ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ យោងតាម​របាយការណ៍​របស់​អង្គការសហប្រជាជាតិ​បានឱ្យដឹងថា មនុស្ស​ចំនួន ៧១​លាន​នាក់​បន្ថែមទៀត​នៅ​ជុំវិញ​ពិភពលោក​កំពុង​ជួបប្រទះ​នឹង​ភាព​​ក្រីក្រ​ដោយសារតែ​ការកើនឡើង​តម្លៃ​អាហារ​និង​ថាមពល​ដែល​បាន​កើនឡើង​ក្នុង​រយៈពេល​ប៉ុន្មាន​សប្តាហ៍​បន្ទាប់ពី​ការ​លុកលុយ​របស់​រុស្ស៊ី​មកលើ​អ៊ុ​យក្រែន​។​

​កម្មវិធី​អភិវឌ្ឍន៍​របស់​អង្គការសហប្រជាជាតិ (UNDP)​បាន​ប៉ាន់ប្រមាណ​ថា មនុស្ស​ចំនួន ៥១,៦ លាន​នាក់​ទៀត​បាន​ធ្លាក់​ក្នុង​ភាពក្រីក្រ​ក្នុង​រយៈពេល​បី​ខែ​ដំបូង​បន្ទាប់​ពី​សង្គ្រាម​ដោយ​ពួកគេ​រស់នៅ​ពឹង​​លើ​លុយ​ត្រឹមតែ ១,៩០ ដុល្លារ​ក្នុង​មួយថ្ងៃ ឬ​តិច​ជាង​នេះ​។​

​ការណ៍​នេះ​បាន​រុញ​ឱ្យ​ចំនួន​សរុប​នៃ​អ្នកក្រ​ទូទាំង​ពិភពលោក​ឈាន​ដល់​កម្រិត ៩ ភាគរយ​នៃ​ចំនួន​ប្រជាជន​លើ​ពិភពលោក​។​

​មនុស្ស​២០​លាន​នាក់​បន្ថែម​ទៀត​បាន​ធ្លាក់​ក្រោម​បន្ទាត់​ភាពក្រីក្រ ឬ​រក​ចំណូល​បាន​ចំនួន​៣,២០​ដុល្លារ​ចុះ​ក្នុង​មួយថ្ងៃ​។​

​នៅក្នុង​ប្រទេស​ដែល​មាន​ប្រាក់​ចំណូល​ទាប គ្រួសារ​នានា​ចំណាយ ៤២ ភាគរយ​នៃ​ប្រាក់ចំណូល​គ្រួសារ​របស់​ពួកគេ​លើ​ម្ហូបអាហារ ប៉ុន្តែ​នៅពេលដែល​ប្រទេស​លោកខាងលិច​ដាក់ទណ្ឌកម្ម​លើ​រុស្ស៊ី​តម្លៃ​នៃ​ប្រេង​​ឥន្ធនៈ​និង​អាហារ​សំខាន់ៗ​ដូចជា​ស្រូវ​សាលី ស្ករ និង​ប្រេង​ចម្អិន​អាហារ​បាន​កើនឡើង​។​

​កំពង់ផែ​ជាប់គាំង​របស់​អ៊ុយ​ក្រែ​ន​និងអ​សមត្ថភាព​ក្នុង​ការនាំចេញ​គ្រាប់​ធញ្ញជាតិ​របស់ខ្លួន​ទៅកាន់​ប្រទេស​ដែល​មាន​ប្រាក់​ចំណូល​ទាប​បាន​រុញ​តម្លៃ​កើនឡើង​ខ្ពស់​ដោយ​រុញ​មនុស្ស​រាប់​សិប​លាន​នាក់​ចូលទៅ​ក្នុង​ភាពក្រីក្រ​យ៉ាង​ឆាប់រហ័ស​។​

​ប្រទេស​មួយចំនួន​ដែល​រងគ្រោះ​ខ្លាំង​ដោយ​អតិផរណា​គឺ​ស្រីលង្កា ហៃ​ទី អា​ហ្សង់​ទីន អេ​ហ្ស៊ី​ប អ៊ីរ៉ាក់ តួ​ក​គី ហ្វីលីពីន រ៉​វាន់​ដា ស៊ូដង់ កេន​យ៉ា ស្រីលង្កា និង​អ៊ូ​ស​បេគី​ស្ថាន​។​

​នៅក្នុង​ប្រទេស​មួយចំនួន​ដូចជា អា​ហ្វ​ហ្គានី​ស្ថាន អេត្យូ​ពី ម៉ាលី នី​ហ្សេ​រី​យ៉ា និង​យេ​ម៉ែន ផល​ប៉ះពាល់​នៃ​អតិផរណា​គឺ​កាន់តែ​ធ្ងន់ធ្ងរ​សម្រាប់​អ្នក​ដែល​មាន​កម្រិត​ភាពក្រីក្រ​ទាប​បំផុត​រួចទៅហើយ​៕

​ប្រជាជន​អា​ហ្វ​ហ្គានី​ស្ថានទទួល​ជំនួយ​នៅ​ជំរំ​មួយ