​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អតីត​មន្ត្រីប៉ូលិស​ក្រុង​មីន​នី​ប៉ូលីស (Minneapolis) លោក ដេ​រិក ឆូវី​ន (Derek Chauvin) ត្រូវបាន​កាត់ទោស​ឱ្យ​ជាប់គុក​ជាង ២០​ឆ្នាំ​ពី​បទ​រំលោភ​​សិទ្ធិ​ស៊ីវិល​របស់លោក ច​ច ផ្ល​យ (George Floyd) ។​

​ឆូវី​ន​អាយុ ៤៦ ឆ្នាំ​បាន​សារភាព​កំហុស​ចំពោះ​ការចោទប្រកាន់​អំពី​ការរំលោភ​សិទ្ធិ​ស៊ីវិល​សហព័ន្ធ​ដាច់ដោយឡែក​មួយ​កាលពី​ខែ​ធ្នូ​។​

​រូប​គេ​កំពុង​ជាប់​ពន្ធនាគារ​រដ្ឋ​រយៈ​ពេល ២២ ឆ្នាំ​រួច​ហើយ​សម្រាប់​ការ​ធ្វើឃាត​លោក​ផ្ល​យ ជា​បុរស​ស្បែក​ខ្មៅ​អាយុ ៤៦ ឆ្នាំ​។​

​ការកាត់ទោស​ទាំងពីរ​នេះ​នឹង​ដំណើរការ​ដំណាលគ្នា ហើយ​ឆូវី​ននឹង​ត្រូវ​បញ្ជូន​ទៅ​ពន្ធនាគារ​សហព័ន្ធ​។​ប៉ុន្តែ​រូបគេ​សឹងតែ​ប្រាកដ​ណាស់​ថា​នឹង​ចំណាយ​ពេល​ច្រើន​ជាង​មុន​នៅក្នុង​ពន្ធនាគារ​បន្ទាប់ពី​ការកាត់ទោស​នេះ​។

​លោក ហ្វីឡូ​ណេ​ស (Philonese) ជា​ប្អូនប្រុស​របស់​លោក​ផ្ល​យ បាន​និយាយ​នៅក្នុង​តុលាការ​កាលពី​ថ្ងៃ​ព្រហស្បតិ៍​ទី​៧​កក្កដា​ថា “​ជីវិត​របស់​ច​ច​មាន​សារៈសំខាន់​”​ខណៈ​គាត់​បាន​ស្នើ​ឱ្យ​ចៅក្រម​ដាក់ទោស​​អតិបរមា ២៥ ឆ្នាំ​។​

​ឆូវី​ន ស្បែក​ស ត្រូវបាន​កាត់ទោស​ពី​បទ​មនុស្សឃាត​និង​ឃាតកម្ម​ក្នុង​រដ្ឋ​មីន​ណេ​សូ​តា​ពី​បទ​សង្កត់​ជង្គង់​លើ​កញ្ជឹងក​របស់​ផ្ល​យ​អស់​រយៈពេល​ជាង​ប្រាំបួន​នាទី​។​

​ការសម្លាប់ ដែល​ថត​បាន​ដោយ​កាមេរ៉ា​ទូរស័ព្ទ​របស់​អ្នក​ឈរ​មើល បាន​បង្ក​ឱ្យ​មាន​កំហឹង​ជា​សកល និង​រលក​នៃ​បាតុកម្ម​ប្រឆាំង​នឹង​ភាពអយុត្តិធម៌​ខាង​ជាតិ​សាសន៍​និង​ការប្រើប្រាស់​កម្លាំង​របស់​ប៉ូលិស​។​

​ការចោទប្រកាន់​របស់​សហព័ន្ធ​ប្រឆាំង​នឹង​ឆូវី​ន​រួម​មាន​ការចោទប្រកាន់​ចំនួន​ពីរ​សម្រាប់​ការដកហូត​សិទ្ធិ​របស់​ផ្ល​យ​ដោយ​ការ​សង្កត់​ជង្គង់​លើ​កញ្ជឹងក​របស់គាត់ ខណៈ​គាត់​កំពុង​ជាប់​ខ្នោះ និង ដោយ​ការ​ខកខាន​មិន​បាន​ផ្តល់​ការសង្គ្រោះ​ផ្នែក​វេជ្ជសាស្ត្រ​ក្នុងអំឡុងពេល​ការចាប់ខ្លួន​គាត់​នៅ​ខែ​ឧសភា​ឆ្នាំ ២០២០​។​

​ជា​ផ្នែក​នៃ​កិច្ចព្រមព្រៀង​សារភាព​ទោស ឆូវី​នក៏បាន​សារភាព​ថា​មាន​ពិរុទ្ធ​ចំពោះ​ការរំលោភ​សិទ្ធិ​របស់​ក្មេងប្រុស​អាយុ ១៤ ឆ្នាំ​ម្នាក់​ក្នុងអំឡុងពេល​ការចាប់ខ្លួន​មួយ​ផ្សេង​ទៀត​ដែល​បាន​ធ្វើឡើង​ក្នុង​ឆ្នាំ ២០១៧ ផងដែរ​។​

​តាម​ការចោទប្រកាន់ ជនជាប់ចោទ​ឈ្មោះ ឆូវិ​ន បាន​ចាប់​ច្របាច់​ក​ក្មេងប្រុស​នោះ វាយ​ក្បាល​នឹង​ពិល និង​ច្រត់​ជង្គង់​លើ​កញ្ចឹងក​និង​ខ្នង​របស់​ក្មេងប្រុស ខណៈ​រូបគេ​ជាប់​ខ្នោះដៃ ហើយ​មិន​អាច​តតាំង​បានទេ​។ ដូចផ្ល​យ​ដែរ ក្មេង​ប្រុស​នោះ​មាន​សម្បុរ​ខ្មៅ​។​

​រដ្ឋ​អាជ្ញា​បាន​និយាយថា វីដេអូ​បំពាក់​លើ​ខ្លួន​ប៉ូលិស​ដែល​គេ​មិន​បញ្ចេញ បានបង្ហាញ​ឆូវី​ន​ច្រត់​ជង្គង់​លើ​ខ្នង​របស់​ក្មេងប្រុស​រយៈពេល ១៧ នាទី ខណៈ​ក្មេង​នោះ​ស្រែក​រក​ម្តាយ​ឱ្យជួយ​៕

ឆូវី​ន​អាយុ ៤៦ ឆ្នាំ​បាន​សារភាព​កំហុស​ចំពោះ​ការចោទប្រកាន់​អំពី​ការរំលោភ​សិទ្ធិ​ស៊ីវិល​សហព័ន្ធ​ដាច់ដោយឡែក​មួយ​កាលពី​ខែ​ធ្នូ