​ប្រែ​សម្រួលៈ​បំណង​(BLOOMBERG,ST)៖ យោងតាម​អង្គការ​សុខភាព​ពិភពលោក​(WHO) អឺរ៉ុប​កំពុង​ក្លាយជា​មជ្ឈមណ្ឌល​នៃ​ការផ្ទុះកូ​វីដ​១៩​ជា​ថ្មី​នៅ​ពេល​មនុស្ស​កាន់តែ​ច្រើន​ចូលរួម​ព្រឹត្តិការណ៍​ធំៗ​និង​​ការធ្វើដំណើរ​។​

​បណ្ឌិត មី​សែ​ល រ៉ា​យ​អ៊ឹន ( Michael Ryan)​នាយក​ប្រតិបត្តិ​កម្មវិធី​គ្រាអាសន្ន​សុខភាព​របស់​WHO​បាន​និយាយ​នៅក្នុង​សន្និសីទ​កាសែត​មួយ​កាលពី​ថ្ងៃ​ពុធ​ថា « យើង​កំពុង​ជួប​រលក​នៃ​ការផ្ទុះ​ជំងឺ​ដ៏​​ខ្លាំង​កាត់​អឺរ៉ុប​ជាថ្មី​។​ហើយ​យើង​នឹង​ជួប​វា​ជា​ថ្មី​នៅ​កន្លែង​ផ្សេងទៀត យើង​បានឃើញ​វា​រួចហើយ​នៅ​អាស៊ី​អាគ្នេយ៍​និង​តំបន់​ម៉េ​ឌី​ទែ​រ៉ាណេ​ខាងកើត​ផងដែរ​»​។​

​ជា​សរុប ចំនួន​ឆ្លងកូវី​ដ​១៩​បាន​កើនឡើង​៣០​ភាគរយ​នៅ​ទូ​ទាំង​សកលលោក​នៅ​ពីរ​សប្តាហ៍​មក​នេះ ដោយ​វីរុស​អូ​មី​ក្រុង​បំ​ប្លែងខ្លួន​BA.4​និង​BA.5​រុញ​អោយ​ចំនួន​ឆ្លង​នៅ​អឺរ៉ុប​និង​អាម៉េរិក​កើនឡើង​។​

​ទីភ្នាក់ងារ​នេះ​បាន​និយាយថា​ខ្លួន​ក៏​តាមដាន​វីរុស​បំប្លែង​ខ្លួន​ថ្មី​BA2.75 ដែល​ត្រូវបាន​រកឃើញ​នៅ​ឥណ្ឌា​។​

​កាលពី​សប្តាហ៍​មុន អង់គ្លេស​បាន​រាយការណ៍​កំណើន​នៃ​ការ​ឆ្លងកូវី​ដ​១៩​ដល់​ទៅ​៣២​ភាគរយ

WHO​បាន​និយាយថា បណ្តា​ប្រទេស​ក្នុង​លោក​គួរ​ធានា​”​របង​ការពារ​មេរោគ​”​របស់​ខ្លួន​នៅ​រឹងមាំ ដោយ​ផ្តល់​ការចាក់​វ៉ាក់សាំង​ដូស​ជំរុញ​ដល់​ក្រុម​មនុស្ស​ងាយ​រងគ្រោះ រក្សា​វិធានការ​ឃ្លាំមើល​ការវិវត្ត​ជំងឺ និង​​ដាក់ចេញ​វិធានការ​ប្រឆាំង​វីរុស​ដើម្បី​កាត់បន្ថយ​ឳ​កាស​ឆ្លង​។​

​ចំណែក​អគ្គនាយក​WHO លោក អាដ​ហាណូម ហ្គេ​ប្រេ​យេស៊ូ​ស បាន​និយាយថា ខណៈ​ការផ្ទុះកូ​វីដ​១៩​ឡើងវិញ​ណាមួយ​ត្រូវ​យកចិត្តទុកដាក់​ខ្លាំង ពិភពលោក​ឥឡូវ​ស្ថិត​ក្នុង​ស្ថានការណ៍​ល្អប្រសើរ​ជាង​កាលពី​ឆ្នាំ​២០២០ នៅពេល​មេរោគ​នេះ​ចាប់ផ្តើម​វាយលុក​ពេញ​ពិភពលោក​៕