ដោយ: តាកែវ / តាកែវ​: នៅ​ព្រឹក​ថ្ងៃទី ៨ ខែកក្កដា ឆ្នាំ​២០២២ នេះ ជនសង្ស័យ​ម្នាក់ ត្រូវបាន​កំលាំង​កងរាជអាវុធហត្ថ ខេត្តតាកែវ ឃាត់ខ្លួន​និង​កសាង​សំណុំរឿង បញ្ជូនទៅ សាលាដំបូង ពីបទ​ល្មើស​ជួញដូរ និង​រក្សាទុក​នូវ​សារ​ធាតុ​ញៀន​ខុសច្បាប់ ។ ក្រោយ​ធ្វើការ​សាកសួរ និង​ធ្វើ​នីតិវិធី​រួច ត្រៀម​បញ្ជូន​ខ្លួន​ទៅ​តុលាការ ជនសង្ស័យ បាន​ត្រឹម​ស្រក់​ទឹកភ្នែក នឹក​ស្តាយក្រោយ​ជា​ពន់ពេក ដោយសារតែ​គ្រឿងញៀន ធ្វើឱ្យ​គាត់​បែកបាក់​គ្រួសារ ព្រាត់​ពី ប្រពន្ធ​កូន ដែល​ទើប​តែមាន​អាយុ ១​ខែ​កន្លះ ក្លាយជា​ឪពុក​មិត្ត​ល្អ​សម្រាប់​កូន សម្តី​ចុងក្រោយ «​ខ្ញុំ​ខុស​ហើយ សូមកុំ​ធ្វើតាម​ខ្ញុំ​» ។​

​លោក​អនុសេនីយ៍ទោ ហួត វឿន នាយការិយាល័យ​ប្រឆាំង​គ្រឿងញៀន ខេត្តតាកែវ បានឱ្យដឹងថាៈ កាលពី​ថ្ងៃទី​៧ ខែ​កក្ដ​ដា ឆ្នាំ​២០២២ ដោយមាន​ការសម្របសម្រួល​នីតិវិធី ដោយ​លោក ឯក ឆេង​ហួត ព្រះរាជអាជ្ញា​អម​សាលាដំបូង​ខេត្ត កម្លាំង​នៃ​បញ្ជាការដ្ឋាន កងរាជអាវុធហត្ថ​ខេត្ត ដឹកនាំ​បញ្ជា​ផ្ទាល់ ដោយ​លោក​វរសេនីយ៍ឯក ង៉ែត ចាន់​ធី មេបញ្ជាការរង កងរាជអាវុធហត្ថ​ខេត្ត បាន​ចុះបង្ក្រាប​ករណី​ជួញដូរ និង​ប្រើប្រាស់​ដោយ ខុសច្បាប់​នូវ​សារធាតុ​ញៀន នៅ​ចំណុច​ភូមិ​ពោធិ​ខ្វិត ឃុំ​ព្រះបាទ​ជាន់ជុំ ស្រុក​គិរីវង់ ខេត្តតាកែវ ជាក់ស្តែង បាន​ឃាត់ខ្លួន​ជនសង្ស័យ បាន​ចំនួន ១​នាក់ ឈ្មោះ ង៉ែត រដ្ឋា (​ហៅ​ប៉ង់​) ភេទ​ប្រុស អាយុ ២៧​ឆ្នាំ ជនជាតិខ្មែរ មុខរបរ មិន​ពិតប្រាកដ និង​ដកហូត​បាន វត្ថុតាង រួមមាន ក្រាម​ពណ៌​ស​ថ្លា ៣ កញ្ចប់ ទម្ងន់ ២៤,៦៣ ក្រាម (​ថ្លឹង​ទាំង​សំបក់​ថង់​), ជញ្ជីង​ថ្លឹង​ថ្នាំញៀន​ចំនួន ១​គ្រឿង​, ទូរស័ព្ទ​ចំនួន ១​គ្រឿង​, កាំភ្លើង​បាញ់​គ្រាប់កង់ (​ប្រើ​ហ្គាស​) ចំនួន ១​ដើម​, កាំបិត​ចំនួន ២, និង​ជំ​ពាម​កៅស៊ូ ចំនួន ១​។​

​ក្រោយ​ការឃាត់ខ្លួន​នោះ ជនសង្ស័យ រួម​នឹង​វត្ថុតាង ត្រូវបាន​រក្សាទុក​បណ្តោះ​អាសន្ន នៅ​ការិយាល័យ​ប្រឆាំង​គ្រឿងញៀន កងរាជអាវុធហត្ថ​ខេត្ត ហើយ​សមត្ថកិច្ច​ជំនាញ បាន​កសាង​សំណុំរឿង បញ្ជូនទៅ​តុលាការ ដើម្បី​ចាត់ការ តាម​នីតិវិធី​៕/V