​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រធានាធិបតី​ហ្វីលីពីន​ថ្មី​លោក ហ្វែរ​ឌីណ​ង់ ម៉ាកូ​ស ជូនៀ (Ferdinand Marcos Jr.)​នឹង​ជួប​ជាមួយ​អ្នកការទូត​កំពូល​របស់​ចិន​នៅ​ថ្ងៃ​ពុធ​នេះ​ដើម្បី​​ពិភាក្សា​អំពី​ជម្លោះ​ត្រាំត្រែង​នៅ​សមុទ្រ​ចិន​ខាងត្បូង ខណៈ​រូបលោក​ឈាន​ជើង​ចូលទៅ​ក្នុង​បញ្ហានយោបាយ​ការបរទេស​ដែល​រួម​មាន​ការ​ប្រជែង​គ្នា​រវាង​សហរដ្ឋ​អាម៉េរិក​និង​ចិន​នៅក្នុង​តំបន់​។​

​រដ្ឋមន្ត្រីការបរទេស​ចិន​លោក វ៉ាង យី ដែល​ពាក់​អាវ​ប្រពៃណី​ផ្លូវការ​របស់​ហ្វីលីពីន បាន​ជួប​សម​ភាគី​របស់​លោក ដើម្បី​ពិភាក្សា​នៅ​ក្រសួង​ការបរទេស​ក្នុង​ទីក្រុង​ម៉ានីល​។ ​មន្ត្រី​ហ្វីលីពីន​មួយរូប​បាន​និយាយថា គាត់​គ្រោង​នឹង​ជួប​លោក​ម៉ាកូ​ស​ជូនៀ នៅ​ពេល​រសៀល​ថ្ងៃ​ពុធ​នេះ​នៅឯ​វិមាន​ប្រធានាធិបតី និង​ពាំនាំ​ការអញ្ជើញ​របស់​ប្រធានាធិបតី​ចិន ស៊ី ជីន​ភីង​សម្រាប់​​គាត់​ទៅ​បំពេញ​ទស្សនកិច្ច​នៅ​ទីក្រុង​ប៉េកាំង​។​

​លោក​វ៉ាង​បាន​មក​ដល់​ទីក្រុង​ម៉ានីល​កាលពី​យប់​ថ្ងៃ​អង្គារ ជា​ផ្នែក​នៃ​ដំណើរ​មក​កាន់​អាស៊ីអាគ្នេយ៍ ដែល​បាន​នាំ​គាត់​ទៅកាន់​មី​យ៉ាន់​ម៉ា​និង​ថៃ​មុននេះ​។ លោក​ក៏​នឹង​ទៅ​បំពេញ​ទស្សនកិច្ច​នៅ​ម៉ាឡេស៊ី​និង​ឥណ្ឌូណេស៊ី​ផងដែរ ជា​ទី​ដែល​លោក​នឹង​ចូលរួម​កិច្ចប្រជុំ​រដ្ឋមន្ត្រីការបរទេស G20 នៅ​កោះ​បាលី​។​

​ដំណើរ​ទស្សនកិច្ច​រប​ស់លោក​វ៉ាង​បាន​រុញ​លោក​ម៉ាកូស​ឱ្យ​ឆាប់​ជួប​ជាមួយ​នឹង​បញ្ហា​ការទូត​បរទេស ដែល​ជា​ញឹកញយ​បាន​ជំរុញ​អ្នក​កាន់​តំណែង​មុនៗ​របស់​លោក​ឱ្យ​ថ្លឹងថ្លែង​យ៉ាង​ប្រុងប្រយ័ត្ន​បំផុត​។ លោក​ម៉ាកូ​សបាន​ស្បថ​ចូលកាន់​តំណែង​កាលពី​សប្តាហ៍​មុន បន្ទាប់​ពី​ឈ្នះ​ការបោះឆ្នោត​ភ្លូកទឹកភ្លូកដី​កាលពី​ខែ​ឧសភា​។​

​លោក​បាន​និយាយ​នៅក្នុង​សន្និសីទ​សារព័ត៌មាន​តាម​ទូរទស្សន៍​កាលពី​ថ្ងៃ​អង្គារ​ថា​លោក​នឹង​ពិភាក្សា​ជាមួយ​លោក​វ៉ាង​អំពី​មធ្យោបាយ​ដែល​អាច​ធ្វើទៅបាន​ដើម្បី​ដោះស្រាយ​ជម្លោះ​របស់​ទីក្រុង​ម៉ានីល​​ជាមួយ​ទីក្រុង​ប៉េកាំង​នៅ​សមុទ្រ​ចិន​ខាងត្បូង​ដែល​មាន​ជម្លោះ ប៉ុន្តែ​ក៏​នឹង​ស្នើ​ឱ្យ​ពង្រីក​ទំនាក់ទំនង​បន្ថែម​ទៀត​ផង​ដែរ​។​

​លោក​ម៉ាកូស​បាន​និយាយ​ដោយ​ប្រើ​ឈ្មោះ​សមុទ្រ​ដែល​ហ្វីលីពីន​និយម​ហៅ​សម្រាប់​ដែនទឹក​ជម្លោះ​នេះ យ៉ាង​ដូច្នេះ​ថា “​ចិន​និង​ហ្វីលីពីន​គួរតែ​ពិភាក្សា​គ្នា​មិន​ត្រឹមតែ​អំពី​សមុទ្រ​ហ្វីលីពីន​ខាងលិច​នោះ​ទេ​។ តោះ​សូម​ធ្វើ​រឿង​ផ្សេង​ទៀត​ផង​។ វា​នឹង​ធ្វើឱ្យ​ទំនាក់ទំនង​របស់​យើង​មាន​ភាពប្រក្រតី​”​។​

​លោក​បាន​និយាយថា “​យើង​មាន​សំណើ​ជា​ច្រើន​ដល់​ពួកគេ ក្នុងន័យ​នេះ​ដូចដែល​ខ្ញុំ​បាន​និយាយ យើង​ចង់ឱ្យ​ពួក​យើង​ទាំង​ពីរ​បង្កើន​វិសាលភាព​”​ហើយ​លោក​បាន​លើកឡើង​ពី​លទ្ធភាព​ពង្រីក​ការផ្លាស់​​ប្តូរ​វប្បធម៌ ការអប់រំ និង​យោធា​ផងដែរ​។​

​លោក​មិន​បាន​រៀបរាប់​អំពី​របៀប​ដែល​លោក​នឹង​ដោះស្រាយ​បញ្ហា​ទឹកដី​នោះទេ ប៉ុន្តែ​បាន​បង្ហាញថា ជាទូទៅ​លោក​នឹង​ធ្វើ​តាម​វិធីសាស្ត្រ​របស់​អ្នក​កាន់​តំណែង​មុន​របស់​ខ្លួន​គឺ​លោក រ៉ូ​ឌ្រី​ហ្គោ ឌុយ​ទែត ដែល​ផ្តោត​លើ​ការបង្កើន​ការចូលរួម​ជាមួយ​ចិន​៕

​រដ្ឋមន្ត្រីការបរទេស​ហ្វីលីពីន លោក អិន​រីកេ ម៉ា​ណា​ឡូ (​ឆ្វេង​) និង​រដ្ឋមន្ត្រី​ការបរទេស​ចិន​លោក​វ៉ាង យី ជួប​ពិភាក្សា​គ្នា​នៅ​ទីក្រុង​ម៉ានីល​នៅ​ព្រឹក​ថ្ងៃ​ពុធ​នេះ