​ដោយៈ ទេ​ពក​ង្រី / កំពង់ឆ្នាំងៈ នៅ​ថ្ងៃទី​៦ ខែកក្កដា ឆ្នាំ​២០២២ លោក អម សុភា អភិបាលរង​ខេត្តកំពង់ឆ្នាំង បាន​អញ្ជើញ​ជា​អធិបតីភាព ក្នុង​ពិធី​បើក​វគ្គ​បណ្តុះបណ្តាល ស្តីពី ការថែទាំ​សុខភាព​មាតា និង​ទារក និង​ដោយមាន​ការចូលរួម​ពី​លោក វេជ្ជបណ្ឌិត ប្រាក់ វ៉ុ​ន ប្រធាន​មន្ទីរ​សុខាភិបាល​ខេត្ត និង​លោក ហ្វី​លី​ប អេ​រីត​ឃី​ត​ឈឺ នាយក​ប្រតិបត្តិ​មូលនិធិ ទឹកស្អាត និង​ថែទាំ​សុខភាព ព្រមទាំង​ក្រុមគ្រូពេទ្យ នៃ​មន្ទីរ​សុខាភិបាល ផងដែរ​។​

​វគ្គ​បណ្តុះបណ្តាល​នេះ មាន​រយៈពេល ២​ថ្ងៃ គឺ​ថ្ងៃទី ៦-៧ ខែកក្កដា ឆ្នាំ​២០២២ រៀបចំឡើង ដោយ​មន្ទីរ​សុខាភិបាល​ខេត្ត និង​មូលនិធិ​ទឹកស្អាត និង​គាំពារ​សុខភាព ។​

​ក្នុងឱកាស​នោះ លោក អម សុភា បាន​មានប្រសាសន៍ថាៈ ការបើក​វគ្គ​បណ្តុះបណ្តាល រំលឹក​ឡើងវិញ នៅពេលនេះ គឺជា​ស្នូល​នៃ ភាព​ពង្រឹងសមត្ថភាព ធនធានមនុស្ស ក្នុងការ​ថែទាំ​សុខភាព​មាតា​និង​ទារក គឺជា​ការប្រសើរ ដែល​យើង​បានគិត​គូរ ដល់​អ្នកផ្តល់​សេវា សក្តិ​សមជា​អ្នកផ្តល់​សេវា ប្រកបដោយ​គុណភាព ជាពិសេស​មន្ត្រី​ឆ្មប ។​

​អភិបាលរង​ខេត្តកំពង់ឆ្នាំង បាន​មានប្រសាសន៍​បន្តថាៈ ជាការ​ពិតណាស់ រាជរដ្ឋាភិបាល កម្ពុជា ក្រោម​ការដឹកនាំ ប្រកបដោយ​កិត្តិ​បណ្ឌិត​របស់ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បានដាក់​ចេញ​នូវ​យុទ្ធសាស្ត្រ​ចតុកោណ ដំណាក់កាល​ទី​៤ ដោយ​ផ្តោតលើ​ការយកចិត្តទុកដាក់ លើ​ការលើកកម្ពស់ សេវា​សុខភាព សាធារណៈ និង​អាហារូបត្ថម្ភ​គាំទ្រ ដល់​ការអភិវឌ្ឍ​ធនធានមនុស្ស កំណើនសេដ្ឋកិច្ច និង​វឌ្ឍនភាព​សង្គម ប្រកបដោយ​ចីរភាព ។​

​ក្នុងឱកាស​នោះដែរ អភិបាលរង​ខេត្ត បាន​ថ្លែងអំណរគុណ ចំពោះ​សប្បុរសជន នៃ​ប្រជាជន សឹង្ហ​បូរី តាមរយៈ​លោក ហ្វី​លី​ប ដែល​បាន​ផ្តល់ជំនួយ​ឧបត្ថម្ភ ដល់​វគ្គ​បណ្តុះបណ្តាល​នេះ​។​

​នៅ​ចុងបញ្ចប់ អភិបាលរង​ខេត្តកំពង់ឆ្នាំង ក៏បាន​ណែនាំ​ដល់​សិក្ខាកាម ដែលជា​មន្ត្រី​ឆ្មប ត្រូវ​ក្រេប​យកចំណេះ​ដឹង​បន្ថែម ព្រមទាំង​បន្ត​ខិតខំ​យកចិត្តទុកដាក់ ថែទាំ​សុខភាព​មាតា និង​ទារក ដើម្បី​ជា​ធនធានមនុស្ស ប្រកប​ជំនាញ បទពិសោធន៍ និង​គុណធម៌ ត្រូវ​យកចិត្តទុកដាក់ ផ្តល់​សេវា​ជូន​អតិថិជន ដោយ​ការគោរព ហើយ​សង្ឃឹមថា លោកគ្រូ អ្នកគ្រូ​ពេទ្យ ដែល​ចូលរួម​ក្នុង​វគ្គ បណ្ដុះបណ្ដាល ថ្ងៃនេះ បន្ត​ខិតខំ​ប្រឹងប្រែង​រៀនសូត្រ និង​យក​ចំណេះដឹង​ទាំងនេះ ទៅ​អនុវត្ត​ផ្តល់​សេវា ប្រកបដោយ​សុវត្ថិភាព​៕/V​