ដោយៈ សៅ​វ៉ាន់ឌី / ព្រះវិហារ​៖ នាយ​ឧ​ត្ត​ម​សេនីយ៍ សៅ សុខា អគ្គ​មេបញ្ជាការរង នៃ​កងយោធពល​ខេមរភូមិន្ទ និង​ជា​មេបញ្ជាការ កងរាជអាវុធហត្ថ​លើ​ផ្ទៃ​ប្រទេស នៅ​ថ្ងៃទី​៦ ខែកក្កដា ឆ្នាំ​២០២២ បាន​អញ្ជើញ​ជា​អធិបតីភាព ក្នុង​ពិធី​បញ្ចុះបឋមសិលា​សាង​សង់ បញ្ជាការដ្ឋាន​កងរាជអាវុធហត្ថ​ខេត្តព្រះវិហារ​។​

​លោក កង សៅ​គុណ មេបញ្ជាការ​កងរាជអាវុធហត្ថ​ខេត្តព្រះវិហារ បាន​ឲ្យ​ដឹងថាៈ បញ្ជាការដ្ឋាន​កងរាជអាវុធហត្ថ ខេត្តព្រះវិហារ​ថ្មី ដែលមាន​អគារ​សេនាធិការដ្ឋាន​ថ្មី ទំហំ​១១​ម៉ែត្រ គុណ​៥៦​ម៉ែត្រ មាន​កម្ពស់ ៣​ជាន់ ដោយ​ប្រើ​រយៈពេល​សាងសង់ ចំនួន​៣៦ គម្រោង​ចំណាយ​ថវិកា សរុប​ប្រមាណ​ជាង ៦៥ ម៉ឺន​ដុល្លារ ដោយ​មិនទាន់​គិត​បញ្ចូល​នូវ ការ​បំពាក់គ្រឿងសង្ហារឹម​នៅឡើយ​។​

​លោក​មេបញ្ជាការ កងរាជអាវុធហត្ថ​ខេត្តព្រះវិហារ មាន​ក្តីសង្ឃឹម យ៉ាង​មុតមាំ ថា​នឹងមាន ការចូលរួម​ជួយឧបត្ថម្ភ​គាំទ្រ ពី​សំណាក់​សប្បុរសជន ដោយបាន​ការផ្តល់​កិត្តិយស ដ៏​ខ្ពង់ខ្ពស់​ពី​សំណាក់ លោក​ឧកញ៉ា លោក លោកស្រី ប្រធាន​ស្ថាប័ន អង្គភាព​ជុំវិញ​ខេត្ត និង​សប្បុរសជន​នានា ដើម្បី​ឲ្យ​ដំណើរការ​សាងសង់ សម្រេចបាន​ជោគជ័យ​។​

​លោក​ឧ​ត្ត​ម​សេនីយ៍​ត្រី មេបញ្ជាការ ក៍បាន​បញ្ជាក់ទៀតថា កិច្ចដំណើរការ​សាងសង់​បញ្ជាការ ដ្ឋា​ន កងរាជអាវុធហត្ថ​ខេត្តព្រះវិហារ​ថ្មី ក្នុង​ពេលនេះ អង្គភាព​របស់លោក មាន​កិត្តិយស​បានទទួល​ការជួយឧបត្ថម្ភ​ថវិកា ពី​សំណាក់​នាយ​ឧ​ត្ត​ម​សេនីយ៍ សៅ សុខា អគ្គ​មេបញ្ជាការរង នៃ​កងយោធពល​ខេមរភូមិន្ទ មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស ចំនួន ១០ ម៉ឺន​ដុល្លារ ដើម្បី​ទ្រទ្រង់​ដល់​ការសាងសង់​អគារ​សេនាធិការដ្ឋាន​នេះ​៕/V​.mara