ដោយៈ​មុនី​រ័ត្ន / ភ្នំពេញៈ សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បានសម្រេច​លុបឈ្មោះ គណបក្ស​អនាគតជាតិ ចេញពី​បញ្ជី​គណបក្ស នយោបាយ បង្កើត​នៅ​ក្រសួងមហាផ្ទៃ តាម​បញ្ញត្តិ​មាត្រា ១៩​ថ្មី នៃ​ច្បាប់​ស្តីពី​គណបក្ស នយោបាយ​។ នេះ​បើ​យោងតាម​ប្រកាស ចុះ​ថ្ងៃទី​៧ ខែកក្កដា ឆ្នាំ​២០២២ ដែល​រស្មី​កម្ពុជា ទ​ទួទ​ល​បាន​។​

​អគ្គនាយករង និង​ជា​ប្រធាន​នាយកដ្ឋាន​កិច្ចការ​សមាគម និង​គណបក្សនយោបាយ លោក ឈឹម កាន បានបញ្ជាក់​ប្រាប់​រស្មី​កម្ពុជា នៅ​រសៀល​ថ្ងៃទី​៧ ខែកក្កដា​នេះ​ថាៈ “ នៅក្រោយ ពេល​បង្កើត​គណបក្សនយោបាយ ត្រូវបាន​កំណត់​រយៈពេល​យ៉ាងយូរ ១៨០​ថ្ងៃ ដើម្បី​រៀបចំ​បែបបទ​សំណុំលិខិត​សុំ​ចុះបញ្ជី​។ ដូច្នេះ ការ​លុបឈ្មោះ គណបក្ស​អនាគតជាតិ គឺ​អនុវត្តតាម​បញ្ញត្តិ​មាត្រា ១៩​ថ្មី នៃ​ច្បាប់​ស្តីពី​គណបក្សនយោបាយ ”​។​

​មាត្រា ១៩​ថ្មី ៖ ក្នុង​រយៈពេល​យ៉ាងយូរ ១៨០​ថ្ងៃ បន្ទាប់ពី​គណបក្សនយោបាយ ត្រូវបាន​បង្កើតឡើង ស្របតាម​មាត្រា ៩ នៃ​ច្បាប់​នេះ គណបក្សនយោបាយ​នោះ ត្រូវ​ស្នើសុំ​ចុះបញ្ជី នៅ​ក្រសួងមហាផ្ទៃ ដើម្បី​ទទួលបាន​សុពលភាព និង​ជា​ធ្វើ​សកម្មភាព បាន​ដោយ​ស្របច្បាប់ ក្នុងឋានៈ​ជា​នីតិបុគ្គល ដោយ​ត្រូវបាន​សមាជិក​យ៉ាងតិច ៤.០០០ នាក់ និង​ត្រូវ​បំពេញបែបបទ និង​លក្ខខណ្ឌ​ដូច​មានចែង​ក្នុង​មាត្រា ២០ នៃ​ច្បាប់​នេះ​។​

​សូមជម្រាបថា លោក ឃីម ឡា​គី អតីត​តំណាងរាស្ត្រ​មណ្ឌល​ខេត្តកណ្តាល នៃ​អតីត​គណបក្ស​សង្គ្រោះ​ជាតិ ទទួលបាន​សិទ្ធិ​ធ្វើ​នយោបាយ​ឡើងវិញ កាលពី​ថ្ងៃទី​១៤ ខែសីហា ឆ្នាំ​២០២១ និង​បានដាក់​ពាក្យស្នើសុំ​បង្កើត​គណបក្ស​ថ្មី ដែលមាន​ឈ្មោះ “​គណបក្ស​អនាគតជាតិ​” ទៅ​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ កាលពី​ថ្ងៃទី​២៥ ខែតុលា ឆ្នាំ​២០២១​។ ហើយ​នៅ​ថ្ងៃទី​២៤ ខែវិច្ឆិកា ឆ្នាំ​២០២១ ក្រសួងមហាផ្ទៃ បានអនុញ្ញាត​ឲ្យ​បង្កើត​គណបក្ស​អនាគតជាតិ​៕/V​