ដោយៈ ភ្នំ​ស្វាយ / បន្ទាយ​មាន​ជ័​យៈ ក្នុងឱកាស​ពិធីបុណ្យ​ជាតិ និង​បុណ្យ​សាសនា​ធំៗ ក្នុង​ឆ្នាំ​២០២២ រួមមាន បុណ្យចូលឆ្នាំ​ខ្មែរ បុណ្យ​៧​មករា និង​បុណ្យ​វិសាខបូជា ទណ្ឌិត​ចំនួន ៥៩ នាក់ ជាប់​ក្នុង​ពន្ធនាគារ​ខេត្តបន្ទាយមានជ័យ ត្រូវបាន​ព្រះមហាក្សត្រ ប្រោស​ប្រទាន តាម​សំណើ​របស់​សម្ដេច​តេ​ជោ នាយករដ្ឋមន្ត្រី បានចេញ​ព្រះរាជក្រឹត្យ បន្ធូរ​បន្ថយទោស ពី ៣​ខែ ៦​ខែ និង ៩​ខែ និង​ដោះលែង​ស្ត្រី ១​នាក់ ឬ​ឱ្យ​ផុតកំណត់​ទោស ។​

​ក្នុង​ពិធី​ប្រកាស​ព្រះរាជក្រឹត្យ​នោះ នា​ល្ងាច​ថ្ងៃទី​៦ កក្កដា ២០២២ នៅ​សាលប្រជុំ​ពន្ធនាគារ ខេត្តបន្ទាយមានជ័យ មាន​លោក គឹ​ង វណ្ណៈ អភិបាលរង​ខេត្ត លោក ប៉ង់ ចាន់​សុទ្ធា​រា ព្រះរាជអាជ្ញារង លោក​ឧ​ត្ត​ម​អគ្គានុរក្ស ថ្នាក់​លេខ​២ អ៊ុង ស៊ី​ផាន ប្រធាន​ពន្ធនាគារ ខេត្តបន្ទាយមានជ័យ ។​

​លោក​ឧ​ត្ត​ម​អគ្គានុរក្ស ថ្នាក់​លេខ​២ អ៊ុង សុ​ី​ផាន បាន​មានប្រសាសន៍ ក្នុង​ពិធី​ប្រកាស ព្រះរាជក្រឹត្យ​នោះ នា​រសៀល​ថ្ងៃទី​៦ កក្កដា ២០២២ នៅ​សាលប្រជុំ​ពន្ធនាគារ​ខេត្ត​ថា : បច្ចុប្បន្ន ក្នុង​ពន្ធ​គារ ខេត្តបន្ទាយមានជ័យ មាន​មន្ត្រី​ពន្ធនាគារ ចំនួន ១១៦ នាក់ / ស្រី ២០ នាក់ ។ មាន​ជន​ជាប់ឃុំ​ជាក់ស្តែង សរុប​មាន​ចំនួន ១.៧០១ នាក់ / ស្រី ១១៧ នាក់ លើ​ជន​ជាប់ឃុំ សរុប ១.៧១៨ នាក់ / ស្រី ១២៤ នាក់ ក្នុងនោះ​មាន​ជន​ជាប់ឃុំ ដែល​ទៅ​សម្រាក​ព្យ​បាល​ជំងឺ ហើយ​គេចខ្លួន និង​ផ្ញើ​នៅ​ពន្ធនាគារ​ដទៃ​។​​ក្នុងនោះ ជន​ជាប់ឃុំ ព្រោះ​បទល្មើស​គ្រឿងញៀន មាន ៨២០ នាក់ ឬ​ច្រើន​លើសលប់ និង​ជនបរទេស ចំនួន ៦៤ នាក់ / ស្រី ១២ នាក់ ។​

​ក្នុងចំណោម​ទណ្ឌិត ចំនួន ៥៩ នាក់​នោះ មាន​ជន​ជាប់ឃុំ ដែល​ត្រូវ​បន្ធូរ​បន្ថយទោស ពី ៣​ខែ មាន​ចំនួន ៤៤​នាក់ / ស្រី​៥​នាក់ ។ ពី​៦​ខែ មាន​ចំនួន ១១​នាក់ ។ ៩​ខែ មាន​ចំនួន​៤​នាក់ ក្នុងនោះ មានការ​ដោះលែង ១​នាក់ (​ស្រី​) ផុតកំណត់​ទោស ។​

​លោក ប៉ង់ ចាន់​សុទ្ធា​រា ព្រះរាជអាជ្ញារង និង​អយ្យការ​អម​សាលាដំបូង​ខេត្ត និង​លោក គឹ​ង វណ្ណៈ អភិបាលរង​ខេត្ត បាន​ចាប់អារម្មណ៍​ថាៈ ថ្នាក់ដឹកនាំ និង​មន្ត្រី​ពន្ធនាគារ នៃ​ពន្ធនាគារ ខេត្តបន្ទាយមានជ័យ បាន​អនុវត្ត​នូវ​តួនាទី​ភារកិច្ច របស់ខ្លួន បានល្អ​ប្រសើរ ដូចជា​លើ​ការអប់រំ កែប្រែ​ស្ដា​និតិ​សម្បទា ការបណ្ដុះបណ្ដាល​វិជ្ជាជីវៈ ការរក្សាសន្តិសុខ សណ្ដាប់ធ្នាប់ នៅក្នុង​ពន្ធនាគារ ការងារ​កសិកម្ម សិប្បកម្ម ការអភិវឌ្ឍន៍​ធនធានមនុស្ស និង​ការអភិវឌ្ឍ ហេដ្ឋារចនាសម្ព័ន្ធ​នានា ប្រកបដោយ​ភាព​ទទួលខុសត្រូវ​ខ្ពស់ ។​

​លោក​បាន​បន្តថាៈ ក្រៅពីនេះ អង្គភាព​មាន​ប៉ុស្តិ៍​សុខភាព​មួយ​ខ្នង ដែល​គ្រប់គ្រង​ដោយ អង្គភាព​ផ្ទាល់ និង​មាន​ផ្នែក​សុខាភិបាល ជា​អ្នកទទួលខុសត្រូវ​ផងដែរ​។ ហេតុនេះ អង្គភាព ត្រូវតែ​បាន​យកចិត្តទុកដាក់ លើ​គោលនយោបាយ​កំណែទម្រង់​ពន្ធនាគារ គឺ​ការអប់រំ​កែប្រែ និង​ស្ដារនីតិសម្បទា សុខុមាលភាព ដល់​ជន​ជាប់ឃុំ ដែលមាន​អប់រំ​ផ្លូវចិត្ត រៀនអក្សរ​ខ្មែរ គ្រប់​ចំណេះដឹង ជំនាញ ។ ត្រូវ​យកចិត្តទុកដាក់​ធ្វើការ​បែងចែក​ចំណាត់ថ្នាក់​សន្តិសុខ ដែលជា​មូលដ្ឋាន សម្រាប់​ស្មើ​សុំ​បន្ធូរបន្ថយ និង​លើកលែងទោស ដល់​ទណ្ឌិត ស្របតាម​នីតិវិធី​ច្បាប់​។​

​លោក​ក៏​កោតសរសើរ​ដល់​អង្គភាព​នេះ ដែល​បាន​យកចិត្តទុកដាក់ បណ្តុះបណ្តាល​វិជ្ជាជីវៈ ជូន​ដល់​ទណ្ឌិត មានដូចជា រៀន​កាត់ដេរ រៀន​ជួសជុល​គ្រឿង​អេ​ឡិច​ត្រួ​និក រៀន​ជួសជុល​ម៉ួ​តូ រៀន​ភ្លេងសម័យ រៀន​កាត់សក់ រៀនអក្សរ​ខ្មែរ​ជាដើម ក្នុងនោះ ជន​ជាប់ឃុំ ត្រូវបាន​បន្ធូរបន្ថយ ទោស លើកលែងទោស ក្នុង​១​ឆ្នាំ មាន​ចំនួន ៣ លើក​។ លោក​ក៏បាន​ផ្តាំ​ផ្ញើឱ្យ​បងប្អូន ជា​អ្នក​ធ្លាប់​ជាប់ឃុំ​ទាំងអស់ ក្រោយពី​ស្គាល់​រសជាតិ ក្លិន​គុក ហើយ​ចេញ​មកវិញ ត្រូវមាន​ឥស្សរភាព ហើយ​សូមកុំ​វិល​មកជា​ថ្មី​។ ពោលគឺ ត្រូវ​ចេះ​កែខ្លួន ឲ្យ​ក្លាយជា​មនុស្ស​ល្អ ពលរដ្ឋ​ល្អ រស់​នៅមាន​សេរីភាព សេចក្តីថ្លៃថ្នូរ ក្នុងសង្គម​គ្រួសារ និង​សង្គមជាតិ ៕/V​