​ដោយៈ គង់​ហេង / កំពង់ចាមៈ លោក អ៊ុន ចាន់​ដា អភិបាលខេត្ត​កំពង់ចាម បាន​អំពាវនាវ ដល់​ប្រជាពលរដ្ឋ នាំគ្នា​ដាំ​ដើមឈើ ដោយ​អាច​យក​យន្តការ «​មនុស្ស​ម្នាក់ ឈើ​មួយ​ដើម​» គឺ​ធានា​និរន្តរភាព នៃ​ការប្រើប្រាស់​ឈើ តាំងពី​ការចាប់​កំណើត​មនុស្សម្នា​ក់ៗ ដល់​ថ្ងៃ​ទទួលមរណភាព​ទៅវិញ​។​

​លោក​អភិបាលខេត្ត​កំពង់ចាម ធ្វើការ​អំពាវនាវ​បែបនេះ នៅក្នុង​ឱកាស​ដែល​លោក និង​សហការី បាន​អញ្ជើញ​ចូលរួម ក្នុង​ពិធី​អបអរសាទរ ទិវា​ពលកម្ម​ដាំ​ដើមឈើ ជា​ប្រពៃណីជាតិ ហៅថា​រុក្ខទិវា នៅក្នុង​បរិវេណ​វត្ត​គគរ ស្រុក​កំពង់សៀម នៅ​ព្រឹក​ថ្ងៃទី ៧ កក្កដា នេះ​។​

​លោក​អភិបាលខេត្ត​រូបនេះ បាន​ថ្លែងថាៈ ការដែល​យើង​នៅតែ​បន្ត​អំពាវនាវ ឱ្យ​ប្រជាពលរដ្ឋ បន្ត​ដើមឈើ គឺ​ដើមឈើ មាន​ប្រយោជន៍​ច្រើនណាស់​។ ដោយ​ជីវិត​មនុស្ស​ម្នាក់ៗ តាំងពី​ចាប់កំណើត ដល់​ថ្ងៃ​ទទួលមរណភាព​ទៅវិញ គឺ​ត្រូវការ​ឈើ ព្រោះ​ម្តាយ​យើង​ម្នាក់ៗ ត្រូវការ​កម្តៅ​ខ្លួន​ពី​ធ្យូង ហើយ​ធ្យូង​នេះ ផលិត​ពី​ចេញពី​ឈើ​។ គ្រាន់តែ​បច្ចុប្បន្ន ប្រទេស​មាន​ការវិវត្ត​ន៍ ពីមុន​ប្រើ​ធ្យូង ឥឡូវ ប្រើ​ថ្នាំពេទ្យ ក្នុងការ​សម្រាលកូន​។ ប៉ុន្តែ​នៅតាម​ជនបទ ប្រទេស​យើង នៅ​រក្សា​ប្រពៃណី​កម្តៅ​ខ្លួន ដោយ​ធ្យូង​ដដែល​។​

​លោក​បាន​បន្ថែមថាៈ តម្រូវការ​ឈើ​បន្ទាប់មក​មាន​កន្លែងដេក​ត្រូវការ​ឈើ​ធ្វើ​គ្រែ កន្លែង​ស្នាក់នៅ ផ្ទះសម្បែង គឺ​ត្រូវការ​ឈើ​ទាំងអស់ រហូតដល់​ថ្ងៃ​ទទួលមរណភាព ធ្វើ​មឈូស ផលិត​អំពី​ឈើ គឺ​ផលប្រយោជន៍​ឈើ បម្រើ​សេចក្តីត្រូវការ​របស់​ម​នុស្ស​គ្រប់គ្នា​ទាំងអស់​។ អីចឹង​យើង​ត្រូវ​បញ្ជ្រាប​យល់ដឹង ពី​ព្រៃឈើ​ដល់​យុវជន បងប្អូន​ប្រជាពលរដ្ឋ លោកគ្រូ អ្នកគ្រូ ដើម្បី​ចូលរួម​ធនធានធម្មជាតិ ក៏ដូចជា​ការនាំគ្នា​ដាំ​ដើមឈើ​។ ជាពិសេស ដើមឈើ​មាន ប្រយោជន៍​ច្រើនណាស់ តម្រូវការ​របស់​មនុស្ស​ម្នាក់ៗ តម្រូវការ​សកល ចូលរួម​ការការពារ និង​ការចូលរួម​កាត់បន្ថយ​ការ​បម្រែបម្រួល​អាកាសធាតុ ហើយ​ជាការ​ចូលរួម​លើកកម្ពស់​ភាព នៃ​ការរស់នៅ​របស់​ប្រជាពលរដ្ឋ លើកកម្ពស់​សហគមន៍​ផងដែរ និង​បង្កើតឱ្យមាន​នូវ អេកូ​ទេសចរណ៍​។​

​លោក​បាន​បន្តថាៈ ការបាត់បង់​ព្រៃឈើ មិនមែន​តែ​នៅ​ប្រទេស​យើង​ទេ គឺ​គ្រប់​ប្រទេស ទាំងអស់ កំពុងអភិវឌ្ឍន៍ ចាំបាច់​យកមក​កែច្នៃ ធ្វើការ​អភិវឌ្ឍន៍ ប្រទេស​របស់ខ្លួន​។ ប៉ុន្តែ​បើ​យើង​មិនមាន ការដាំដុះ​ដើមឈើ​ឡើងវិញ​ទេ គឺ​ធ្វើឱ្យ​កាន់តែ​បាត់បង់​ទៅៗ នៃ​ដើមឈើ​។ ដូច្នេះ​ដើម្បី​ទប់​ទល់នឹង​តម្រូវការ​ឈើ គឺ​ត្រូវតែ​ដាំ​ដុះ​បន្ថែម ឱ្យ​ការប្រើប្រាស់ មាន​និរន្ត​ភាព ដូច​ប្រទេស​មួយចំនួន ក្លាយជា​វាល​ខ្សាច់ ដី​បាត់បង់​គុណភាព បាត់​ជីជាតិ មិនអាច​ដាំ​ដំណាំ​បាន​។ បញ្ហា​នេះ ចាំបាច់​ត្រូវ​បណ្តុះ​ប្រជាពលរដ្ឋ ឱ្យ​ចូលរួម​ស្រឡាញ់ ដើមឈើ ការពារ​បរិស្ថាន ការពារ​ធនធានធម្មជាតិ និង​នាំគ្នា​ដាំ​ដើមឈើ ដោយ​ផ្តើមចេញពី ខ្លួន​យើង​នេះ​តែម្តង អាច​យក​យន្តការ « មនុស្ស​ម្នាក់ ឬ​យុវជន​ម្នាក់ ដើមឈើ​មួយ​ដើម​»​។​

​សូមបញ្ជាក់ថាៈ ដើម្បី​ចូលរួម​អបអរសាទរ ទិវា​ពលកម្ម​ដាំ​ដើមឈើ ជា​ប្រពៃណី ឬ​ហៅថា «​រុក្ខទិវា ៩ កក្កដា​» នៅក្នុង​បរិវេណ​វត្ត​គគរ ស្ថិតក្នុង​ឃុំ​គគរ ស្រុក​កំពង់សៀម ខាង​មន្ទីរ​កសិកម្ម រុក្ខាប្រមាញ់ និង​នេសាទ ខេត្តកំពង់ចាម បាន​នាំយក​កូនឈើ​ជាង ១.៣០០ ដើម​មាន កូនឈើ​បេង គ្រញូង ធ្នង់ និង​កូន​ក្ងោក ៕/V​.mara