​ដោយៈ បូកគោ / កំពត​: បួន​អាណត្តិ​កន្លងផុតទៅ រដ្ឋបាល​សង្កាត់​ព្រែក​ត្នោត ក្រុង​បូកគោ សម្រេចបាន​នូវ លទ្ធផល​ការងារ សំខាន់ៗ​ជាច្រើន ពិសេស​ការបម្រើ​សេវា ជូន​ប្រជាពលរដ្ឋ មាន​លក្ខណៈ​ល្អប្រសើរ​។ បន្ថែម​លើ​នោះ ផ្លែផ្កា​នៃ​កិច្ច​អភិវឌ្ឍ​មូលដ្ឋាន បានធ្វើឱ្យ​សង្កាត់​នេះ ប្រែ​មុខមាត់​ថ្មី ជាមួយ​តំបន់ឧស្សាហកម្ម​ធំៗ សម្រាប់​ជា​មុខមាត់​របស់​ខេត្តកំពត​។ ដើម្បី​ឆ្លើយតប​នឹង​តម្រូវការ​របស់ ប្រជាពលរដ្ឋ ឱ្យ​កាន់តែ​ល្អ​ថែមទៀត ថ្នាក់ដឹកនាំ នៃ​រដ្ឋបាល​សង្កាត់​ព្រែក​ត្នោត បាន​ប្តេជ្ញា​នឹង​ខិតខំ​បំពេញ​ចំណុច​ខ្វះខាត​នានា ដែល​នៅ​សេសសល់​។​

​ក្រោយ​ពិធី​ប្រកាស​សុពលភាព ក្រុមប្រឹក្សាឃុំ សង្កាត់ អា​ណ្តិ​តទី​៥ នា​ព្រឹក​ថ្ងៃទី​៧ ខែកក្កដា ឆ្នាំ​២០២២ លោក គង់ ប៊ុន​រា ចៅសង្កាត់​ព្រែក​ត្នោត បានបញ្ជាក់​ថាៈ ប៉ុន្មាន​ឆ្នាំ​ចុងក្រោយ​នេះ សង្កាត់​ព្រែក​ត្នោត មានការ​រីកចម្រើន គួរឱ្យកត់សម្គាល់ ពិសេស​ហេដ្ឋារចនាសម្ព័ន្ធ​រូបវ័ន្ត ផ្លូវ ទឹក ភ្លើង ដែល​អាច​ឆ្លើយតបបាន តាម​តម្រូវការ​របស់​ប្រជាពលរដ្ឋ​។ ឯការ​បម្រើសេវា សាធារណៈ និង​សេវា​រដ្ឋបាល​ផ្សេងៗ ក៏មាន​ដំណើរ​ការល្អ ខណៈដែល​ការអភិវឌ្ឍ ក្នុង​មូលដ្ឋាន មានការ​ចូលរួម ពី​វិស័យ​ឯកជន​ច្រើន​។​

​លោក​ចៅសង្កាត់ បាន​បន្តថាៈ ផ្តើមចេញពី​ការយកចិត្ត​ទុក ក្នុងការ​បម្រើសេវា ជូន​ប្រជាពលរដ្ឋ​បានល្អ និង​កិច្ចអភិវឌ្ឍន៍​មូលដ្ឋាន បាន​ឆាប់រហ័ស ធ្វើឱ្យ​ប្រជាពលរដ្ឋ ផ្តល់​ការគាំទ្រ​គោលនយោបាយ របស់​រាជរដ្ឋាភិបាល តាមរយៈ​ការបោះឆ្នោត ជូន​ក្រុមប្រឹក្សា​សង្កាត់ អាណត្តិ​មុន បាន​ដឹកនាំ​មូលដ្ឋាន​បន្តទៀត​។​

​លោក គង់ ប៊ុន​រា បានបញ្ជាក់​ថាៈ ឆ្លងតាម​បទពិសោធ​ជាក់ស្តែង ឃើញថា រដ្ឋបាល​សង្កាត់ ព្រែក​ត្នោត ក៏​នៅមាន​ចំណុចខ្សោយ​មួយចំនួន ទាំង​ការងារ​បម្រើសេវា និង​ការងារ​អភិវឌ្ឍន៍ នានា​។ ម្ល៉ោះហើយ ក្នុង​អាណត្តិ​ថ្មី​នេះ រដ្ឋបាល​សង្កាត់ នឹង​ខិតខំ​លុបបំបាត់​រាល់​ចំណុច ខ្វះខាត​ទាំងនោះ ដើម្បី​បំពេញ​បំណង​ប្រជាពលរដ្ឋ ព្រមទាំង​បង្កើន​កិច្ច​អភិវឌ្ឍ​មូលដ្ឋាន បន្ថែមទៀត​។​

​សូមបញ្ជាក់ថា សង្កាត់​ព្រែក​ត្នោត ចំណុះ​ក្រុង​បូកគោ មាន​ភូមិសាស្ត្រ​អំណោយផល​ល្អ ដោយមាន​ផ្លូវដែក ផ្លូវគោក និង​មាន​ផ្លូវទឹក ដែល​បង្ក​ភាពងាយស្រួល ក្នុងការ​ដឹកជញ្ជូន​ទំនិញ សព្វសារពើ​។ សង្កាត់​នេះ មាន​តំបន់​ទេសចរណ៍​ជាច្រើន ដូចជា​រមណីយដ្ឋាន​ទេសចរណ៍ ធម្មជាតិ ត្រពាំងរ​ពៅ រមណីយដ្ឋាន​ធម្មជាតិ​អន្លង់​ធំ និង​មណ្ឌល​រី​ស៊​ត មួយចំនួនទៀត​៕/V​