ដោយៈ ប​.​ជ័យ / ព្រំដែន​កម្ពុជា ថៃៈ ឈ្មួញ និង​ពលរដ្ឋ ជា​ជនជាតិខ្មែរ លែង​ហ៊ាន​ទាក់ទង ឈ្មួញ និង​កម្មករ ជា​ជនជាតិ​ថៃ ក្រោយ​កងកម្លាំង​មាន​សមត្ថកិច្ច​ថៃ ចាប់​ពលរដ្ឋ​ខ្លួន ដែល​លួច​ដឹក​ប្រេងឥន្ធនៈ​រត់ពន្ធ ទ្រង់ទ្រាយ​តូច ពី​ថៃ មក​កម្ពុជា ខណៈពេល​អត្រា​តម្លៃ ប្រេងឥន្ធនៈ​ឡើងថ្លៃ​។​

​នេះ​បើតាម​មន្ត្រីនគរបាល ការពារ​ព្រំដែន​គោក​លេខ​៧០៨ ថ្មពួក និង​ប្រភព​ស្និទ្ធ​នឹង​ឈ្មួញ​ខ្មែរ នៅ​ភូមិ​ដងរែក និង​ភូមិ​ប្រាសាទ​ត្បែង​ឃុំ​បន្ទាយឆ្មារ ស្រុក​ថ្មពួក បាន​ប្រាប់​កាសែត​រស្មី​កម្ពុជា នៅ​ថ្ងៃទី​៧ ខែកក្កដា ឆ្នាំ​២០២២​។​

​ប្រភព​ដដែល បាន​បន្តថាៈ ទាំង​ពលរដ្ឋ ទាំង​កងកម្លាំង មិន​ហ៊ាន​លួច​បើក​ព្រំដែន​ឱ្យ​ធ្យូង បន្លែ​ព្រៃ ទៅ​ថៃ និង​ទំនិញ​ប្រេងឥន្ធនៈ គ្រឿងទេស​ក៍ ភេសជ្ជៈ ជី ជាដើម​។​

​សូម​រំលឹកថា កាលពី​ថ្ងៃទី​៤ ខែកក្កដា ឆ្នាំ​២០២២ ក្នុង​តំបន់​ស្រ​ង៉ែ ឃុំ​ទ័ព​ស្តេច ស្រុក​តា​ប្រា​យ៉ា ខេត្ត​ស្រះកែវ កងកម្លាំង​ទាហាន​ថៃ ចាប់បាន​ជនសង្ស័យ ជា​ពលរដ្ឋ​ខ្លួន បីនាក់ ដែល​បាន​បើក​គោយន្ត​កន្ត្រៃ ដឹក​កសិផល​។ កងកម្លាំង​ថៃ ឆែកឆេរ ក្នុង​គោយន្ត ឃើញ​ប៊ីដុង ពណ៌​ខៀវ (​កាន​) សរុប​ចំនួន ៦៥ គឺ​ក្នុងនោះ ប្រេងម៉ាស៊ូត ចំនួន ៣០ លីត្រ ក្នុង​មួយ​ប៊ីដុង សរុប​ចំនួន ១.៩៥០ លីត្រ ។​

​តាម​ការសាកសួរ អ្នក​ទាំងបី បានផ្តល់​ព័ត៌មាន​សក្ខី​កម្ម​ថាៈ ពួកគេ​ត្រូវបាន​គេ (​ឈ្មួញ ឬ​មនុស្ស​ថៃ​) ជួល​ឱ្យ​ដឹកជញ្ជូន​ប្រេង​នេះ ទៅឱ្យ​ឈ្មួញ​ជនជាតិខ្មែរ នៅ​ភូមិ​ក្នុង​ឃុំ​បន្ទាយឆ្មារ និង​ភូមិ​ក្នុង​ឃុំ​គោក​រមៀត ស្រុក​ថ្មពួក ខេត្តបន្ទាយមានជ័យ ហើយ​ការជួញដូរ​ប្រេងឥន្ធនៈ ទ្រង់ទ្រាយ​តូច ដែល​ខុសច្បាប់​នេះ មកពី​តម្លៃ​ប្រេង នៅ​ខាង​ប្រទេស​ថៃ ថោក​ជាង នៅ​ប្រទេស​កម្ពុជា ។​

​កងកម្លាំង​មាន​សមត្ថកិច្ច​ថៃ បាន​ឃាត់ខ្លួន​មនុស្ស និង​វត្ថុតាង​ទាំងនោះ រួច​ប្រគល់ឱ្យ ការិយាល័យ​គយ​ស្រុក​អារញ្ញ ខេត្ត​ស្រះកែវ ដើម្បី​ចាត់ការ​តាមច្បាប់​៕/V​