​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន នឹង​អំពាវនាវ​ដល់​ប្រទេស G20 នៅ​សប្តាហ៍​នេះ​ឱ្យ​ដាក់​សម្ពាធ​លើ​រុស្ស៊ី​ដើម្បី​គាំទ្រ​ដល់​កិច្ចខិតខំ​ប្រឹងប្រែង​​របស់​អង្គការសហប្រជាជាតិ​ក្នុង​ការបើកផ្លូវ​សមុទ្រ​ឡើងវិញ ដែល​រារាំង​ដោយ​ជម្លោះ​អ៊ុ​យក្រែន និង​ព្រមាន​ម្តង​ទៀត​ដល់​ប្រទេស​ចិន​កុំឱ្យ​គាំទ្រ​កិច្ចប្រឹងប្រែង​សង្គ្រាម​របស់​ទីក្រុង​មូ​ស្គូ​។​

​លោក​ប្លីង​កិនធ្វើដំណើរ​ទៅ​កាន់​អាស៊ី​នៅ​ថ្ងៃ​ពុធ​នេះ​សម្រាប់​កិច្ចប្រជុំ​ក្រុម​រដ្ឋមន្ត្រីការបរទេស G20 នៅ​កោះ​បាលី​នៅ​ថ្ងៃ​សុក្រ​។ ដំណើរ​ទស្សនកិច្ច​រប​ស់លោក​នឹង​រួមបញ្ចូល​កិច្ចប្រជុំ​លើកដំបូង​របស់​លោក​ជាមួយ​សម​ភាគី​ចិន លោក វ៉ាង យី ចាប់តាំងពី​ខែ​តុលា ប៉ុន្តែ​មិន​មាន​ជំនួប​ណាមួយ​ត្រូវ​បាន​រំពឹង​ទុក​ជាមួយនឹង​រដ្ឋមន្ត្រីការបរទេ​ស​រុស្ស៊ី​លោក សឺ​ហ្គេ ឡាវ​រ៉ូវ នោះទេ​។​

​ក្រុមអ្នកវិភាគ​ប្រមើល​ឃើញ​កិច្ចប្រជុំ​រដ្ឋមន្ត្រី G20​ដ៏​ចម្រូងចម្រាស ដែល​ក្នុង​ទីក្រុង​វ៉ាស៊ីនតោន​និង​សម្ពន្ធមិត្ត​ស្តីបន្ទោស​ទីក្រុង​មូ​ស្គូ​ចំពោះ​កង្វះ​ស្បៀងអាហារ​ជា​សាកល ចាប់តាំងពី​ការ​លុកលុយ​ថ្ងៃទី ២៤ ខែ​កុម្ភៈ​ទៅលើ​អ៊ុ​យក្រែន ដែល​ជា​ប្រទេស​នាំចេញ​គ្រាប់​ធញ្ញជាតិ​ដ៏​សំខាន់ ខណៈ​រុស្ស៊ី​ដែលជា​អ្នក​នាំចេញ​ដ៏​ធំ​ដែរនោះ ស្តីបន្ទោស​ទណ្ឌកម្ម​ដែល​ដឹកនាំ​ដោយ​សហរដ្ឋ​អាម៉េរិក​។​

​លោក រ៉ា​មីន តូ​ឡូ​អ៊ី (Ramin Toloui)​ឧបការី​រដ្ឋមន្ត្រី​ការបរទេស​អាម៉េរិក​ទទួលបន្ទុក​កិច្ចការ​សេដ្ឋកិច្ច​និង​ធុរកិច្ច បាន​ប្រាប់​អ្នកយកព័ត៌មាន​ថា​លោក​ប្លីង​កិន​នឹង​បង្កើន​សន្តិសុ​ខ​ថាមពល​និង​​គំនិត​ផ្តួចផ្តើម​របស់​អ​.​ស​.​ប ដើម្បី​ព្យាយាម​យក​គ្រឿងឧបភោគ​បរិភោគ​រប​ស់អ៊ុយ​ក្រែ​ន​និង​ជី​ររបស់​រុស្ស៊ី​ត្រឡប់​ទៅ​ទីផ្សារ​ពិភពលោក​វិញ​។​

​លោក​បាន​និយាយថា “​បណ្តា​ប្រទេស G20 គួរតែ​ចាប់​រុស្ស៊ី​ឱ្យ​ទទួលខុសត្រូវ​និង​ទទូចថា​ខ្លួន​គាំទ្រ​កិច្ចខិតខំ​ប្រឹងប្រែង​របស់អ​.​ស​.​ប​ដើម្បី​បើកផ្លូវ​សមុទ្រ​ឡើងវិញ​សម្រាប់​ការ​ចែកចាយ​គ្រាប់​ធញ្ញជាតិ​។ មិន​ថា​វា​កើត​ឡើង​នៅ​កម្រិត​ក្រុម​ប្រទេស G20 ឬ​កម្រិត​នៃ​ប្រទេស G20 នី​មួយៗ​នោះទេ នោះ​គឺជា​ចំណុច​សំខាន់​ដែល​លោក​រដ្ឋមន្ត្រី​ប្លីង​កិន​នឹងធ្វើ​”​។​

​អ៊ុ​យក្រែន ដែល​ចោទប្រកាន់​រុស្ស៊ី​ពីបទ​រារាំង​ចរាចរណ៍​នៃ​កប៉ាល់​របស់ខ្លួន បាន​និយាយ​នៅ​សប្តាហ៍​នេះ​ថា ខ្លួន​កំពុង​ជួបពិភាក្សា​ជាមួយ​តួ​ក​គី​និង​អង្គការសហប្រជាជាតិ​ដើម្បី​ទទួលបាន​ការធានា​​សម្រាប់​ការនាំចេញ​គ្រាប់​ធញ្ញជាតិ​។​

​រុស្ស៊ី​បាន​បដិសេធថា​ខ្លួន​មិន​បាន​រារាំង​ការនាំចេញ​គ្រាប់​ធញ្ញជាតិ​ណាមួយ​ឡើយ ហើយ​និយាយ​ថា​អ៊ុយ​ក្រែន​ទេ​គួរតែ​ត្រូវ​ស្តីបន្ទោស​ចំពោះ​កង្វះ​នៃ​ការធ្វើ​បំលាស់​ទីនា​វា​របស់ខ្លួន​ដោយសារ​តែ​អ្វី​ដែល​រុស្ស៊ី​​និយាយថា​ជា​ប្រតិបត្តិការ​ដាក់​មីន​នៅក្នុង​កំពង់ផែ​របស់​ខ្លួន​។​

​អ្នកការទូត​កំពូល​អាម៉េរិក​ប្រចាំ​តំបន់​អាស៊ី​បូ​ព៌ា លោក ដា​នី​ញែល គ្រី​ថិ​ន​ប្រ៊ី​ង (Daniel Kritenbrink) បាន​និយាយថា លោក​រំពឹង​មាន​ការផ្លាស់ប្តូរ ទស្សនៈ​”​ដោយ​ស្មោះត្រង់​” អំពី​អ៊ុ​យក្រែន នៅក្នុង​កិច្ច​ពិភាក្សា​របស់​លោក​ប្លីង​កិន​ជាមួយ​លោកវ៉ាង​របស់​ចិន ដែល​ត្រូវបាន​រំពឹង​ទុក​នៅ​ថ្ងៃ​សៅរ៍​។​

​លោក​បាន​និយាយថា “​នេះ​នឹង​ក្លាយ​ជា​ឱកាស​មួយ​ផ្សេង​ទៀត​…​ដើម្បី​បង្ហាញ​ពី​ការរំពឹងទុក​របស់​យើង​អំពី​អ្វី​ដែល​យើង​រំពឹងថា​ចិន​នឹង​ធ្វើ និង​មិន​ត្រូវ​ធ្វើ​ក្នុង​បរិបទ​អ៊ុ​យក្រែន​”​។​

​មិន​ប៉ុន្មាន​ផង​មុន​ពេល​ការ​លុកលុយ​របស់​រុស្ស៊ី​លើ​អ៊ុ​យក្រែន ទីក្រុង​ប៉េកាំង​និង​ទីក្រុង​មូ​ស្គូ​បាន​ប្រកាសភាព​ជា​ដៃគូ “​គ្មាន​ដែន​កំណត់​”​។ ប៉ុន្តែ​ពួក​មន្ត្រី​អាម៉េរិក​បាន​និយាយថា​ពួកគេ​មិន​បាន​ឃើញ​​ចិន​គេចវេស​ពី​ការដាក់ទណ្ឌកម្ម​ដែល​ដឹកនាំ​ដោយ​សហរដ្ឋ​អាម៉េរិក​លើ​ទីក្រុង​មូ​ស្គូ ឬ​ផ្តល់​ឧបករណ៍​យោធា​ដល់​រុស្ស៊ី​នោះទេ​។​ទោះយ៉ាងណា ចិន​បាន​បដិសេធ​មិន​ថ្កោលទោស​ទង្វើ​របស់​រុស្ស៊ី ហើយ​បាន​​រិះគន់​ទណ្ឌកម្ម​ដ៏​ធំ​នេះ​។ ក្រុមមន្ត្រី​អាម៉េរិក​បាន​ព្រមាន​អំពី​ផលវិបាក រួមទាំង​ការដាក់ទណ្ឌកម្ម ប្រសិនបើ​ចិន​ចាប់ផ្តើម​ផ្តល់ជំនួយ​ជា​សម្ភារៈ​សម្រាប់​កិច្ចខិតខំ​ប្រឹងប្រែង​សង្គ្រាម​របស់​រុស្ស៊ី​៕

​រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន