​ដោយៈ មុនី​រ័ត្ន / ភ្នំពេញ​: លោក ស សុខា មាន​សេចក្ដី​តក់ស្លុត និង​សម្ដែង​ការ​ក្រៀមក្រំ​បំផុត នៅពេល​ទទួលដំណឹង តាមរយ​:​សារព័ត៌មាន​របស់​ប្រទេស​ជប៉ុន​ថា អតីត​នាយករដ្ឋមន្ត្រី​ជប៉ុន លោក ស៊ីន​ហ្សូ អា​បេ (Shinzo Abe) វ័យ ៦៧ ឆ្នាំ បានទទួល​មរណភាព ដោយ​ខ្មាន់កាំភ្លើង បាញ់ប្រហារ បើទោះជា​ក្រុមគ្រូពេទ្យ ព្យាយាម​ជួយសង្គ្រោះ អស់ពី​សមត្ថភាព នៅ​មន្ទីរពេទ្យ យ៉ាងណាក៏ដោយ​។

​ជាមួយគ្នានេះ លោក ស សុខា បាន​ថ្កោលទោស ចំពោះ​អំពើ​បាញ់ប្រហារ​ដ៏​ឃោរឃៅ​នេះ​។ ជាថ្មី​ម្ដងទៀត សូម​ចូលរួម​សោកស្ដាយ និង​រួម​មរណទុក្ខ​ជាមួយ​ក្រុមគ្រួសារ​លោក ជាមួយ​ប្រជាជន​ជប៉ុន និង​ប្រទេស​ជប៉ុន​ទាំងមូល ដែល​បាត់បង់​ធនធាន​ថ្នាក់ដឹកនាំ ពោរពេញ​ដោយ​ថាមពល និង​សក្ដានុពល​ទាំង​ក្នុងប្រទេស តំបន់ និង​ពិភពលោក​។​

​សូមជម្រាបថា អតីត​នាយករដ្ឋមន្ត្រី​ជប៉ុន លោក ស៊ីន​ហ្សូ អា​បេ បានទទួល​មរណភាព នៅ​ទី​៨ ខែកក្កដា ឆ្នាំ​២០២២ ក្រោយ​រង​ការបាញ់ប្រហារ ក្នុងអំឡុងពេល​លោក​ថ្លែង​សុន្ទរកថា ឃោសនាបោះឆ្នោត នៅ​តំបន់​ណា​រ៉ា នៅ​ជប៉ុន​ខាងលិច​។ ការស្លាប់​របស់លោក ត្រូវបាន បញ្ជាក់ ដោយ​មន្ត្រី​ក្នុង​គណបក្ស​ប្រជាធិបតេយ្យ​សេរី (LDP) របស់លោក​ទៅកាន់​សារព័ត៌ មាន​ក្នុងស្រុក នៅ​ប្រហែល​ប្រាំមួយ​ម៉ោង ក្រោយ​ការវាយប្រហារ នៅ​ម៉ោង ១១ កន្លះ ព្រឹក​ថ្ងៃទី ៨ ខែកក្កដា នេះ និង​កើតឡើង ក្រោយ​ក្រុម​វេជ្ជបណ្ឌិត ខ្នះខ្នែង​សង្គ្រោះ​ជីវិត របស់លោក​៕/V​