​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រទេស​ប្រជុំ​កោះ​នៅ​មហាសមុទ្រ​ឥណ្ឌា​ដាច់ស្រយាល​គឺ​ម៉ាល់​ឌី​វ​នឹង​សាងសង់​ទីក្រុង​បណ្តែត​ទឹក​ដំបូងបង្អស់​របស់​ពិភពលោក ដែល​យក​គំរូ​តាម​រូបរាង​ខួរក្បាល​របស់​មនុស្ស​នៅ​តំបន់​ថ្ម​ប៉ប្រះ​ទឹក​មួយ​។​

​ស្ថិតនៅ​ចម្ងាយ​ប្រហែល ៨០០ គីឡូម៉ែត្រ​ពី​ប្រទេស​ឥណ្ឌា ប្រទេស​ទាប​បំផុត​របស់​ពិភពលោក​មួយ​នេះ​សង្ឃឹមថា​នឹង​រកឃើញ​ដំណោះស្រាយ​ប្រកបដោយ​និរន្តរភាព​ចំពោះ​ការ​ពិត​នៃ​ការកើនឡើង​កម្រិត​​ទឹកសមុទ្រ​។​

​ដោយ​មាន​ជំនួយ​តិចតួច​ពី​ប្រទេស​ហូឡង់​ដែល​កំពុងតស៊ូ​នឹង​កម្រិត​ទឹកសមុទ្រ​ដែរ​នោះ ទីក្រុង​អណ្តែត​ទឹក​ម៉ាល់​ឌី​វ​បាន​ទទួល​ភ្លើង​ខៀវ​ដើម្បី​សាងសង់​លំនៅដ្ឋាន​ចម្រុះ​ពណ៌​ចំនួន ៥.០០០ ខ្នង​ដែល​ចង​​ភ្ជាប់​ជាមួយ​គ្នា​និង​បោះ​យុថ្កា​ទៅ​បាត​បឹង​ទឹកប្រៃ​ទំហំ ៥០០ អារ (២០២ ហិកតា​)​។​

​ភ្ញៀវទេសចរ​ទៅ​កាន់​ទីក្រុង​បណ្តែត​ទឹក​ថ្មី​នេះ​នឹង​ត្រូវ​ជិះទូក​រយៈពេល​ដប់​នាទី​ពី​រដ្ឋធានី​ម៉ាល់ (Malé) និង​អាកាសយានដ្ឋាន​អន្តរជាតិ ជា​កន្លែង​ដែល​ពួកគេ​នឹង​ស្វែងរក​សណ្ឋាគារ ផ្ទះសម្បែង ហាង និង​ភោជនីយដ្ឋាន​។​

​ទីក្រុង​នេះ​នឹង​មិន​មាន​រថយន្ត​ទេ ប៉ុន្តែ​មនុស្ស​នឹង​ធ្វើដំណើរ​តាមផ្លូវ​ខ្សាច់​ស​ដោយ​ថ្មើរជើង កង់ ឬ​កង់​អគ្គិសនី និង​ម៉ូតូ ឬ​ពួក​គេ​អាច​ឡើង​ជិះ​លើ​ទូក​និង​ជិះ​នាវា​តាម​ព្រែកជីក​។​

​ព្រែកជីក​នឹង​ក្លាយ​ជា​សរសៃឈាម​ហេដ្ឋារចនាសម្ព័ន្ធ​សំខាន់​សម្រាប់​ភស្តុភារ​និង​ច្រកចូល​ទីក្រុង​សម្រាប់​ទូក​និង​នាវា​។​

​ទីក្រុង​បណ្តែត​ទឹក​នេះ​នឹង​ចាប់ផ្តើម​សាងសង់​នៅ​ខែ​មករា​ឆ្នាំ​២០២៣ ហើយ​គ្រោង​សង់​រួចរាល់​ក្នុង​រយៈពេល​ប្រាំ​ឆ្នាំ​៕

​ទីក្រុង​បណ្តែត​ទឹក​របស់​ម៉ាល់​ឌី​វ​ទទួល​បាន​ភ្លើង​ខៀវ​ដើម្បី​សាងសង់​ហើយ​