​ប្រែ​សម្រួលៈ​បំណង​(​ស្ត្រេត​ថែមស៍​)៖ អតីត​នាយករដ្ឋមន្ត្រី​ជប៉ុន​លោក​ស៊ីន​ហ្សូ អាបេ បាន​ដួល​នៅពេល​កំពុង​ថ្លែង​សុន្ទរកថា​ក្នុង​ពិធី​ជួបជុំ​មួយ​នៅ​តំបន់​ណា​រ៉ា​(Nara)​កាលពី​ថ្ងៃ​សុក្រ​ទី​៨​កក្កដា នេះ​បើ​​តាម​សារព័ត៌មាន​ជប៉ុន​។​

​សារព័ត៌មាន​បាន​និយាយថា លោក​អាបេ​បាន​ចេញ​ឈាម​នៅពេលលោ​ក​ដួល និង​ថា​មាន​ឮ​សូរ​បាញ់កាំភ្លើង​។​

​សារព័ត៌មាន​ជប៉ុន​ដែល​និយាយ​យោង​តាម​ប្រភព​ប៉ូលិស​បាន​និយាយថា លោក​អាបេ​ត្រូវ​គេ​បាញ់​ពីក្រោយ​ចំនួន​បី​គ្រាប់​។​លោក​ត្រូវបាន​ប្រញាប់ប្រញាល់​បញ្ជូន​ទៅកាន់​មន្ទីរពេទ្យ​ទាំង​សន្លប់​និង​ថា​បេះដូង​​លែង​ដើរ​ផងដែរ​។​

​ប៉ូលិស​បាន​និយាយថា បុរស​ក្នុង​វ័យ​៤០​ឆ្នាំ​ប្លាយ​ម្នាក់​ត្រូវបាន​ចាប់ខ្លួន​។​

​ជប៉ុន​ត្រូវ​ធ្វើ​ការបោះឆ្នោត​សភា​ជាន់ខ្ពស់​នៅ​ថ្ងៃអាទិត្យ​ទី​១០​កក្កដា ដោយ​បេក្ខជន​៥៤៥​នាក់​ប្រជែង​គ្នា​យក​អាសនៈ​១២៥​។​

​សូមបញ្ជាក់​ថា ជប៉ុន​ជា​ប្រទេស​មាន​ច្បាប់​កាំភ្លើង​តឹងរ៉ឹង​បំផុត​មួយ​នៅក្នុង​លោក និង​ការបាញ់ប្រហារ​កម្រ​កើត​មាន​ណាស់​។​

​អាបេ វ័យ​៦៧​ឆ្នាំ ជា​នាយករដ្ឋមន្ត្រី​បំរើការ​យូរ​ជាង​គេ​របស់​ជប៉ុន ដោយ​កាន់​តំណែង​នាយករដ្ឋមន្ត្រី​បាន​ពីរ​អាណត្តិ មុន​លាឈប់​កាលពី​ឆ្នាំ​២០២០ ៕

​អាបេ​ថ្លែងសុន្ទរកថា​និង​ដួល​ក្រោយ​ត្រូវ​គេ​បាញ់​កាលពី​ថ្ងៃ​សុក្រ​

សារព័ត៌មានបាននិយាយថា លោកអាបេទំនងជាគាំងបេះដូងក្រោយត្រូវគេបាញ់