ដោយៈ​ ប​.​ខុន​/​ភ្នំពេញៈ​ ឥទ្ធិពល​សម្ពាធ​ទាប​មួយ​នៅក្នុង​សមុទ្រ​ចិន​ខាងត្បូង ដែល​បាន​ដើរមក​ដល់​កៀក​នឹង​ឆ្នេរ​ម្តុំ​ខេត្ត​ដា​ណា​ង​ប្រទេស​វៀតណាម​មុននឹង​ដើរ​ស្របតាម​ឆ្នេរ​ឡើងទៅ​ខាងជើង​ចាប់ ជាប់​ជាមួយនឹង​ប្រព័ន្ធ​សម្ពាធ​ទាប​រំ​កឹ​ល​ចុះ​មកពី​ភាគខាងត្បូង​ប្រទេស​ចិន​នឹង​បង្កឱ្យមាន​ភ្លៀង​ធ្លាក់​រាយប៉ាយ​ក្នុង​កម្រិត​ពី​មធ្យម​ទៅ​បង្គួរ នៅក្នុង​ក្របខ័ណ្ឌ​ទូទាំងប្រទេស​កម្ពុជា​ចាប់ ពីថ្ងៃ​ទី​៩​ដល់​ថ្ងៃទី​១២​ខែកក្កដា ឯ​នៅ​តំបន់​អាង​ទន្លេមេគង្គ​លើ​ក៏មាន​ភ្លៀង​ធ្លាក​រាយប៉ាយ​ច្រើន​ដែរ​។​

លោក ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក​និង​ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៨​ខែកក្កដា​ឆ្នាំ​២០២២​ថា សម្ពាធ​ទាប​មួយ​កើតមាន​នៅក្នុង​សមុទ្រ​ខាងត្បូង​ដែល​បាន​ដើរមក​កៀក​នឹង​ឆ្នេរ​ម្តុំ​ខេត្ត​ដាង​ប្រទេស​វៀតណាម​មុននឹង​ដើរ​តាម​ឆ្នេរ​ទៅលើ​(​ជើង​)​ជាប់​ជាមួយនឹង​ប្រព័ន្ធ​សម្ពាធ​ទាប ដែល​រំ​កឹ​ល​ចុះ​មកពី​ភាគខាងត្បូង​ប្រទេស​ចិន បង្កឱ្យមាន ភ្លៀង​ធ្លាក់​រាយប៉ាយ​ក្នុង​ក្របខណ្ឌ​ទូទាំងប្រទេស​ក្នុង​បរិមាណ​ពី​មធ្យម​ទៅ​បង្គួរ​នៅ​អំឡុង​ពីថ្ងៃ​ទី​៩​ដល់​ថ្ងៃទី​១២​ខែកក្កដា​។​

អ្នកនាំពាក្យ​ក្រសួង​ជំនាញ​ខាងលើ​បាន​និយាយ​ឱ្យដឹងទៀតថា​ភ្លៀង​ចាប់ផ្តើម​នៅ​ព្រលប់​ថ្ងៃនេះ​៨​ខែកក្កដា​ដោយ​រុញ​ពី​តំបន់​ទំនាប​ភាគ​ខាង​កើតមក​ភ្នំពេញ តំបន់​ខ្ពង់រាប ភាគ​ឦសាន និង តំបន់​អាង​ទន្លេមេគង្គ​លើ​ក៏មាន​ភ្លៀង​ធ្លាក់​ច្រើន​ដែរ ចាប់ពី​ថ្ងៃទី​៩​ដល់​១៣​ខែកក្កដា​។​​របាយ​ទឹកភ្លៀង​ដែល​បាន​ធ្លាក់​រយៈពេល​២៤​ម៉ោង​នៅលើ​រាជធានី ខេត្ត​គិត​ត្រឹម​ព្រឹក​ថ្ងៃទី​៨​ខែកក្កដា នៅ​រាជធានី​ភ្នំពេញ​មាន​កម្រិត​ពី​តិច​ដល់​១៣​មី​លី​ម៉ែត្រ​, ខេត្តកំពង់ឆ្នាំង​មាន​កម្រិត​ពី​តិច​ដល់​២៨​មី​លី​ម៉ែត្រ​,​ខេត្តកំពង់ធំ​មាន​កម្រិត​ពី​តិច​ដល់​៤៤​មី​លី​ម៉ែត្រ​,​ខេត្តពោធិសាត់​មាន​កម្រិត​ពី​តិច​ដល់​១៧​មី​លី​ម៉ែត្រ​,​ខេត្តកោះកុង​មាន​កម្រិត​ពី​តិច​ដល់​៥០​មី​លី​ម៉ែត្រ​,​ខេត្តរតនគិរី​មាន​កម្រិត​ពី​តិច​ដល់​៩៦​មី​លី​ម៉ែត្រ​,​ខេត្តស្ទឹងត្រែង​មាន​កម្រិត​ពី​តិច​ដល់​៣៩​មី​លី​ម៉ែត្រ​,​ខេត្តព្រៃវែង​មាន​កម្រិត​ពី​តិច​ដល់​៧២​មី​លី​ម៉ែត្រ​,​ខេត្ត​មណ្ឌល​គី​រី​មាន​កម្រិត​ពី​តិច​ដល់​៨៥​មី​លី​ម៉ែត្រ​,​ខេត្ត​ព្រះសីហនុ​មាន​កម្រិត​ពី​តិច​ដល់​១៦​មី​លី​ម៉ែត្រ​,​ខេត្ត​ឧ​ត្ត​រ​មានជ័យ​មាន​កម្រិត​ពី​តិច​ដល់​៣៦​មី​លី​ម៉ែត្រ​,​ខេត្ត​ត្បូងឃ្មុំ​មាន​ភ្លៀង​កម្រិត​ពី​តិច​ដល់​៨៧​មី​លី​ម៉ែត្រ​,​ខេត្តក្រចេះ​មាន​ភ្លៀង​កម្រិត​ពី​តិច​ដល់​៦៤​មី​លី​ម៉ែត្រ​និង​ខេត្តកំពង់ចាម​មាន​ភ្លៀង​កម្រិត​ពី​តិច​ដល់​៧០​មី​លី​ម៉ែត្រ​។​

​ក្រសួង​ធនធានទឹក​និង​ឧតុនិយម​កាលពី​ថ្ងៃទី​៥​ខែកក្កដា​ឆ្នាំ​២០២២​បាន​ជូនដំណឹង​ស្តីពី​ការ​ព្យាករ​ស្ថានភាព​អាកាសធាតុ​សម្រាប់​ពីថ្ងៃ​ទី​៦​ដល់​ថ្ងៃទី​១២​ខែកក្កដា​ថា​ព្រះរាជាណាចក្រ​កម្ពុជា​បន្ត​ទទួលរង​ឥទ្ធិពល​ពី​ជ្រលង​នៃ​ប្រព័ន្ធ​សម្ពាធ​ទាប​ដែល​កើតឡើង​អូសបន្លាយ​លើ​ភាគ​ខាងជើង​ប្រទេស​ថៃ ឡាវ​និង​វៀតណាម ជាមួយនិង​ឥទ្ធិពល​នៃ​ខ្យល់មូសុង​និរតី​បក់​ក្នុង​ល្បឿន​ពី​មធ្យម​ទៅ​បង្គួរ បង្កឱ្យមាន​ភ្លៀង​ធ្លាក់​ក្នុង​កម្រិត​ពី​តិច​ទៅ​បង្គួរ លាយឡំ​ទៅដោយ​ផ្គរ រន្ទះ និង ខ្យល់​កន្ត្រាក់​ហើយក៏​អាចមាន​កន្លែង​ខ្លះ​ភ្លៀង​ធ្លាក់​ច្រើន​ដែរ​។​

​នៅក្នុង​សេចក្តីជូនដំណឹង​បាន​សរសេរ​ទៀតថា ស្ថានភាព​បែប​ខាងលើ​ធ្វើ​ឲ្យ​បណ្តា​ខេត្ត​នៅ​តំបន់​វាលទំនាប​កណ្តាល​មាន​សីតុណ្ហភាព​អប្បបរមា​ពី​២៤​ទៅ​២៦​អង្សា​សេ សី​តុ​ណ្ណ​ភាព​អតិបរមា មាន​ពី​៣៣​ទៅ​៣៥​អង្សា​សេ​។ អាចមាន​ភ្លៀង​ធ្លាក់​ក្នុង​កម្រិត​ពី​តិច​ទៅ​បង្គួរ លាយឡំ​ទៅដោយ​ផ្គរ រន្ទះ និង​ខ្យល់​កន្ត្រាក់ ។ ទន្ទឹម​នោះ​ក៏​អាចមាន​កន្លែង​ខ្លះ​ភ្លៀង​ធ្លាក់​ច្រើន​ដោយ​អន្លើ​។សម្រាប់​បណ្តា​ខេត្ត​នៅជាប់​ជួរ​ភ្នំ​ដងរែក​និង​ខ្ពង់រាប​ឦសាន​មាន​សីតុណ្ហភាព​អប្បបរមា​ពី​២៣​ទៅ​២៥​អង្សា​សេ សីតុណ្ហភាព​អតិបរមា​មាន​ពី​៣២​ទៅ​៣៤​អង្សា​សេ​។ អាចមាន​ភ្លៀង​ក្នុង​កម្រិត​ពី​តិច​ទៅ​ច្រើន លាយឡំ​ទៅដោយ​ផ្គរ រន្ទះ​និង​ខ្យល់​កន្ត្រាក់ ។ ទន្ទឹម​នោះ​ក៏​អាចមាន​កន្លែង​ខ្លះ​ភ្លៀង​ធ្លាក់​ច្រើន​។

​នៅ​តំបន់​មាត់សមុទ្រ​មាន​សីតុណ្ហភាព​អប្បបរមា​ពី​២២​ទៅ​២៥​អង្សា​សេ សី​តុ​ណ្ណ​ភាព​អតិបរមា មាន​ពី​៣៣​ទៅ​៣៥​អង្សា​សេ​។​អាចមាន​ភ្លៀង​ក្នុង​កម្រិត​ពី​មធ្យម​ទៅ​ច្រើន លាយឡំ​ទៅដោយ​ផ្គរ រន្ទះ​និង​ខ្យល់​កន្ត្រាក់ ព្រមទាំង​រលក​សមុទ្រ​មាន​កំពស់​ខ្ពស់ៗ​៕​