​ប្រែ​សម្រួលៈ​បំណង​(​វ៉េ​អ៊ិន​អិច​ស្ព្រេ​ស​)៖ ចោរ​អ៊ីនធឺណិត​ឬ​ហៅ​ថា “​ហែក​ឃឺ​”​ដែល​បាន​លួច​យក​ទិន្នន័យ​ផ្ទាល់ខ្លួន​របស់​ពលរដ្ឋ​ចិន​រាប់រយ​លាន​នាក់ ហើយ​ឥឡូវ​កំពុង​ប្រកាស​លក់​ព័ត៌មាន​សម្ងាត់​ទាំងនេះ​តាម​​អន​ឡាញ​។​

​សំណាក​ចូល​មើល​ទិន្នន័យ​ចំនួន​៧៥០.០០០​បង្ហោះ​ក្នុង​អន​ឡាញ​ដោយ​ហែក​ឃឺ បង្ហាញ​ឈ្មោះ លេខ​ទូរស័ព្ទ លេខ​អត្ត​សញ្ញា​ប័ណ្ណ អស​យដ្ឋា​ន ថ្ងៃ​ខែ​ឆ្នាំ​កំណើត និង​របាយការណ៍​ប៉ូលិស​របស់​ពួកគេ​។​

​ទីភ្នាក់ងារ​សារព័ត៌មាន​បារាំង និង​អ្នកជំនាញ​សន្តិសុខ​អ៊ីនធឺណិត បាន​បញ្ជាក់ថា​ពិត​ចំពោះ​ទិន្នន័យ​របស់​ពលរដ្ឋ​ចិន​ខ្លះ​នៅក្នុង​សំណាក​ដែល​ជន​ហែក​ឃឺ​បាន​បង្ហោះ​គំរាម តែ​វិសាលភាព​នៃ​ឃ្លាំង​ទិន្ន​​ន័យ​ទាំងមូល​ពិបាក​កំណត់ មានន័យថា ថា​តើ​ព័ត៌មាន​ផ្ទាល់ខ្លួន​របស់​ជនជាតិ​ចិន​ប៉ុន្មាន​លាន​នាក់​បាន​ធ្លាក់​ក្នុង​ដៃ​ចោរ​នៅ​មិនទាន់​ដឹង​ច្បាស់​នៅឡើយ​។​

​ការផ្សាយ​ឃោសនា​លក់​នៅ​លើ​កម្មវិធី​មួយ​កាលពី​ចុង​ខែ​មុន​តែ​ទើប​អ្នកជំនាញ​សន្តិសុខ​អ៊ីនធឺណិត​ចាប់អារម្មណ៍​នៅ​សប្តាហ៍​នេះ​។​វា​ជាឃ្លាំង​ទិន្នន័យ​២៣​តេ​រ៉ាប៉ៃ​(terabyte)​ដែល​ជន​ហែ​កឃឺអះអាង​​ថា​ផ្ទុក​កំណត់ហេតុ​របស់​ជនជាតិ​ចិន​១​ពាន់​លាន​នាក់ ហើយ​កំពុង​ត្រូវ​ដាក់​លក់​តំលៃ​១០​ប៊ិត​ខ័​ញ​(​លុយ​អេឡិចត្រូនិច​)​ប្រហែល​២០​ម៉ឺន​ដុល្លារ​។​

​រ៉ូ​ប៊ឺត ផត់​ធឺ​(Robert Potter)​សហ​ស្ថាបនិក​ក្រុមហ៊ុន​សន្តិសុខ​អ៊ីនធឺណិត​Internet 2.0 បាន​និយាយថា «​វា​ហាក់ដូចជា​ចេញ​ពី​ប្រភព​ជាច្រើន​។​ខ្លះ​ជា​ប្រព័ន្ធ​សំគាល់​ផ្ទៃមុខ ខ្លះទៀត​ជា​ទិន្នន័យ​​ជំរឿន​ប្រជាជន​។​មិន​មាន​ការបញ្ជាក់​អំ​ពី​ចំនួន​ទិន្នន័យ​ប៉ុន្មាន​ធ្លាក់​ក្នុង​ដៃ​ចោរ​អ៊ីនធឺណិត​ទេ និង​ខ្ញុំ​ក៏​មិន​ជឿថា ១​ពាន់​លាន​ដែរ​»​។​

​សូមបញ្ជាក់​ថា ទិន្នន័យ​ផ្ទាល់ខ្លួន​របស់​ពលរដ្ឋ​ចិន​ដែល​ត្រូវ​ស្តុក​ទុក​ក្នុង​ឃ្លាំង​ទិន្នន័យ​ជាតិ​មាន​ចាប់តាំងពី​គ្រោះថ្នាក់​ចរាចរណ៍ ចោរកម្ម​តូចតាច​និង​អំពើ​ហិង្សា​ក្នុង​គ្រួសារ​រហូតដល់​ការចាប់រំលោភ​។​​ទិន្នន័យ​ដែល​ចោរ​លួច​និង​ដាក់លក់​រួមមាន​ឈ្មោះ លេខ​ទូរស័ព្ទ លេខ​អត្តសញ្ញាណប័ណ្ណ អស​យដ្ឋា​ន ថ្ងៃ​ខែ​ឆ្នាំ​កំណើត​និង​របាយការណ៍​ប៉ូលិស​ចំពោះ​សាមីខ្លួន​៕

​ទិន្នន័យ​ផ្ទាល់ខ្លួន​របស់​ពលរដ្ឋ​ចិន​រាប់រយ​លាន​នាក់​ត្រូវ​ចោរ​ដាក់លក់​