​ដោយ : ភ្នំ​ស្វាយ / ស្រះកែវៈ សហគមន៍​ទឹកដោះគោ ​វ៉ាង​ណាំ​យ៉ិ​ន​ ( Wangnamyen Diary Co-operative Ltd) នៅ​ស្រុក​វ៉ាង​ណាំ​យ៉ិ​ន​ ខេត្ត​ស្រះកែវ ប្រទេស​ថៃ​ បន្ត​សហប្រតិបត្តិការ​នឹង​ឧទ្យាន​រាជបណ្ឌិតសភា​កម្ពុជា តេ​ជោ​សែន ​ឫស្សី​ត្រឹប ឃុំ​ឆែប​២ ​ស្រុក​ឆែប​ខេត្តព្រះវិហារ ។​

​លោក​វរសេនីយ៍​ តាអំនួយ ថងគុត ប្រធាន​សហគមន៍​​ទឹកដោះគោ ​វ៉ាង​ណាំ​យ៉ិ​ន ជម្រាប​ប្រតិភូ​ពាណិជ្ជករ អាជីវករ វិស័យ​ឯកជន ​នៃ​សហគ្រាស​ធុន​តូច​ និង​មធ្យម​កម្ពុជា មកពី​ខេត្ត​មួយចំនួន ​ដែលជា​ប់​ឬ​ជិត​ព្រំដែន​ កាលពី​ថ្មីៗ  នេះ​ថា​: សហករណ៍​មាន​សមាជិក​ច្រើន​នាក់​/​គ្រួសារ នៅក្នុង​ខេត្ត ហើយ​មាន​គោ​ញី​ទឹកដោះ​ចំនួន ៨.០០០​ក្បាល ដែលជា​ពូជ​ពី​ប្រទេស​ហូ​ឡង់ និង អាមេរិក ជាដើម ។​

​លោក​បានបន្តថា​: លទ្ធផល​នោះ ជាការ​អនុវត្តតាម​ព្រះរាជតម្រិះ​ព្រះករុណា​អម្ចាស់​តម្កល់​លើ​ត្បូង ព្រះមហាក្សត្រ និង​គោលនយោបាយ​របស់​រាជ​រដ្ឋាភិបាល​ថៃ​ តាមរយ​:​ក្រសួងកសិកម្ ម​និង​សហករណ៍ ព្រមទាំង​កិច្ចសហការ បង្កលក្ខណ​:​ងាយស្រួល ​ពី​អាជ្ញា​ធរមាន​សមត្ថកិច្ច​ នៃ​ផ្នែក​សាធារណ​:​ និង​ពី​ដៃគូ​ផ្នែក​ឯកជន ។​

​លោកតា​អំនួយ ថងគុត បានបន្តទៀតថា​: ជាង​១០០ ​ឆ្នាំ​មកហើយ ​ដែល​សហករណ៍​ បាន​ដំណើរការ ក្នុងនោះ បានធ្វើការ​ជាមួយ​កម្ពុ​ជា ជាង​ ៤០​ ឆ្នាំ​ហើយ ។​

កាល​ប្រទេស​កម្ពុ​ជា មាន​សង្គ្រាមស៊ីវិល ក្រុមហ៊ុន​នេះ ​ក៏បាន​ធ្វើការ​ជាមួយ​កម្ពុជា​ដែរ គឺ​បានរៀបចំ​អំណោយ​ជា​ស្បៀងអាហារ ថ្នាំសង្កូវ​ និង​សម្ភារ​:​ប្រើប្រាស​ ជូន​ជនភៀសខ្លួន ​និង​ជនភៀសសឹក ។​ ក្នុងនោះ ឯខាង​ក្នុង​សហករណ៍ ក៏បាន​ទទួល​ពលរដ្ឋ​កម្ពុជា ​ឱ្យចូល​ធ្វើការ​ផងដែរ ។​

លុះ​កម្ពុជា​ បាន​ចប់​សង្គ្រាម ​ពី​ឆ្នាំ​១៩៩៣ ​និង​ពី​ឆ្នាំ​១៩៩៨ មក សហគមន៍ បាន​ប្តូរ​ពី​ផ្តល់​អំណោយ​ដល់​ពលរដ្ឋ​កម្ពុជា មកជា​ទទួល​បណ្តុះបណ្តាល​បច្ចេកទេស​ជំនាញ ធនធានមនុស្ស​ ដល់​យុវជន​កម្ពុជា ​និង​ទទួល​ឱ្យចូល​ធ្វើការ​ ក្នុង​រោងចក្រ​ផលិត​ ទឹកដោះគោ ​វ៉ាង​ណាំ​យ៉ិ​ន​នេះ ។​

​បច្ចុប្បន្ន មាន​ពលករ​កម្ពុជា​ ៨​នាក់​ បាន​នឹង​កំពុងធ្វើការ ​នៅក្នុង​កសិដ្ឋាន​ និង​រោងចក្រ ជាមួយនឹង​ប្រាក់​ឈ្នួល ​និង​ល័ក្ខខ័ណ្ឌ​ការងារ​ស្របតាម​ច្បាប់​ការងារ (​មាន​កន្លែង​ស្នាក់នៅ មាន​អាហារ​ឧបត្ថម្ភ និង​សេវា​រ៉ាប់រង​សុខភាព ម៉ោង​ធ្វើការ ការឈប់​សម្រាក​) ។​

​សហករណ៍​​ទឹកដោះ​គោនេះ ​ក៏បាន​ធ្វើ​សហប្រតិបត្តិការជិតស្និទ្ធ​កសិដ្ឋាន​​ទឹកដោះ​គោ នៃ​ឧទ្យាន​រាជបណ្ឌិតសភា​កម្ពុជា តេ​ជោ​សែន​ឫស្សី​ត្រឹប ឃុំ​ឆែប​២​ ស្រុក​ឆែប​ ខេត្តព្រះវិហារ​ពី​ឆ្នាំ​២០១៩ មក ផងដែរ។​ ​ក្នុងនោះ មានការ​ផ្តល់​ពូជ​គោ ការបណ្តុះបណ្តាល​បច្ចេក​ទេស​ចិញ្ចឹម ថែទាំ ការយក​ទឹកដោះ សំបក​វេច​ខ្ចប់ ជាដើម​។​

​លោក​វរសេនីយ៍ ​តាអំនួយ ថងគុត បាន​បន្តថា: កាលពី​ថ្ងៃទី​១ ​ខែកក្កដា ឆ្នាំ​២០២២ សហគមន៍បាន​អញ្ជើញ​ប្រតិភូ​២ ចូល​ទស្សនកិច្ច​ នៅ​កន្លែង​ខ្លួន គឺ​ប្រតិភូ​ពាណិជ្ជករ អាជីវករ វិស័យ​ឯកជន​ នៃ​សហគ្រាស​ធុន​តូច ​និង​មធ្យម​កម្ពុជា មកពី​ខេត្ត​មួយចំនួន ​នៃ​ការ​បើក​កម្មវិធី “​ការតភ្ជាប់​និង​ផ្គូរផ្គង​ច​រចារដៃគូ​ពាណិជ្ជកម្ម សហគ្រាស​ខ្នាតតូច​ និង​មធ្យម​ ឆ្នាំ​២០២២ ” (Business B2B SMEs Thailand -Cambodia ) ថ្ងៃទី​៣០​ ខែមិថុនា ​- ២​ ខែកក្កដា​ ឆ្នាំ​២០២២ ដែលដឹកនាំ​ដោយ​លោក​វេជ្ជបណ្ឌិត​ ឈុំ វណ្ណា​រឹទ្ធិ អនុរដ្ឋលេខាធិការ លោក​​ដុំ វណ្ណឌី អនុប្រធាន​មន្ទីរ​ពាណិជ្ជកម្ម​ខេត្តបន្ទាយមានជ័យ លោក ​ហ៊ិ​ន វុ​ឌ្ឍី អនុប្រធាន​មន្ទីរ​ពាណិជ​កម្ម​ខេត្តបាត់ដំបង តំណាង​សភាពាណិជ្ជកម្ម​ខេត្ត​នានា និង​កញ្ញា ​នុង​យ៉ៅ ស៊ី​ចាន់ថា​មី​ត ប្រធាន​មន្ទីរ​ពាណិជ្ជកម្ម​ខេត្ត​ស្រះកែវ ​និង​លោកស្រី ​ប្រធានសភា​ពាណិជ​កម្ម​ខេត្ត ​


​និង​ប្រតិភូ​ឧទ្យាន​រាជបណ្ឌិតសភា​កម្ពុជា តេ​ជោ​សែន​ ឫស្សី​ត្រឹប ឃុំ​ឆែប​២ ​ស្រុក​ឆែប ​ខេត្តព្រះវិហារ ដឹកនាំ​ដោយ​លោក​បណ្ឌិត ​សុខ ទូច ប្រធាន​រាជបណ្ឌិតសភា​កម្ពុជា ។​

​ក្នុងនោះដែរ សហគមន៍ ក៏​កំពុង​រៀបចំ​ទស្សនកិច្ច​របស់​ប្រតិភូ​សហករណ៍ ​ដឹកនាំ​ដោយ​លោក​វរសេនីយ៍​ តាអំនួយ ថងគុត ទៅកាន់​ឧទ្យាន​ឫស្សី​ត្រឹប ។​

​លោក ចាន់ វណ្ឌី ប្រធាន​ទទួលបន្ទុក​ផ្នែក​រោង​​ទឹកដោះគោ ​នៃ​ឧទ្យាន​រាជបណ្ឌិតសភា​កម្ពុជា តេ​ជោ​សែន ​ឫ​ស្សី​ត្រឹប បាន​ប្រាប់​កាសែត​រស្មី​កម្ពុជា ​នៅ​ថ្ងៃទី​៦​ ខែកក្កដា​ថា​: កសិដ្ឋាន​ចិញ្ចឹម​គោ​យកទឹកដោះ​នេះ បាន​បង្កើតឡើង ​ពី​ឆ្នាំ​២០១៨​ មក លើ​ផ្ទៃដី​ចម្ការ​ស្មៅ ​ទំហំ ​២០០​ហិក​តា​ លើ​ផ្ទៃ​រួម​នៃ​ឧទ្យាន​ទំហំ​ ១១ ​ម៉ឺន​ហិក​តា​ ។​

​លោក​បានបន្តថា: :ក្នុងនោះ កសិដ្ឋាន​ បានទទួល​គោយក​ទឹកដោះ​ពូជ​អូ​ស្ទី​ន ​ពី​សហករណ៍​វ៉ាង​ណាំ​យ៉ិ​ន ហើយ​បច្ចុប្បន្ន មេ​និង​កូន​គោ​ មាន​ចំនួន​ ១០០​ ក្បាល ។​

​អំពី​កិច្ចសហប្រតិបត្តិការ​ជាមួយសហគមន៍ទឹកដោះគោ ​វ៉ាង​ណា​យ៉ិ​ន បាន​ដំណើរ​ការល្អ និង​ហុច​ផ្លែផ្កា ។ ក្នុងនោះ ​សហករណ៍​ បានផ្តល់​ពូជ​គោ បញ្ជូន​អ្នកបច្ចេកទេស​ មក​កម្ពុ​ជា​ ឬ​ទទួល​អ្នកបច្ចេកទេស​កម្ពុជា ​ទៅធ្វើ​ការបណ្តុះបណ្តាល​បច្ចេក​ទេស​ចិញ្ចឹម ថែទាំ ការយក​ទឹកដោះ សំបក​វេច​ខ្ចប់ ជាដើម​។​

​លោក​ចាន់ វណ្ឌី បានបន្តថា: ប៉ុន្តែ​គួរឱ្យស្តាយ ដោយ​ជិត ​៣ ​ឆ្នាំ​មកនេះ មនុស្ស​ និង​កន្លែង​ទាំងពីរ​ មិនអាច​ជួប ​និង​ធ្វើការ​ជាមួយគ្នា​បាន​ ព្រោះ​ការរីក​រាលដាល​ជំងឺកូ​វីដ​១៩ ហេតុនេះ​បានជា​ពេល​ថៃ បើ​ប្រទេស​ឡើងវិញ សហករណ៍ ​ក៏​អញ្ជើញ​ប្រតិភូ​កម្ពុជា ​ដូចខាងលើ ​ទៅធ្វើ​ទស្សនកិច្ច​ នៅ​សហករណ៍​ ដើម្បី​ផ្លាស់ប្តូរ​ព័ត៌មាន ការពិភាក្សាគ្នា ​ដើម្បី​បន្ត​និង​បង្កើន​ទំនាក់ទំនង កិច្ចសហប្រតិបត្តិការ​៕​.mara /V