​ដោយ​៖ សុវណ្ណ​កុម្ភៈ / ភ្នំពេញ​៖ បន្ទាប់ពី​ធ្វើ​សកម្មភាព​ផ្សព្វផ្សាយ កម្មវិធី​អប់រំ​គុណ​តម្លៃ អូឡាំពិក នៅ​វិទ្យាល័យ​បាក់​ទូក​នោះ នៅ​ថ្ងៃទី​៧ កក្កដា នេះ គណៈកម្មាធិការ​ជាតិ​អូឡាំពិក កម្ពុជា បាន​បន្ត​រៀបចំ​សកម្មភាព​នេះ នៅ​វិទ្យាល័យ​ទួល​ស្វាយព្រៃ បន្ថែមទៀត​។​

​សកម្មភាព​នេះ មិន​ត្រឹមតែ​ផ្សព្វផ្សាយ ពី​គុណ​តម្លៃ​អូឡាំពិក​ប៉ុណ្ណោះ​ទេ តែ​ក៏​ផ្សព្វផ្សាយ​ពី ដំណើរ​ឆ្ពោះទៅ​ស៊ី​ហ្គេម អាស៊ាន​ប៉ា​រ៉ា​ហ្គេម ឆ្នាំ​២០២៣ ដែលជា​កំណត់ត្រា​ប្រវត្តិសាស្ត្រ​ដំបូង​របស់​ព្រះរាជាណាចក្រ​កម្ពុជា​។​

​សិស្សានុសិស្ស​ចំនួន ៥០ នាក់ ដែល​បាន​ចូលរួម​ក្នុង​កម្មវិធី​នេះ បានបង្ហាញ​ចំណាប់​អា​​រ​ម្មណ៍​របស់ខ្លួន ក្នុងការ​ទទួលយក​នូវ​ចំណេះដឹង ពី​ការបញ្ជ្រាប​ពី​គ្រូឧទ្ទេស​ប្រចាំ​កម្មវិធី ស្តីពី​ការអប់រំ​គុណ​តម្លៃ​អូឡាំពិក និង​ឈ្វេងយល់​ពី​យុទ្ធនាការ​ផ្សព្វផ្សាយ​រប​ស់​កម្ពុជា បាញ់​ឆ្ពោះ​ទៅធ្វើ​ម្ចាស់ផ្ទះ ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ​២០២៣​។​

​លោក ប៊ុ​យ សុ​ភ័​ណ្ឌ ទីប្រឹក្សា​គណៈកម្មាធិការ​ជាតិ​អូឡាំពិក​កម្ពុជា បានលើកឡើង​ថាៈ នេះ​ជា​កម្មវិធី​ប្រចាំឆ្នាំ ដើម្បី​បញ្ជ្រាប​ចំណេះដឹង ដល់​សិស្សានុសិស្ស​នានា ឱ្យបាន​ឈ្វេងយល់ ពី​គុណ​តម្លៃ​អូឡាំពិក រួមទាំង​ការជំរុញ​បន្ថែម ដល់​ផ្សព្វផ្សាយ​ឱ្យមាន​ការចូលរួម​គាំទ្រ ដល់​ដំណើរការ​ស៊ី​ហ្គេម​-​អាស៊ាន​ប៉ា​រ៉ា​ហ្គេម ឆ្នាំ​២០២៣​។​

​យុទ្ធនាការ​ផ្សព្វផ្សាយ​គោលដៅ​ស៊ី​ហ្គេម ជា​ប្រវត្តិសាស្ត្រ​ដំបូង​នៅ​កម្ពុជា​នេះ មានដូចជា យុទ្ធនាការ​កម្ពុជា​ស្អាត​, ប្រជាជន​ម្នាក់​លេង​កីឡា​១​មុខ​, កាត់បន្ថយ​ការគ្រោះថ្នាក់​ចរាចរ -​កម្ពុជា​គ្មាន​គ្រឿងញៀន ជាដើម​។​

​លោក​ទីប្រឹក្សា​រូបនេះ សង្កេតឃើញថា សិស្សានុសិស្ស ដែល​ចូលរួម បាន​ឈ្វេងយល់ ពី​គុណ​តម្លៃ​អូឡាំពិក ការរៀបចំ​ព្រឹត្តិការណ៍​កីឡា​អូឡាំពិក និង​ជីវប្រវត្តិ​កីឡា​អូឡាំពិក សម័យបុរាណ និង​សម័យ​ទំនើប​។​

​ជាមួយគ្នានេះ សិស្សានុសិស្ស ក៏បាន​យល់ដឹង​យ៉ាងច្រើន ពី​ដំណើរ​ឆ្ពោះទៅ​រៀបចំ​ធ្វើ​ម្ចាស់ផ្ទះ ការប្រកួត​កីឡា​ស៊ី​ហ្គេម និង​អាស៊ាន​ប៉ា​រ៉ា​ហ្គេម ឆ្នាំ​២០២៣ ខណៈ​ក្រុមការងារ NOCC ប្តេជ្ញា​បន្ត​ការផ្សព្វផ្សាយ​នូវ​យុទ្ធនាការ ឱ្យ​កាន់តែ​ទូលំទូលាយ​ជូន ដល់​យុវជន ប្រជាជន ទូទាំងប្រទេស រហូតដល់​កៀក​នឹង​ព្រឹត្តិការណ៍​កីឡា ជា​ប្រវត្តិសាស្ត្រ​នេះ​តែម្តង​។​

​ដោយសារតែ​កម្ពុជា ទទួល​រៀបចំ​ព្រឹត្តិការណ៍​កីឡា ដ៏​ធំ​ប្រចាំ​តំបន់​នេះ ជា​លើកដំបូង ទើប​គណៈកម្មាធិការ​ជាតិ​អូឡាំពិក​កម្ពុជា តែងតែ​ជំរុញ​ការផ្សព្វផ្សាយ នូវ​យុទ្ធនាការ សំខាន់ៗ​ទាំងនេះ ជាមួយ​រាជរដ្ឋាភិបាល​កម្ពុជា និង​គណៈកម្មាធិការ​ជាតិ រៀបចំ​ការប្រកួត កីឡា​អាស៊ីអាគ្នេយ៍ លើក​ទី​៣២ ឆ្នាំ​២០២៣ (CAMSOC) ជូន​ដល់​សិស្សានុសិស្ស ព្រមទាំង​លើកទឹកចិត្ត​ពួកគាត់ ផ្សព្វផ្សាយ​បន្តទៅ​កាន់​ញាតិមិត្ត និង​ក្រុមគ្រួសារ​របស់គាត់​៕/V​