ដោយៈ ប.ខុន / ភ្នំពេញៈ ស្រះទឹកដែលបង្កើតឡើង ដោយកងទ័ព និងគ្រួសារកងទ័ពជើងទឹក មូលដ្ឋានសមុទ្ររាម នៅភូមិអុង ឃុំរាម ស្រុកព្រៃនប់ ខេត្តព្រះសីហនុ បង្កើតបានជារឿង ជូនដល់រដ្ឋមន្ត្រីក្រសួងធនធានទឹក និងឧតុនិយម ដោយសារមន្ត្រីថ្នាក់ រដ្ឋលេខាធិការ ក្រសួងធនធានទឹក និងឧតុនិយមមួយរូប ដែលមានដី និងសំណង់ផ្សេងៗ ជាប់នឹងស្រះនេះ។
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម កាលពីថ្ងៃទី២៤ ខែឧសភា ឆ្នាំ២០២២ បានចេញលិខិតជម្រាបជូន អភិបាលខេត្តព្រះសីហនុ អំពីការរក្សាការពារ មិនឱ្យមានប៉ះពាល់ លើស្រះទឹក ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ ដើម្បីរក្សាទុកជាសម្បត្តិរបស់រដ្ឋ សម្រាប់ប្រើប្រាស់ ជាសាធារណៈ។
តាមការសាកសួរប្រជាពលរដ្ឋ នៅមូលដ្ឋានខាងលើ បានឱ្យដឹងថា ក្រសួងធនធានទឹក និងឧតុនិយម ចេញលិខិតលេខ៨៦៩ ធទឧ ចុះថ្ងៃទី២៤ ខែឧសភា ក្រោយពីមន្ត្រី ថ្នាក់រដ្ឋលេខាធិការ ក្រសួងធនធានទឹក និងឧតុនិយមមួយរូប ដែលមានដី និងសំណង់ផ្សេងៗ នៅជាប់នឹងស្រះនេះ ទទួលបានដំណឹងថា ក្រសួងបរិស្ថាន រដ្ឋបាលខេត្តព្រះសីហនុ មូលដ្ឋានកងទ័ពជើងទឹករាម មានគម្រោងលុបចោលស្រះទឹក លែងត្រូវការប្រើខាងលើ ដើម្បីអភិវឌ្ឍន៍ទៅជាកន្លែង សម្រាប់អ្នកប្រកបរបរលក់ដូរតាមឆ្នេរ ស្នាក់នៅ និងធ្វើអាជីវកម្ម បន្តរួចមក។
តំបន់ស្រះទឹក ខាងលើ បើពិនិត្យមើលលើផែនទី គឺស្ថិតក្នុងឧទ្យានជាតិរាម នៅក្នុងដែនសមត្ថកិច្ច របស់ក្រសួងបរិស្ថាន ហើយក៏មិនមែនជាសំណង់ ដែលកសាងឡើង ដោយក្រសួងធនធានទឹក និងឧតុនិយម ហើយក៏មិនមែនជាស្រះធម្មជាតិដែរ។
ក្រោយពីក្រសួងធនធានទឹក និងឧតុនិយម បានចេញលិខិត ខាងលើរួចមក កងទ័ពជើងទឹកមូលដ្ឋានសមុទ្ររាម បានធ្វើលិខិតមួយ ដែលមានលេខ០១៥ សជណ ២០២២ ចុះថ្ងៃទី២៤ ខែមិថុនា ឆ្នាំ២០២២ ជម្រាបជូនរដ្ឋមន្ត្រីក្រសួងធនធានទឹក និងឧតុនិយម អំពីប្រវត្តិ និងការប្រើប្រាស់ស្រះទឹក ស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុថា ស្រះទឹក ស្ថិតនៅត្រង់ភូមិសាស្ត្រ ចំណុច X-348434, Y-1162626 ស្ថិតក្នុងភូមិស្ថិតនៅភូមិអុង ឃុំរាម ស្រុកព្រៃនប់ ខេត្តព្រះសីហនុ គឺមិនមែនជាស្រះទឹក ធម្មជាតិនោះទេ។ ដំបូងឡើយ តំបន់នោះ ជាតំបន់ទំនាប មានអំណោយផល ប្រភពទឹកស្អាត ហេតុដូចនេះ កងទ័ព និងគ្រួសារកងទ័ពជើងទឹក មូលដ្ឋានសមុទ្រ បានជីកទុក សម្រាប់ប្រើប្រាស់ និងអាស្រ័យផល តាំងពីឆ្នាំ១៩៩៧ មក។
នៅក្នុងលិខិត បានបញ្ជាក់ថា ស្រះទឹកដែលបានជីក ពុំមានទឹក សម្រាប់ប្រើប្រាស់គ្រប់គ្រាន់ នៅក្នុងរដូវប្រាំង ។ ដោយមានការយកចិតទុកដាក់ខ្ពស់ពីប្រមុខរាជរដ្ឋាភិបាល ក្នុងអំឡុងឆ្នាំ ២០១៤ ក្រសួងសេដ្ឋកិច្ច និងហិរញ្ញវត្ថុ សហការជាមួយក្រុមហ៊ុនអានកូ បានរៀបចំ តបណ្តាញទឹកស្អាត ជូនកងទ័ព និងគ្រួសារកងទ័ព ក៏ដូចជា ប្រជាពលរដ្ឋក្នុងតំបន់ បាន ប្រើប្រាស់គ្រប់គ្រាន់ ហេតុដូចនេះ ស្រះទឹកខាងលើ មិនមានតម្រូវការប្រើប្រាស់ ចាំបាច់ទៀត ចាប់ពីពេលនោះមក។
ក្នុងលិខិត បានរៀបរាប់ទៀតថា នៅក្នុងងឆ្នាំ២០១៣ លោក ចាន់ ស៊ីណាត រដ្ឋលេខាធិការ (សព្វថ្ងៃ) ក្រសួងធនធានទឹក និងឧតុនិយម បានទិញដី នៅចំណុចខាងជើងស្រះ និងដីធ្វើផ្លូវបេតុង តភ្ជាប់ពីផ្លូវជាតិលេខ៤៥ ទៅដីរបស់គាត់ ព្រមទាំងបានសាងសង់ សំណង់ផ្សេងៗ ចូលស្រះទឹក ដែលមានទំហំប្រមាណ ៧៨៥ ម៉ែត្រការ៉េ។
នៅក្នុងលិខិត សរសេរទៀតថា ក្រសួងបរិស្ថាន អាជ្ញាធរខេត្តព្រះសីហនុ និងអង្គភាព មូលដ្ឋានសមុទ្រ មានគម្រោងកែលម្អ ឆ្នេរសមុទ្ររាម ឱ្យបានស្អាត មានសណ្តាប់ធ្នាប់ និងរបៀបរៀបរយ ដោយពុំអនុញ្ញាតឱ្យគ្រួសារកងទ័ព បន្តប្រកបអាជីវកម្មលក់ដូរ នៅតាមបណ្តោយឆ្នេរសមុទ្ររាម តទៅទៀត។ អាស្រ័យដូចនេះ អាជ្ញាធរពាក់ព័ន្ធ បានឯកភាពគ្នា ជ្រើសរើសទីតាំងស្រះទឹក គឺជាទីតាំងសម្រាប់អភិវឌ្ឍន៍ទៅជាផ្ទះអាជីវកម្ម ជូនគ្រួសារកងទ័ពខាងលើ ដើម្បីរស់នៅ និងអាស្រ័យផល បានសមរម្យ។ ហេតុដូចនេះ អង្គភាពមូលដ្ឋាន ស្នើសុំលោករដ្ឋមន្ត្រី មេត្តាពិនិត្យ និងសម្រេចលើគម្រោងអភិវឌ្ឍន៍ ស្រះទឹកនេះ។ ចំពោះករណីដែលក្រសួងធនធានទឹក និងឧតុនិយម ចង់រក្សាស្រះទឹកខាងលើ អង្គភាពមូលដ្ឋានសមុទ្រ សូមស្នើឱ្យរៀបចំកែលម្អ ស្រះទឹកនេះសារឡើងវិញ ដោយត្រូវជីកស្តារ និងរុះរើរាល់សំណង់ផ្សេងៗ ដែលបានសាងសង់លើស្រះ មានដូចជា ផ្លូវបេតុង និងកញ្ចុះ (របស់ ចាន់ ស៊ីណាត) ជាដើម ដើម្បីទុកឱ្យប្រជាពលរដ្ឋ បានប្រើប្រាស់ទូលំទូលាយ យូរអង្វែង តទៅមុខទៀត។
អង្គភាពមូលដ្ឋានសមុទ្រ ពុំទទួលបានផលប្រយោជន៍អ្វី ពីការអភិវឌ្ឍទីតាំង ខាងលើនេះទេ គឺដើម្បីជាប្រយោជន៍រួម និងជាពិសេស ដើម្បីអភិវឌ្ឍន៍កែលម្អ តំបន់ឆ្នេរសមុទ្ររាម ឱ្យស្អាត ទាក់ទាញភ្ញៀវទេសចរជាតិ អន្តរជាតិ រួមចំណែកលើកកម្ពស់ វិស័យទេសចរណ៍ ក្នុងខេត្តព្រះសីហនុ។
លោក ជា សុខនី នាយករងខុទ្ទកាល័យរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹង នៅថ្ងៃទី៦ ខែកក្កដាថាៈ ករណីស្រះទឹកខាងលើ លោករដ្ឋមន្ត្រី បានចាត់ឱ្យក្រុមមន្ត្រីជំនាញ ចុះធ្វើការពិនិត្យឡើងវិញ និងបានឱ្យមន្ត្រី ដែលមានដីពាក់ព័ន្ធនឹងស្រះទឹកនេះ ដកខ្លួនចេញ។ លោករដ្ឋមន្ត្រី ពិតជាមិនបានដឹងថា មន្ត្រីរបស់ខ្លួន មានជាប់ពាក់ព័ន្ធជាមួយនឹងស្រះទឹកនេះឡើយ។ សាបព្រោះខ្យល់ ផលទទួលបានមកវិញ គឺព្យុះសង្ឃរា ៕/V
