​ប្រែ​សម្រួលៈ​បំណង​(​ស្ត្រេត​ថែមស៍​)៖​ប៉ូលិស​បាន​ចាប់ខ្លួន​ជនសង្ស័យ​ម្នាក់ ឈ្មោះ តេត​ស៊ូ​យ៉ា យ៉ាម៉ា​ហ្កាមី​(Tetsuya Yamagami)​ក្រោយ​អតីត​នាយករដ្ឋមន្ត្រី​ស៊ីន​ហ្សូ អាបេ បាន​ដួលសន្លប់​ដោយ​ត្រូវ​​គ្រាប់កាំភ្លើង​ក្នុង​ពេល​ថ្លែង​សុន្ទរកថា​មួយ​កាលពី​ព្រឹកថ្ងៃ​សុក្រ​ទី​៨​កក្កដា នៅ​ជប៉ុន​ខាងលិច​។​

​ជនសង្ស័យ​ត្រូវ​ចាប់​ផ្តួល​ក្រោយ​ការបាញ់ប្រហារ​

​លោក​អាបេ អាយុ​៦៧​ឆ្នាំ ទំនង​ជា​ចេញឈាម​ក្រោយ​ត្រូវ​គ្រាប់កាំភ្លើង​នៅ​ទីក្រុង​ណា​រ៉ា​(Nara)​ក្បែរ​ទី​ក្រង​ក្យូ​តូ​(Kyoto) នេះ​បើ​តាម​អ្នកយក​ព័ត៌មាន​ម្នាក់​នៅ​ទូរទស្សន៍​ជប៉ុន​។​នាយកដ្ឋាន​អគ្គិភ័យ​ក្រុង​​ណា​រ៉ា​បាន​និយាយថា លោក​អាបេ​រងរបួស​នៅ​ក​ស្តាំ​និង​ឆ្អឹងដងកាំបិត​ឆ្វេង​។​

​ជនសង្ស័យ​ជា​អ្នកក្រុង​ណា​រ៉ា ។​រូបភាព​ក្នុង​បណ្តាញ​សង្គម​បានបង្ហាញ​បុរស​ម្នាក់​ត្រូវ​ចាប់​ផ្តួល​ក្រោយ​ការបាញ់ប្រហារ​នៅក្បែរ​ស្ថានីយ​យ៉ាម៉ា​តុ​សាយ​ដាយ​ជី​(Yamatosaidaiji)​និង​អាវុធ​ធ្លាក់​ទៅ​នឹង​ដី​។​

​ទូរទស្សន៍​NHK​បាន​និយាយថា យ៉ាម៉ា​ហ្កាមី អាយុ​៤១​ឆ្នាំ បាន​ប្រាប់​ប៉ូលិស​ថា ខ្លួន​មិន​សប្បាយចិត្ត​នឹង​លោក​អាបេ និង​មានបំណង​សម្លាប់​លោក​។​ជន​នេះ​ឥឡូវ​ត្រូវបាន​ចោទប្រកាន់​ពី​បទ​ប៉ុនប៉ង​មនុស្ស​​ឃាត​។​

​សារព័ត៌មាន​ក្នុងស្រុក​បាន​និយាយថា តេត​ស៊ូ​យ៉ា យ៉ាម៉ា​ហ្កាមី ជា​អតីត​សមាជិក​កងកម្លាំង​ស្វ័យការពារ​សមុទ្រ ឬ​កងទ័ពជើងទឹក​ជប៉ុន និង​បាន​ចាកចេញ​ពី​កងកម្លាំង​នេះ​នៅ​ឆ្នាំ​២០០៥​ក្រោយ​បំរើការ​​នៅ​ទីនោះ​អស់​បី​ឆ្នាំ​។​

​មន្ត្រី​ក្រុង​ណា​រ៉ា​បានអោយដឹងថា លោក​អាបេ បាន​គាំងបេះដូង ហើយ​ត្រូវបាន​បញ្ជូន​តាម​ឡានពេទ្យ​ទៅកាន់​ឧទ្ធម្ភាគចក្រ​​វេជ្ជសាស្ត្រ​សង្គ្រោះមួយ​ដើម្បី​ដឹក​ទៅកាន់​មន្ទីរពេទ្យ​សកល​វិទ្យាល័យ​វេជ្ជសាស្ត្រ​​ណា​រ៉ា​។​លោក​សន្លប់ និង​ហាក់​មិន​បង្ហាញ​មានជីវិត​ទេ​។​

​អតីត​នាយករដ្ឋមន្ត្រី​អាបេ បាន​ស្ថិតនៅ​ក្រុង​ណា​រ៉ា​ដើម្បី​ធ្វើ​យុទ្ធនាការ​ឃោសនា​មុន​ការបោះឆ្នោត​សភា​ជាន់ខ្ពស់​នៅ​ថ្ងៃអាទិត្យ​ខាងមុខ នៅ​ពេល​លោក​ត្រូវបាន​បាញ់ប្រហារ​។​គណបក្សកាន់អំណាច ប្រជា​ធិប​​តេ​យ្យ​សេរី​(LDP)​បាន​និង​កំពុង​បញ្ជូន​មន្ត្រី​ចុះ​ទៅ​គ្រប់​ច្រក​ល្អក​នៃ​ប្រទេស​ដើម្បី​ឃោសនា​សំរាប់​បេក្ខជន​របស់​ខ្លួន​។​

​ក្នុងពេល​ជាមួយគ្នា នាយករដ្ឋមន្ត្រី ហ្វ៊ុយ​មី​អុ គី​ស៊ី​ដា បាន​និយាយថា លោក​អាបេ​ស្ថិតក្នុង​ស្ថានភាព​ធ្ងន់ធ្ងរ ហើយ​ក្រុម​វេជ្ជបណ្ឌិត​កំពុង​ព្យាយាម​សង្គ្រោះ​ជីវិត​របស់​លោក​។ ដោយ​អះអាង​ថា​លោក​ព្យាយាម​​ទប់​ទឹកភ្នែក លោក​គី​ស៊ី​ដា​បាន​និយាយថា​«​ខ្ញុំ​បន់ស្រន់​អស់​ពី​ចិត្ត​សូម​អោយ​អាបេ​រួចផុត​ពី​គ្រោះថ្នាក់​នេះ​។​ខ្ញុំ​សូម​ថ្កោលទោស​ការវាយប្រហារ​ដ៏​ព្រៃផ្សៃ​នេះ និង​មិន​អាច​អត់​ឳ​ន​អោយអំពើបែបនេះបាន​ឡើយ​»៕

​អតីត​នាយករដ្ឋមន្ត្រី​អាបេ បាន​ស្ថិតនៅ​ក្រុង​ណា​រ៉ា​ដើម្បី​ធ្វើ​យុទ្ធនាការ​មួយ​មុន​ការបោះឆ្នោត​សភា​ជាន់ខ្ពស់​នៅ​ថ្ងៃអាទិត្យ​ខាងមុខ នៅ​ពេល​លោក​ត្រូវបាន​បាញ់ប្រហារ​