​ដោយៈ តាកែវ / តាកែវ:​ នៅ​ព្រឹក​ថ្ងៃទី ៨ ខែកក្កដា ឆ្នាំ​២០២២ នេះ កងកំលាំង​រាជ​អាវុធហត្ថ ខេត្តតាកែវ បានបង្ហាញ​មុខសញ្ញា ជា​ជនសង្ស័យ កាប់​ប្លន់​ម៉ូតូ និង​ឆក់ យ៉ាង​កក្រើក នៅក្នុង​ខេត្តតាកែវ រយៈពេល ៣ ខែ​កន្លងមកនេះ ចំនួន ៦​នាក់ ក្នុងចំណោម​បក្ខពួក ១១​នាក់ ដែល​បាន​រត់គេចខ្លួន ដល់​មហាជន​បានឃើញ​មុខ​ពិត របស់​ជនសង្ស័យ ដែលមាន​វ័យ​ទើបតែ ១៧​ឆ្នាំ និង ១៨​ឆ្នាំ​តែប៉ុណ្ណោះ ។​

​បើតាម​ការបញ្ជាក់​ពី​លោក វរៈសេនីយ៍ឯក ង៉ែត ចាន់​ធី មេបញ្ជាការរង​កងរាជអាវុធហត្ថ ខេត្តតាកែវ បានឱ្យដឹងថាៈ ជនសង្ស័យ​ទាំង ៦​នាក់​នេះ គឺជា​មុខសញ្ញា​បង្កើត​បទល្មើស ជាច្រើន​ករណី ក្នុងនោះ​មាន​កាប់​ប្លន់ ធាក់​ផ្តួល​ប្លន់​យក​ម៉ូតូ និង​ធ្វើ​សកម្មភាព​ឆក់​កាបូប យ៉ាង​កក្រើក នៅក្នុង​ទឹកដី នៃ​ខេត្តតាកែវ រយៈពេល​ជាង ៣​ខែ​មកនេះ ។


​លោក​មេបញ្ជាការរង កងរាជអាវុធហត្ថ​ខេត្តតាកែវ បាន​បន្តថាៈ ការឈាន​ទៅដល់​ការឃាត់ ខ្លួន​ជនសង្ស័យ​នេះ​បាន គឺ​ដំបូង​កំលាំង​យើង បាន​ចុះទៅ​បង្ក្រាប​ករណី​គ្រឿងញៀន​ទេ តែ​នៅពេល​ឃាត់ខ្លួន​ជនសង្ស័យ ក៏​ឆែកឆេ​រកឃើញ​ស្លាក​លេខ​ម៉ូតូ​ថ្មី​មួយ ទើប​កំលាំង​ជំនាញ ធ្វើការ​ស្រាវជ្រាវ និង​សាកសួរ​ជនសង្ស័យ ថា​ជា​ស្លាក​លេខ​ម៉ូតូ កែប 1B-4438 នោះ ជា​ស្លាក​លេខ​ម៉ូតូ​របស់​អ្នកណា​គេ ក្រោយពេល​សួរនាំ និង​អង្កេត​យ៉ាង​លម្អិត ទើប​ជនសង្ស័យ ព្រម​សារភាពថា ជា​ស្លាក​លេខ​ម៉ូតូ​របស់​ជនរងគ្រោះ ដែល​បានមកពី​ការធ្វើសកម្មភាព ធាក់​ប្លន់​យក​ម៉ូតូ នៅ​ផ្លូវបំបែក ពេជ្រ​សារ ស្រុក​គីរីវង់ ខេត្តតាកែវ កាលពី​យប់​ថ្ងៃទី ២ ខែកក្កដា ឆ្នាំ​២០២២ និង​មាន​ករណី​កាប់​ប្លន់​ម៉ូតូ ជាច្រើន​ករណី​ទៀត នៅក្នុង​ភូមិសាស្ត្រ​ខេត្តតាកែវ ដែល​ក្រុម​ជនសង្ស័យ បានធ្វើ​សកម្មភាព​បានសម្រេច កន្លងមក ។​

​ជនសង្ស័យ​ទាំង ៦​នាក់ រួមមានៈ ទី​១ ឈ្មោះ វឿន រក្សា អាយុ ១៧​ឆ្នាំ រស់នៅ​ភូមិ​ខ្សឹ​ង សង្កាត់​រកា​ក្នុង ក្រុង​ដូន​កែវ​, ទី​២ ឈ្មោះ ចែម លី​ហេង អាយុ ១៧​ឆ្នាំ រស់នៅ​ភូមិ​បាក់​កូដ ឃុំ​លាយ​បូរ​ណ៍ ស្រុក​ត្រាំកក់​, ទី​៣ ឈ្មោះ ម៉ែន វីរៈ អាយុ ១៧​ឆ្នាំ រស់នៅ​ភូមិ​តុំ សង្កាត់​រកា​ក្រៅ ក្រុង​ដូន​កែវ​, ទី​៤ ឈ្មោះ តូច រតនា អាយុ ១៨ ឆ្នាំ រស់នៅ​ភូមិ​បិ​ន​ម៉ៅ សង្កាត់​រកា​ក្រៅ​, ទី​៥ ឈ្មោះ មឿ​ន ជី​វ័​ន្ត អាយុ​១៨​ឆ្នាំ រស់នៅ​ភូមិ​សូរ​ច័ន្ទ សង្កាត់​រកា​ក្រៅ និង ៦. ឈ្មោះ អ៊ុង សំនាង អាយុ ១៨​ឆ្នាំ រស់នៅ​ភូមិ​ប៊ិន​ម៉ៅ សង្កាត់​រកា​ក្រៅ ក្រុង​ដូន​កែវ ។ ជនសង្ស័យ​ទាំង ៦ នាក់ ជា​ក្រុម​ក្មេងប្រុស​ស្ទាវ ខាងលើ មានមុខ​របរ មិន​ពិតប្រាកដ ដូចគ្នា ហើយ​ត្រូវបាន​កំលាំង​កងរាជអាវុធហត្ថ ខេត្តតាកែវ កសាង​សំណុំរឿង បញ្ជូនទៅ​សាលាដំបូង ហើយ នៅ​ព្រឹក​មិញ​នេះ​។​

​ដោយឡែក ចំពោះ​ជនសង្ស័យ​ដែលជា​បក្ខពួក ចំនួន ៥​នាក់​ផ្សេងទៀត កំពុង​រត់គេចខ្លួន​នោះ សមត្ថកិច្ច នឹងធ្វើ​ការស្រាវជ្រាវ តាម​ឃាត់ខ្លួន ជា​បន្តទៀត ដើម្បី​នាំខ្លួន យកមក​ផ្ដន្ទាទោស តាមច្បាប់​៕/V