងដែន​ទៅ​ហាត់ ហើយ​ការហ្វឹកហាត់​នេះ គឺ​ហាត់​ជាមួយ​ក្រុម​កីឡាករ​ជម្រើសជាតិ​ថៃ​តែម្ដង​។ ក្រៅពី​កីឡាករ ៩​រូប ក៏មាន​គ្រូបង្វឹក ២​រូប ចូលរួម​ធ្វើដំណើរ ទៅជា​មួយ​ដែរ​។

​អគ្គលេខាធិការ បានបញ្ជាក់​បន្ថែមថា​: ទាក់ទង​រឿង​កីឡាករ យើង​មាន​រៀបចំ ១២​នាក់ សម្រាប់​ការត្រៀម​ក្នុងការ​ប្រកួត​ស៊ី​ហ្គេម ឆ្នាំ​២០២៣ បន្ថែម​លើសពីនេះ យើង​ក៏មាន​កូន​ខ្មែរ​-​វៀតណាម​ម្នាក់ ដែល​កំពុង​ហាត់​នៅ​វៀតណាម និង​កូន​ខ្មែរ​-​ថៃ ដែល​កំពុង​ហាត់​នៅ​ថៃ​ម្នាក់​ដែរ​។ ពេលនេះ កំពុង​ស្នើសុំ​ទៅកាន់ CAMSOC ដើម្បី​យក​គ្រូ​មកពី​ក្រៅប្រទេស​បន្ថែម ហើយ​រឿង​ទៅ​ហាត់​នៅ​ប្រទេស​ថៃ នា​ពាក់កណ្ដាល​ខែកក្កដា​នេះ សហព័ន្ធ នឹង​បញ្ជូន​កីឡាករ​ជម្រើសជាតិ​យើង ទៅ​ហាត់​នៅ​ថៃ ដើម្បី​ហ្វឹកហាត់​ជាមួយ​កីឡាករ​ជម្រើសជាតិ​ថៃ ក៏ដូចជា​ហាត់​ជាមួយ​ប្រទេស​ដទៃ​ផ្សេងទៀត នៅ​ទីនោះ​៕/V​