ដោយៈ ឫទ្ធិ​ស័ក្តិ​/​ភ្នំពេញ៖ ចាប់បាន​ហើយខ្មាន់​កាំ​ភ្លើ​ង​ដែលបាញ់សម្លាប់​អង្គរក្ស​របស់​ឧកញ៉ា​ម្នាក់​នៅក្នុង​ផ្ទះ​វីឡា​កាលពី​រសៀល​ថ្ងៃទី​៥ ខែកក្កដា ឆ្នាំ​២០២២ ។ ​ហេតុការណ៍​ផ្ទុះអាវុធ​នេះ បាន​កើតឡើង​នៅវេលា​ម៉ោងជាង ១​រសៀល ថ្ងៃទី​៥ ខែកក្កដា នៅ​ចំណុច​ផ្ទះ​លេខ ៣៨ ភូមិ​៨ ផ្លូវ​លេខ ៣២២ សង្កាត់​បឹង​កេងកង​១ ខណ្ឌ​បឹង​កេងកង រាជធានី​ភ្នំពេញ​។​


ខ្មាន់កាំភ្លើងត្រូវបានចាប់ខ្លួន(រូបថត សមត្ថកិច្ច)

លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានប្រាប់រស្មីកម្ពុជានៅព្រឹកថ្ងៃទី៦ខែកក្កដានេះថា ជនដៃដល់ត្រូវបានស្វែងរកឃើញនិងចាប់ខ្លួនបានហើយ។ពេលនេះសមត្ថកិច្ចកំពុងធ្វើការសាកសួរតាមនីតិវិធី និងឱ្យជនល្មើសនាំទៅរកអាវុធដែលខ្មាន់កាំភ្លើងបានបាញ់សម្លាប់ជនរងគ្រោះ។

​សមត្ថកិច្ច​នៅ​កន្លែងកើតហេតុ​បាន​ប្រាប់​រស្មី​កម្ពុជា​ថា ជនរងគ្រោះ​ឈ្មោះ គង់ ពិសិដ្ឋ ភេទ​ប្រុស អាយុ​៤២​ឆ្នាំ មុខរបរ​អង្គរក្ស (​មាន​ស្រុកកំណើត​នៅ​ខេត្តព្រៃវែង​)​។ ជនរងគ្រោះ​ត្រូវបាន​ជនសង្ស័យ​បាញ់​ត្រូវ​ខ្លួន​ជាច្រើន​គ្រាប់​បណ្តាល​ឲ្យ​ស្លាប់​នៅនឹងកន្លែង​។ ជនរងគ្រោះស្នាក់នៅ​បន្ទប់​ជួល​ស្ថិតនៅ​ភូមិ​ទួល​ពង្រ សង្កាត់​ត្រពាំង​ក្រឡឹង ខណ្ឌ​ពោធិ៍​សែន​ជ័យ រាជធានី​ភ្នំពេញ​។ចំណែកជនដៃដល់​ឈ្មោះ អ៊ូ សុ​ភី ភេទ​ប្រុស អាយុ​៣៥​ឆ្នាំ ជា​អ្នកបើកបរ មាន​ស្រុកកំណើត​នៅ​ខេត្តកណ្តាល​។

​បើតាម​ការបញ្ជា​ក់រប​ស់​អ្នក​បម្រើការ​នៅផ្ទះ​កើតហេតុ​បាន​ឲ្យ​ដឹងថា ជនរងគ្រោះ​និង​អ្នក​បង្កហេតុ​កន្លង​មក​ពុំដែល​មានទំនាស់​ពាក្យសម្ដី​នឹង​គ្នា​ខ្លាំង​ទេ តែមាន​ការ​អន់​ចិត្តនឹង​គ្នា​ដោយ​ពុំ​សូវ​និយាយស្តី​រកគ្នា​ទេ​។

​សេចក្តីរាយការណ៍​ពី​ភ្នាក់ងារ​រស្មី​កម្ពុជា​ដែល​បាន​ចុះទៅ​កន្លែងកើតហេតុ និង​បាន​ដកស្រង់​ប្រភព​នានា​បាន​ឲ្យ​ដឹងថា នៅ​មុនពេល​កើតហេតុ ជនរងគ្រោះ​បាន​អង្គុយ​នៅលើ​កៅអី​ក្នុង​ប៉ុស្តិ៍​យាម ចំណែក​ជនសង្ស័យ​បាន​បណ្តើរ​ម៉ូតូ​ចេញមក​ខាងក្រៅ​របង​ផ្ទះ បាន​ដក​កាំភ្លើង​បាញ់​សំដៅ​ទៅលើ​ជនរងគ្រោះ​ជាច្រើន​គ្រា​ប់ប​ណ្តា​ល​ឲ្យ​ដេកស្លាប់​នៅលើ​កៅអី​តែម្តង​។ បន្ទាប់ពី​បាញ់​ជេះ​ន​រងគ្រោះ​ជនសង្ស័យ​បាន​ជិះ​ម៉ូតូ​គេចខ្លួនបាត់​៕សរន