​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អ្នកវិទ្យាសាស្ត្រ​បាន​ប្រទះ​ឃើញ​ត្រី​ថ្លា​មើលឃើញ​ធ្លុះ​ដ៏​កម្រ​មួយ​ក្បាល និង​សត្វ​ពីងពាង​សមុទ្រ​ដ៏​ធំ​សម្បើម​មួយ​នៅក្នុង​ទឹកសមុទ្រ​ក្បែរ​រដ្ឋ​អា​ឡា​ស្កា​។​

​ត្រី​ថ្លា​នេះ​ត្រូវ​គេ​ស្គាល់​ថា​ជា​ត្រី​ខ្យង​ពពាល ហើយ​ឈ្មោះ​បច្ចេកទេស​របស់​វា​គឺ Crystallichthys Cyclospilus ។​

​ត្រី​នេះ​មាន​រូបរាង​ដ៏​ចម្លែក ដោយ​មាន​រាងកាយ​ថ្លា​លាយ​ពណ៌​ក្រហម​ក្រ​ម៉ៅ ដែល​អនុញ្ញាត​ឱ្យ​វា​លាក់​ខ្លួន​យ៉ាង​ងាយស្រួល​នៅ​បាត​មហាសមុទ្រ​ងងឹត ដែល​កម្រ​ឃើញ​ពន្លឺព្រះអាទិត្យ​។​

​លោកស្រី សា​រ៉ា ហ្វ្រី​ដ​មែន (Sarah Friedman) ជីវ​វិទូ​ត្រី​នៅ​រដ្ឋបាល​មហាសមុទ្រ​និង​បរិយាកាស​ជាតិ​របស់​អាម៉េរិក (NOAA) បាន​សរសេ​រលើ Twitter ថា “​សង្ឃឹម​បានឃើញ​ផ្ទាល់​នូវ​សត្វ​ទាំងនេះ​ជា​យូរ​មក​ហើយ​!”​។​

​លោកស្រី​ហ្វ្រី​ដ​មែន​និង​ក្រុម​របស់​លោកស្រី​បានឃើញ​ត្រី​នេះ​ក្នុងអំឡុងពេល​ការ​អង្កេត​និង​ជំរឿន​សត្វ​សមុទ្រ​មួយ ដែល NOAA បាន​ធ្វើ​នៅ​កោះ​អាឡឺ​ហ្សិន (Aleutian) នៃ​រដ្ឋ​អា​ឡា​ស្កា​ជា​រៀងរាល់ឆ្នាំ​។​

​លោកស្រី​ហ្វ្រី​ដ​មែន​បាន​ប្រាប់​វេបសាយ Mashable ថា “​យើង​បាន​រកឃើញ​ត្រី​នេះ ៤ ឬ ៥ ក្បាល​រហូតមកទល់​ពេលនេះ ក្នុង​រយៈពេល​ពីរ​បី​សប្តាហ៍​ដែល​យើង​បាន​ចេញ​ទៅ​ក្រៅ​”​។​

​ទោះយ៉ាងណា មនុស្ស​ធម្មតា​ទំនងជា​មិន​ធ្លាប់​ឃើញ​ត្រី​ពិសេស​បែបនេះ​នោះ​ទេ​។​

​លោកស្រី​បាន​បកស្រាយ​ថា “​ត្រី​នេះ​ត្រូវបាន​រកឃើញ​នៅ​ជម្រៅ​ពី ១០០ ទៅ ២០០ ម៉ែត្រ​។ ដូច្នេះ​ខ្ញុំ​ចង់​និយាយ​ថា មនុស្ស​ធម្មតា​ទូទៅ​នឹង​មិន​ដែល​ជួប​ត្រី​មួយ​ប្រភេទ​នេះ​ទេ​”​។​

​ក្រុម​របស់​លោកស្រី​ក៏​បាន​រក​ឃើញ​សត្វ​ពីងពាង​សមុទ្រ​ពណ៌​ទឹកក្រូច​ដ៏​ធំ​មួយ​ក្បាល​ផងដែរ ដែល​មាន​ជើង​មើល​ទៅ​ដូច​ជា​សសរឈើ ដែល​គេ​ស្គាល់​ថា Colossendeis​។​

​ពីងពាង​នេះ​អាច​លូត​រហូត ២០ អ៊ី​ញ និង​រស់នៅ​បាតសមុទ្រ​ជម្រៅ​ពី ២.២០០ ម៉ែត្រ ទៅ ៤.០០០ ម៉ែត្រ​៕

​ត្រី​ថ្លា Crystallichthys Cyclospilus និង​ពីងពាង​សមុទ្រ​យក្ស Colossendeis ត្រូវបាន​រកឃើញ​នៅ​សមុទ្រ​ក្បែរ​រដ្ឋ​អា​ឡា​ស្កា​