ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ប្រធាន​អង្គការ​សុខភាព​ពិភពលោក (WHO)​បាន​និយាយ​កាលពី​ថ្ងៃ​ពុធ​ទី​៦ កក្កដា​ថា WHO​នឹង​កោះ​ប្រជុំ​អ្នកជំនាញ​ជំងឺ​អុត​ស្វា​របស់ខ្លួន​ឡើងវិញ​ដើម្បី​​សម្រេច​ថា​តើ​ការផ្ទុះ​ឡើង​កាន់តែ​អាក្រក់​ឥឡូវនេះ​ក្លាយ​ជា​គ្រាអាសន្ន​សុខភាព​សាធារណៈ​ជា​សាកល​ឬ​យ៉ាងណា​។​

​អគ្គនាយក WHO លោក តេ​ត្រូស អាដ​ហាណូម ហ្គេ​ប្រេ​យេស៊ូ​ស បាន​និយាយថា លោក​នឹង​រៀបចំ​កិច្ចប្រជុំ​លើក​ទី​ពីរ​នៃ​គណៈកម្មាធិការ​គ្រាអាសន្ន​ស្តីពី​ជំងឺ​អុតស្វា ខណៈ​ករណី​ជាង ៦.០០០​ឥឡូវ​នេះ​ត្រូវ​​បាន​បញ្ជាក់​នៅក្នុង​ប្រទេស​ចំនួន ៥៨​។​

​ការកើនឡើង​នៃ​ការឆ្លង​អុត​ស្វា​ត្រូវបាន​រាយការណ៍​តាំងពី​ដើម​ខែ​ឧសភា​នៅ​ខាងក្រៅ​បណ្តា​ប្រទេស​នៅ​អាហ្វ្រិក​ខាងលិច​និង​កណ្តាល ទី​ដែល​ជំងឺ​នេះ​បាន​បញ្ចប់​ជា​យូរ​មក​ហើយ​។​

​លោក​វេជ្ជបណ្ឌិត​តេ​ត្រូសបាន​ប្រាប់​សន្និសីទសារព័ត៌​មាន​ពី​ទីស្នាក់ការ​កណ្តាល​របស់ WHO​នៅ​ទីក្រុង​ហ្សឺ​ណែវ​ថា “​ខ្ញុំ​បន្ត​មាន​ការព្រួយបារម្ភ​ចំពោះ​ទំហំ​និង​ការរីក​រាលដាល​នៃ​មេរោគ​នេះ​”​។​

“​ការ​ធ្វើតេស្តិ៍​នៅតែ​ជា​បញ្ហា​ប្រឈម ហើយ​វា​មានលទ្ធភាព​ខ្ពស់​ដែល​ថា​មាន​ករណី​ជាច្រើន​មិន​ទាន់​ត្រូវបាន​រកឃើញ​។ អឺរ៉ុប​គឺជា​ចំណុចកណ្តាល​នៃ​ការ​ផ្ទុះ​ឡើង​មេរោគ​នេះ​នាពេល​បច្ចុប្បន្ន​ដោយ​កត់​ត្រា​ករណី​​ជំងឺ​អុត​ស្វា​ជាង​៨០​ភាគរយ​នៅ​ទូទាំង​ពិភពលោក​”​។​

​យោងតាម WHO បានឱ្យដឹងថា ការឆ្លង​ជំងឺ​អុត​ស្វា​ភាគច្រើន​រហូតមកទល់​ពេលនេះ​ត្រូវ​បាន​សង្កេតឃើញ​ចំពោះ​បុរស​ដែល​រួម​ភេទ​ជាមួយ​បុរស ដែល​មាន​អាយុ​ក្មេង​និង​ភាគច្រើន​រស់នៅ​តាម​ទីក្រុង​។​

​នៅ​ថ្ងៃទី ២៣ ខែមិថុនា WHO​បាន​កោះប្រជុំ​គណៈកម្មាធិការ​គ្រាអាសន្ន​នៃ​អ្នកជំនាញ​មួយ​ក្រុម​ដើម្បី​សម្រេច​ថា​តើ​ជំងឺ​អុត​ស្វា​អាច​ហៅថា​ជា​ភាពអាសន្ន​សុខភាព​សាធារណៈ​គួរឱ្យ​ព្រួយបារម្ភ​ជា​អន្តរជាតិ (PHEIC) ឬ​អត់ ដែល​នេះ​ជា​ការប្រកាសអាសន្ន​ខ្ពស់​បំផុត​ដែល WHO អាច​ធ្វើឡើង​។​

​ប៉ុន្តែ​អ្នកជំនាញ​ភាគច្រើន​បាន​រកឃើញថា ស្ថានភាព​នេះ​មិន​ទាន់​ឆ្លង​ផុត​កម្រិត​អាសន្ន​បែប​នេះ​នៅឡើយ​ទេ​៕

ជំងឺ​អុត​ស្វា​រកឃើញ​រាលដាល​នៅ ៥៨ ប្រទេស​ហើយ